བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་གངས་ལྗོངས་བུ་རྒྱུད་ཚོ་ལ་བརྩེ་བ་བཅངས་ནས་བོད་ལྗོངས་འཕེལ་རྒྱས་ཡོང་བའི་འཆར་རིས་བཀོད་པའི་པར་རིས་བདམས་བཀོད།

ཞིན་ཧྭ་གསར་འགྱུར་ཁང་ནས་པར་དྲངས།

2019ལོའི་ལོ་མཇུག་ལ་བོད་ལྗོངས་ཀྱི་དབུལ་ཕོངས་རྫོང་དང་ཆུས74ཡི་དབུལ་ཞྭ་ཕུད་ཐུབ་ཡོད་ལ་ཡིག་ཚགས་བྱང་འཛུགས་དབུལ་པོ་ཁྲི62.8དབུལ་ཐར་བྱུང་ཡོད། སློབ་གསོའི་བྱ་གཞག་སྔོན་ཐོབ་གོང་འཕེལ་བྱུང་ཞིང་བྱིས་སློབ་ཁང་ནས་མཐོ་འབྲིང་བར་གྱི་ལོ15ཡི་གཞུང་གྲོན་སློབ་གསོ་ལག་ལེན་སྔོན་ལ་བསྟར་ཡོད། སྲོལ་རྒྱུན་རིག་གནས་ཕུལ་བྱུང་བརྒྱུད་འཛིན་སྲུང་སྐྱོང་བེད་སྤྱོད་ནུས་ལྡན་ཐུབ་ཅིང་། སྤྱི་པའི་རིག་གནས་ཞབས་ཞུའི་ཆུ་ཚད་རྒྱུན་ཆད་མེད་པར་ཆེ་རུ་སོང་ཡོད། གྲོང་ཡུལ་སྤྱི་པའི་སྨན་བཅོས་འཕྲོད་བསྟེན་ཞབས་ཞུ་མ་ལག་རྒྱུན་ཆད་མེད་པར་འཐུས་ཚང་དུ་སོང་བ་དང་། ཞིང་འབྲོག་པའི་བདེ་ཐང་ཞིབ་བཤེར་ཁྱོན་ཡོངས་ལ་ཁེབས་ཡོད། ལྗོངས་ཡོངས་ཀྱི་མི་རེའི་ཆ་སྙོམས་སྔོན་དཔག་ཚེ་ཚད་ལོ72.5ལ་སྤར་ཐུབ་ཡོད། 2024ལོའི་ལོ་མཇུག་བར། བོད་ལྗོངས་ཀྱི་གཞུང་ལམ་དུ་རླངས་འཁོར་ཤར་གཏོང་ཐུབ་པའི་ལམ་ཐག་བསྡོམས་འབོར་སྤྱི་ལེ་ཁྲི12.49ལ་ཟིན་ཞིང་ལྕགས་ལམ་སྐྱེལ་གཉེར་ལམ་ཐག་སྤྱི་ལེ1359ལ་ཟིན་ཡོད་པ་དང་། རྒྱལ་སྤྱི་དང་རྒྱལ་ནང་གི་མཁའ་ལམ183ལ་ཟིན་ཡོད། བོད་ལྗོངས་ཀྱི་ལྗོངས་ཧྲིལ་པོའི་རྒྱལ་སའི་བརྒྱ་ཆ50ཡན་སྐྱེ་ཁམས་སྲུང་སྐྱོང་གི་དམར་རྒྱ་རུ་ཚུད་ཅིང་། ནགས་ཚལ་ཁེབས་ཚད་བརྒྱ་ཆ12.31མཐོ་རུ་སོང་ཡོད། ཁོར་ཡུག་མཁའ་དབུགས་སྤུས་ཚད་བཟང་པོའི་ཉིན་གྲངས་བསྡུར་ཚད་བརྒྱ་ཆ99.7ལ་ཟིན་པ་དང་། ཆུ་དང་གཙང་པོ་མཚེའུ་ཡི་ཆུ་སྤུས་ཆུ་གཟུགས་རིགས་གསུམ་པར་སླེབས་ཚད་བརྒྱ་ཆ100ལ་ཟིན་པ་དང་ཡང་ན་དེ་ལས་བཟང་ཡོད། སྐྱེ་ཁམས་ཀྱི་ལས་གནས་ཁྲི44བཞག་ཅིང་ལོ་རེར་ཁ་གསབ་སྒོར་དུང་ཕྱུར15སྤྲད་དེ། མི་དམངས་མང་ཚོགས་སྐྱེ་ཁམས་འཛུགས་སྐྱོང་ཁྲོད་དུ་སྐྱེ་ཁམས་ཀྱི་ཟ་མ་རག་པ་དང་ཕྱུག་ལམ་དུ་བསྐྱོད་ཐུབ་ཡོད།

ད་ལྟའི་བོད་ལྗོངས་སུ་སྤྱི་ཚོགས་བརྟན་ལྷིང་དང་དཔལ་འབྱོར་འཕེལ་རྒྱས། མི་རིགས་མཐུན་སྒྲིལ། ཆོས་ལུགས་ཞི་མཐུན། སྐྱེ་ཁམས་ལེགས་པོ། མཐའ་སྲུང་སྲ་བརྟན། མི་དམངས་བདེར་སྡོད་ལས་བརྩོན་ཡིན་ཞིང་། བོད་བྱང་མཐོ་སྒང་ནས་ལྷ་སའི་སྐྱིད་ཆུ་འགྲམ་དང་། ཇོ་མོ་གླང་མའི་རི་འདབས་ནས་ཡར་ཀླུང་གཙང་པོའི་ངོགས་གཉིས་བཅས་གང་ས་གང་དུ་དཔྱིད་ཀྱི་དཔལ་ཡོན་རྒྱས་པ་ལྟ་བུའི་གསོན་ཉམས་དོད་པོའི་རྣམ་པ་ཞིག་མངོན་བཞིན་མཆིས་སོ།།

( ཐུབ་ཀྱིས་བསྒྱུར་ནས་ཞུས། )