ཕ་ཡུལ་དུ་ལོག་ནས་ལས་ལམ་གསར་དུ་གཏོད་པའི་འདུན་པ་སྐྱེས།
སྡེ་རོང་རྫོང་རྐེད་ཤོད་ཡུལ་ཤོག་ཁ་རི་སྒང་གྲོང་སྡེའི་ལུང་པའི་ཕུ་རུ་ནས་གཡང་སྟེང་ཞེས་པའི་ས་ཆ་ཞིག་ཡོད་ལ། ཕྱོགས་བཞིར་ཐང་ཤིང་དང་བེ་ཤིང་སོགས་ཀྱི་ནགས་ཀློང་སྟུག་པོས་ཁེངས་ཤིང་བར་དུ་སྤང་གཤོང་ཆེ་ཆུང་དུ་མས་རབ་ཏུ་བརྒྱན་ཡོད། གྲོང་སྡེ་ནས་གྱ་གྱུའི་རི་ལམ་བརྒྱུད་དེ་ཆུ་ཚོད་གསུམ་ཡས་མས་སོང་བ་ན་བྱམས་པ་ཆོས་གྲགས་ཀྱི་སྒོག་བསིལ་སྨན་རྩྭ་རྟེན་གཞིར་སླེབས་ཐུབ།
བྱམས་པ་ཆོས་གྲགས་ད་ལོར་ལོ35ཡིན་ཞིང་། ཁ་རི་སྒང་གྲོང་སྡེ་རང་ནས་འཚར་ལོངས་བྱུང་བ་ཞིག་ཡིན། སློབ་གྲྭ་ཆུང་འབྲིང་ནས་མཐར་ཕྱིན་རྗེས་ཁོ་རང་ཡུན་ནན་གྲོང་ཁྱེར་པའོ་ཧྲན་དུ་སྨན་རྩྭའི་ལས་རིགས་དང་འབྲེལ་བའི་སྤྱི་གཉེར་ཁང་ཞིག་ཏུ་ལས་ཞུགས་ཐུབ་ཡོད། བྱམས་པ་ཆོས་གྲགས་ནི་གཞུང་དྲང་ལ་བརྩོན་འགྲུས་ཆེ་བ། རིག་པ་གྲུང་བ། བཟོད་སེམས་ཆེ་བའི་ན་གཞོན་ཞིག་ཡིན་པས་ལོ་ཁ་ཤས་ཀྱི་ནང་དུ་ཁོས་སྨན་རྩྭ་འདེགས་འཛུགས་ཀྱི་ཆེད་ལས་ཤེས་བྱ་དང་ལག་ལེན་དམར་ཁྲིད་ཀྱི་ཉམས་མྱོང་ཁོང་དུ་ཆུད་པར་གྱུར། མི་ཡུལ་གྱི་ཁེ་ལས་པ་དང་ལས་གཏོད་པའི་སྣེ་ཁྲིད་འོག་ཡུལ་མི་ཚོ་ཐོན་ལས་ལ་བརྟེན་ནས་འབྱོར་འབྲིང་གི་ལམ་དུ་བསྐྱོད་དང་སྐྱོད་བཞིན་པའི་གནས་ཚུལ་མཐོང་བ་ན། བྱམས་པ་ཆོས་གྲགས་ཀྱི་སེམས་སུ་སྨྲ་མི་ཤེས་པའི་ཚོར་སྣང་གིས་ཡོངས་སུ་ཁེངས། ཕ་ཡུལ་དྲན་པའི་བརྩེ་འདང་ཇེ་ཆེར་སོང་བ་དང་བསྟུན་ནས་ཁོའི་སེམས་སུ་ལྡོག་ཏུ་མེད་པའི་འདུན་པ་ཞིག་དྲག་ཏུ་ལྡང་། ཁྱིམ་མིར་ལྟ་རྟོག་ཡག་པོ་ཐུབ་ཆེད་དང་ཡུལ་མི་ཚོས་ཐོན་ལས་ལ་བརྟེན་ནས་ཡོང་འབབ་ཅུང་ཟད་འཕར་ཐུབ་པར་རོགས་རམ་ཐུབ་ཆེད། ཁོས་གྲོང་ཁྱེར་དུ་ལས་དོན་སྒྲུབ་པའི་གོ་སྐབས་བསྐྱུར་ནས་ཕ་ཡུལ་དུ་ལོག་སྟེ་ལས་ལམ་གསར་དུ་གཏོད་པའི་སེམས་ཐག་རྦད་དེ་བཅད་པ་རེད།
རང་གི་ཁྱད་ཡོན་དམིགས་ནས་ལས་གཏོད་ཁ་ཕྱོགས་
སྨན་རྩྭ་འདེབས་འཛུགས་ལ་གཏད།
