རླུང་རྟའི་རི་མོའི་མཚོན་བྱེད་བརྡ་རྟགས།
དེ་ཡང་དབུས་སུ་རྟ་མཆོག་དང་། ཟུར་བཞི་ལ་སྟག་སེང་ཁྱུང་འབྲུག་བཞིའི་གཟུགས་རིས་བྲིས་ཡོད་པ་དེའི་དོན་ཅི་ཞིག་མཚོན་པ་རེད་ཅེ་ན། དེ་དག་གི་དོན་དངོས་ཀྱི་མཚོན་བྱ་ནི་འབྱུང་བ་ལྔ་མཚོན་པར་བྱེད་དེ། སྟག་ནགས་ཚལ་དུ་གནས་པས་འབྱུང་བ་ཤིང་ཁམས་མཚོན་པ་དང་། སེང་གེ་རི་བོ་ལ་གནས་པས་སའི་ཁམས་མཚོན་པ་དང་། ཁྱུང་བར་སྣང་དུ་གནས་ཤིང་རྭ་ལས་མེ་འབར་བས་མེའི་ཁམས་མཚོན། འབྲུག་རྒྱ་མཚོ་ན་གནས་པས་ཆུའི་ཁམས་མཚོན། རླུང་ནི་ཀུན་ལ་ཁྱབ་པས་ནམ་མཁའི་ཁམས་མཚོན་པ་བཅས་ཀྱིས་འབྱུང་བ་ལྔའི་བྱེད་ལས་ཀྱི་དོན་གསལ་པོ་མཚོན་ཡོད་པ་བསྟན་པ་ཡིན་ལ། དཀྱིལ་དུ་རྟ་མཆོག་གི་གཟུགས་སུ་བྲིས་ཡོད་པ་དེ་ནི་རླུང་ཁམས་དང་ཉེས་པ་ལས་ལེགས་བར་བགྲོད་པ། ལྟས་ངན་པ་ལས་བཟློག་ནས་བཀྲ་ཤིས་པར་བྱེད་ཅིང་། སྐྱེས་བུའི་རེ་འདོད་ཐམས་ཅད་ཡོངས་སུ་སྐོང་བ་ཡིད་བཞིན་གྱི་ནོར་བུ་རིན་པོ་ཆེ་དང་འདྲ་བས་རྟ་མཆོག་དེ་ལ་ནོར་བུའི་གསེར་སྒ་རྒྱན་དུ་བཀོད་སྲོལ་བྱུང་བ་ནི་རླུང་རྟའི་གོ་དོན་ཆ་ཚང་བ་མཚོན་ཡོད་ལ། གཞན་ཡང་སྲོག་གི་མཚོན་བྱེད་དེ་ཚེ་ཐག་རིང་དུ་བསྐྱེད་པར་ཕན་པ་དང་། སྟག་ནི་ལུས་ཀྱི་མཚོན་བྱེད་དེ་ལུས་པོ་ལ་བདེ་ཐང་ཡོང་བ་དང་འཚར་ལོངས་འབྱུང་བར་ཕན། འབྲུག་ནི་དབང་ཐང་མཚོན་བྱེད་དེ་ཐོབ་གོ་སའི་དབང་ཆ་དང་གོ་གནས་འཕར་བར་ཕན། སེང་གེ་ནི་རླུང་རྟའམ་ཁ་རྗེ་བསོད་ནམས་མཚོན་བྱེད་དེ་རང་གཞན་གྱི་དོན་ཐམས་ཅད་བདེ་བླག་ཏུ་འགྲུབ་ཐུབ་པར་མཚོན། རླུང་རྟ་ནི་བླ་མཚོན་བྱེད་བརྡ་རྟགས་དེས་ཞི་རྒྱས་དབང་དྲག་གི་ལས་རྣམས་རྟ་མཆོག་གི་འགྲོས་ལྟར་བགྲོད་ནས་མྱུར་དུ་དོན་ཀུན་འགྲུབ་ཐུབ་པར་བྱེད་པའི་མཚོན་བྱེད་བརྡ་རྟགས་ཡིན་ནོ།།
ལོ་རྒྱུས་ཀྱི་དཔེ་ཆ་ལས་བཤད་པ་ལྟར་ན། བྱ་ཁྱུང་ནི་སོག་པོ་མཚོན་བྱེད་དང་། དེ་བཞིན་དུ་འབྲུག་རྒྱ་ནག་མཚོན་བྱེད། སྟག་རྒྱ་གར་མཚོན་བྱེད། སེང་གེ་ནི་ནུབ་ཕྱོགས་ཀྱི་རྒྱལ་ཁབ་སོགས་མཚོན་བྱེད་ཡིན་ལ། དཀྱིལ་གྱི་རྟ་ནི་གངས་ཅན་པ་མཚོན་བྱེད་ཡིན་པར་བཤད་དོ།།ཞར་བྱུང་སྤྱིར་རླུང་རྟའི་ཕན་ཡོན་ནི། རྒུད་པ་ཡོད་ན་དར་བ་དང་། ཉམས་པ་ཡོད་ན་གསོ་བ། ཆད་པ་ཡོད་ན་མཐུད་པ། འཁྲུགས་པ་ཡོད་ན་མཐུན་པར་བྱེད་པ་སོགས་དགོས་པ་ཁྱད་པར་ཅན་གྱི་མཚོན་བྱེད་བརྡ་རྟགས་ཤིག་ཡིན་ནོ།།