ཕ་ཡུལ་དུ་ལོག་རྗེས། ལས་ལམ་གསར་དུ་གཏོད་ཕྱོགས་ལ་བསམ་གཞིག་ཡང་ཡང་བྱས་མཐར། རང་ལ་སྨན་རྩྭ་འདེབས་འཛུགས་ཀྱི་ཉམས་མྱོང་ཕུན་སུམ་ཚོགས་པ་ཡོད་པའི་ཁྱད་ཡོན་འདོན་སྤེལ་གང་ལེགས་བྱས་ནས། སྨན་སྤྱོད་རིན་ཐང་ཆེ་བ་དང་ཁྲོམ་རའི་མདུན་ལམ་རྒྱ་ཆེ་བའི་སྔོ་སྨན་སྒོག་བསིལ་འདེབས་འཛུགས་བྱ་རྒྱུ་གཏན་ལ་ཕབ།
བྱམས་པ་ཆོས་གྲགས་ཀྱིས་སྒོག་བསིལ་ཞེས་པའི་སྔོ་སྨན་ནི་རི་ཀླུང་གི་ནགས་ཞབས་སུ་སྐྱེས་པ་དང་། སི་ཁྲོན་དང་ཡུན་ནན། བོད་ལྗོངས། ཀན་སུའུ། ཀུའེ་ཀྲོའུ། ཧྲཱན་ཞི་སོགས་སུ་ཡོད། འབྲས་བུ་ལྡུམ་བུ་ཁ་ཞེང་ལི་སྨི1ཙམ་ཡོད་ཅིང་ལོ་མ་ལེབ་རིང་ཁབ་དབྱིབས་ཅན་གཅིག་གམ་གཉིས་ཡོད། མཚོ་འཕགས་ཆིག་སྟོང་ནས་སུམ་སྟོང་བར་འདེབས་འཛུགས་འཚམ་ཞིང་ཉི་འོད་ལ་དེ་ཙམ་མི་དགའ། སྐྱེ་འཕེལ་དུས་ཡུན་ཟླ་བ་ལྔ་དྲུག་ཙམ་ཡིན། སྨིན་བ་ན་དཔྱིད་སྟོན་གཉིས་ལ་བརྐོ་དགོས་པ་དང་། འབྲས་བུ་སོ་མ་སྨན་དུ་སྤྱད་པའམ་བསྐེམས་རྗེས་སྤྱད་ཆོག། རྫས་འགྱུར་གྲུབ་ཆ་ལྟར་ན་ཨན་གཞི་སྐྱུར་སྣ་མང་འདུས་ཡོད། སྨན་གྱི་རང་བཞིན་བསིལ་ཞིང་དུག་ཅུང་ཟད་ཡོད་པ་དང་། ཚ་བ་དང་དུག་སེལ་བ། ལུ་བ་དང་ཤ་འདྲིལ་སེལ་བ། སྐྲང་དང་གཉན་འབུར་འཇོམས་པ། ན་ཟུག་གཅོག་པ། གཅིན་འགག་སེལ་བ། གྲུམ་གཉན་སེལ་བ། རིག་པ་དྭངས་ཤིང་ངལ་དུབ་སེལ་བ། གཉིད་མི་ཡོང་བ་དང་ཁྲག་ཤེད་གཅོག་པར་ཕན་པ། རྨ་ཁ་རུབ་པ་དང་ཆུ་སེར་སྐེམ་པར་ཕན་པ། སྐྲན་ནད་འགོག་པ་སོགས་ཀྱི་ཕན་ནུས་ཡོད་པར་བཤད། མཚོ་འཕགས་ཅུང་མཐོ་ན་འབུ་གནོད་སོགས་ཆུང་བ་དང་སྤུས་ཀ་དེ་བས་བཟང་པོ་ཡོད། ང་ཚོའི་གྲོང་སྡེའི་མཚོ་འཕགས3100ཡས་མས་ཡོད་ཅིང་། ནས་གཡང་སྟེང་གི་ཕྱོགས་བཞིར་ཐང་ཤིང་གིས་ཁེངས་ཤིང་ཐང་ས་ནི་རླན་གཤེར་རན་པ་ཡིན་པས་སྒོག་བསིལ་སྐྱེ་འཚར་གྱི་ཆ་རྐྱེན་ཡག་པོ་འཛོམས་ཡོད་ཅེས་བཤད་པ་རེད།
དེ་ནས2023ལོ་ནས་བཟུང་བྱམས་པ་ཆོས་གྲགས་ཀྱིས་ཡུལ་མི་ཚོ་ཁྲིད་དེ་ས་རྒོད་སློག་པ་དང་ཞིང་གི་སྐས་གདང་སློང་བ། གཅན་གཟན་དང་རི་དྭགས་འགོག་པའི་ལྕགས་ར་བསྐོར་བ་སོགས་རྨང་གཞིའི་འཛུགས་སྐྲུན་དཀའ་ཚེགས་ཆེ་བ་ལས་འགོ་བརྩམས། མཁོ་ཆས་རྣམས་མིའི་སྒལ་པར་བརྟེན་ནས་རི་ལམ་གྱ་གྱུ་རྡོག་པས་འཇལ་ཏེ་རི་འགོར་བསྐྱལ་དགོས་པས་ནམ་ཟླ་དེའི་རིང་ནི་ནམ་ལངས་སྐར་མ་ཕར་ལ་བསྐྱལ་བ་དང་སྔ་མོའི་ཉི་མ་ཚུར་ལ་བསུ་བ། ལུས་རྔུལ་ནག་གིས་སྦངས་ཤིང་རྐང་ཆུ་བུར་རྡོལ་བའི་དཀའ་ཚེགས་ཆེས་ཆེ་བའི་དུས་ཡིན། སྐབས་དེར་ཁྱིམ་མི་ཚོའི་བློ་ལ་མི་བབས་ནས་བསམ་འཆར་བཏོན་མྱོང་ལ། གཉེན་ཉེ་བ་དང་གྲོགས་པོ་ཚོས་ཀྱང་བསམ་ཤེས་མེད་པའི་ཁར་ལེ་བདའ་ཡང་བྱས་མྱོང་། ཡིན་ན་ཡང་བྱམས་པ་ཆོས་གྲགས་ཀྱིས་དད་སེམས་བརྟན་པོས་རང་གིས་བདམས་པའི་ལམ་བུར་ཞུམ་པ་མེད་པར་བསྐྱོད།
དཀའ་སྤྱད་ལས་ལ་འབྲས་བུ་སྨིན་ནས་རེ་བའི་ཕྱོགས་སུ་གོམ་ཁ་བསྒྱུར།
2024ལོའི་ལོ་འགོར། བྱམས་པ་ཆོས་གྲགས་ཀྱིས་ཡུན་ནན་ནས་སྒོག་བསིལ་སོན་བཟང་ཁྲི་ལྔ་ནང་འདྲེན་བྱས་ཏེ་རེ་བའི་ཕྱོགས་སུ་གོམ་པའི་འདེགས་འཇོག་ཐོག་མར་སྤོས། སོན་མྱུག་གསོ་བའི་ལས་ཀ་ནི་ངང་ཐུང་འབད་པས་མི་འགྲུབ་པའི་ཞིབ་ཚགས་ཆེ་བའི་ལས་ཤིག་ཡིན་པས། ཚ་བས་ཇི་ལྟར་མནར་བ་དང་གྲང་བས་ཇི་ལྟར་གཙེས་ན་ཡང་སྙོར་སྐྱོང་མུ་ནས་མུ་མཐུད་དེ་རྒྱུན་འཁྱོངས་ཐུབ་དགོས་པ་ནི་གནད་འགག་རེད། དཀའ་སྤྱད་ལས་ལ་འབྲས་བུ་སྨིན་པ་ནི་རྒྱུ་འབྲས་ཀྱི་རང་གཤིས་སུ་སོང་བར་བརྟེན། 2024ལོའི་ལོ་མཇུག་ལ་སྒོག་བསིལ་འདེབས་འཛུགས་ཀྱི་གཞི་ཁྱོན་ཆེ་རུ་སོང་ནས་སྒོག་བསིལ་འབུམ་བཞི་ལ་ཟིན་པ་དང་། དེ་ནས་ཟླ་བ་ཁ་ཤས་སོང་རྗེས། མུའུ་གཉིས་ཡས་མས་ཡོད་པའི་རྟེན་གཞི་དེར་སྒོག་བསིལ་ས་ཡ་གཅིག་ལ་བརྒལ་བར་སྐྱེས་ཡོད་པར་མ་ཟད་སྐྱེས་ཚུལ་ཧ་ཅང་བཟང་བ་རེད།
ད་ལོར་བྱམས་པ་ཆོས་གྲགས་ཀྱིས་སྒོག་བསིལ་སོན་མྱུག་འབུམ5དང་འབྲས་བུ་སྤྱི་རྒྱ300ཕྱིར་འཚོང་བྱེད་ཆོག་ཅིང་། ད་སྔའི་ཁྲོམ་རའི་རིན་གོང་ལྟར་ན་སོན་མྱུག་རེ་ལ་སྒོར་ཟུར་ལྔ་རེ་དང་འབྲས་སྨིན་གྲུབ་རྫས་སྤྱི་རྒྱ་རེ་ལ་སྒོར600རེ་ལོན་པའི་དབང་དུ་བཏང་ན། ཡོང་འབབ་སྒོར་འབུམ3ལས་བརྒལ་བར་འཐོབ་པའི་རེ་བ་ཡོད་པ་རེད། དེ་ནི་དཔལ་འབྱོར་གྱི་ཕན་འབྲས་རྐྱང་པ་མ་ཡིན་པར་བྱམས་པ་ཆོས་གྲགས་ཀྱིས་ལོ་འགའ་ནང་དཀའ་བ་ཁྱད་དུ་བསད། ངལ་བ་དང་དུ་བླངས་པའི་རེ་འབྲས་ཡིན་ལ། ཁོས་རྒྱུན་འཁྱོངས་ལྷོད་མེད་བྱེད་པའི་ཐོག་མའི་བསམ་འདུན་ཡང་དག་པ་ཡིན་པའི་དཔང་རྟགས་ཤིག་ཀྱང་རེད།
ཁུ་སིམ་མེའི་རི་ཁུག་ཏུ་འཚོ་བ་རོལ་བ་ན། རིག་ནུས་ཁ་པར་ནི་ཁོ་དང་ཕྱི་རོལ་གྱི་འཇིག་རྟེན་ཕན་ཚུན་སྦྲེལ་བྱེད་དུ་གྱུར་ཡོད། ཁོས་ངལ་ལས་ཀྱི་ཁོམ་སྐབས་དང་བསྟུན་ནས། འཁྱུག་དབྱིངས་འཕྲིན་སྟེགས་བརྒྱུད་དེ་ལས་ལམ་གསར་གཏོད་ཀྱི་དཀའ་ཚེགས་དང་ཉམས་མྱོང་གཟུགས་ལམ་དུ་ཕབ་སྟེ་རིགས་མཐུན་རྣམས་ལ་སྐུལ་མ་བྱས་པ་དང་། དྲྭ་གྲོགས་རྣམས་ལ་སྒོག་བསིལ་འདེབས་འཛུགས་ཀྱི་ཆེད་ལས་ཤེས་བྱ་ཡང་ཞར་དང་ཞོར་ལ་བགོས་རོལ་བྱས་དང་བྱེད་བཞིན་ཡོད།
དགའ་འོས་པ་ཞིག་ནི་ཡུན་ནན་ས་དམ་དང་། སི་ཁྲོན་འབའ་ཐང་དང་ལྕགས་ཟམ་རྫོང་། དར་མདོ་གྲོང་ཁྱེར་སོགས་ས་གནས་ཀྱི་སྨན་རྫས་འདེབས་འཛུགས་དུད་ཚང་གིས་བྱམས་པ་ཆོས་གྲགས་སར་སྒོག་བསིལ་སོན་མྱུག་ཉོ་བའི་སྔོན་ཉོའི་མངག་ཐོ་གཅིག་རྗེས་གཉིས་མཐུད་དེ་འབྱོར་བ་རེད།
འབྱུང་འགྱུར་གྱི་འཆར་གཞི་སྐོར་གླེང་བའི་ཚེ། བྱམས་པ་ཆོས་གྲགས་ཀྱིས་གདེང་ཚོད་ཆེན་པོས་རྗེས་མར་གཅིག་ནི་ཡུལ་སྡེ་དར་རྒྱས་ཀྱི་སྲིད་ཇུས་བཟང་པོ་རག་གང་ཐུབ་དང་ཆབས་ཅིག། ཡུལ་མི་ཚོའི་སྣེ་ཁྲིད་དེ་སྒོག་བསིལ་རྟེན་གཞི་རྒྱ་སྐྱེད་དེ་སོན་མྱུག་དང་གྲུབ་རྫས་དེ་བས་མང་པོ་ཕྱིར་འཚོང་ཐུབ་པར་བྱས་ནས་ཡུལ་མི་ཚོའི་ཡོང་འབབ་ཇེ་མང་དུ་འཕར་བར་རོགས་རམ་བྱ་རྒྱུ་དང་། གཉིས་ནི་ཡུལ་བབ་དང་བསྟུན་ནས་བཟའ་བཅའ་སྨན་རྫས་འདེབས་འཛུགས་ཚོད་ལྟ་ལག་ལེན་བྱས་ཏེ་མཐོ་སྒང་གི་ཡུལ་ཐོན་ཁྱད་རྫས་ཀྱི་གྲས་སུ་གཏོགས་པའི་བཟའ་བཅའ་སྨན་རྫས་རིན་ཐང་ཆེ་བ་ཁག་ཅིག་ཞིང་ཆེན་ཕྱི་ནང་གི་ཁྲོམ་ར་ཁག་ཏུ་འདོན་ཐུབ་པའི་བསམ་ཚུལ་ཡོད་ཅེས་བཤད་པ་རེད།།
（ སྐལ་ཐུབ་ཀྱིས་བྲིས་ཤིང་བྱམས་པ་ཆོས་གྲགས་ཀྱིས་པར་བྱིན།）