རླུང་རྟའི་ཁ་དོག་དང་བེད་སྤྱོད་གཏོང་ཚུལ།
མི་རང་རང་གི་འབྱུང་བ་ཅི་ཞིག་ཡིན་ན་འབྱུང་བ་རང་མདོག་ལྟར་གདགས་དགོས། འབྱུང་བ་རྣམས་ཀྱི་ཁ་དོག་ནི། འབྱུང་བ་ཤིང་ཡིན་ན་ལྗང་གུ་དང་། ས་ཡིན་ན་སེར་པོ། མེ་ཡིན་ན་དམར་པོ། ལྕགས་ཡིན་ན་དཀར་པོ་དགོས་ཞེས་བཤད་སྲོལ་གཅིག་དང་། ཡང་མཁས་པ་སྟག་བླ་ནོར་བུ་དང་ཞང་སྟོན་བསྟན་པ་རྒྱ་མཚོ་སོགས་ཀྱི་གཙུག་ལག་དང་། རླུང་རྟའི་ཀྭ་འཛུགས་ཀྱི་དགོངས་པ་ལྟར་ན་ཁམས་ཉིད་གཙོ་བོ་བྱེད་ཅིང་། དེ་ཡང་བྱ་གླང་སྦྲུལ་གསུམ་ལོ་པ་ལ་རླུང་རྟའི་མདོག་སྔོན་པོ་བཟང་ཞིང་སེར་པོ་དགྲ་མདོག་ཡིན་པས་སྤངས། སྟག་རྟ་ཁྱི་གསུམ་ལོ་པ་ལ་དམར་པོ་བཟང་ལ་སྔོན་པོ་སྤངས། བྱི་འབྲུག་སྤྲེལ་གསུམ་ལོ་པར་ལྗང་གུ་བཟང་ལ་དཀར་པོ་སྤངས། འདིར་མདོག་མ་བཤད་པ་རྣམས་ཀྱང་མི་རུང་བ་མ་ཡིན་པར་ཤེས་དགོས་སོ།།
དར་ལྕེ་བཏགས་ལུགས། དར་ཁྲ་ཁྲ་བྱེད་བསམ་ན་ཡས་ནས་མས་རིམ་བཞིན་དུ་གནམ་སྔོན་པོ་དང་། སྤྲིན་དཀར་པོ། བར་སྣང་དམར་པོ། ཆུ་ལྗང་གུ ས་གཞི་སེར་པོ་དགོས་ཞེས་གསུངས་ལ། ཡང་དར་ལྕེ་སྤྱིར་བཏང་ལྟར་ན་གནམ་སྔོན་པོ་དང་། བར་སྣང་དམར་པོ། ས་གཞི་སེར་པོ་བཅས་བྱས་ན་བཟང་། རླུང་རྟ་འབྲི་སྐབས་སྟོད་ཀྱི་གཡས་ཟུར་ལ་ཁྱུང་དང་གཡོན་ཟུར་ལ་འབྲུག་འབྲི་དགོས། སྨད་ཀྱི་གཡས་ཟུར་ལ་སྟག་དང་གཡོན་ཟུར་ལ་སེང་གེ་འབྲི་དགོས། དཀྱིལ་དུ་རྟ་ཡག་པོ་ཚད་དང་ལྡན་པ་ཞིག་འབྲི་དགོས། གནའ་སྔ་མོར་སེང་གེའི་ཚབ་དུ་གཡག་ཅིག་འབྲི་སྲོལ་ཡོད་ཅེས་བཤད་ཀྱང་དེང་སང་ནི་འབྲི་སྲོལ་མེད།
རླུང་རྟའི་གོ་དོན་དང་དཔར་གཞིའི་སྐོར།
རླུང་རྟའི་གོ་དོན་ནི། ཁམས་དང་ལམ་འགྲོ་ཞེས་པའི་དོན་ཡིན། ཀླུང་ངམ་རླུང་ནི་སྐབས་ཐོབ་ཀྱི་ལམ་འགྲོ་དང་། ལས་ལམ། ཁ་རྗེ་དང་དབང་ཐང་སོགས་ལ་གོ་དགོས། རྟ་ནི་ཅང་ཤེས་རྟ་མཆོག་བགྲོད་པ་རླུང་ལྟར་མྱུར་བའི་དོན་མཚོན་པར་བྱེད་ཅིང་། དེ་དག་གི་དོན་ཚུར་བསྡུས་ན། ལམ་འགྲོ་ཡོད་མེད་དང་ལས་ལམ་དྲང་མི་དྲང་དང་ཁ་རྗེ་དབང་ཐང་དར་བར་མྱུར་དགོས་ཞེས་པའི་དོན་མཚོན་ལ། བོད་ཀྱི་གཏམ་དཔེ་ལས། རྒྱག་དང་མི་རྒྱག་ཐེ་ཚོམ་མེད་སོམ་ཉི་མེད།།ཐེབས་དང་མི་ཐེབས་རླུང་རྟའི་སྟེང་ནས་ཤོད།།ཅེས་ཀྱང་གསུངས་པ་ལྟར་རང་རང་གི་འབད་བརྩོན་དང་ལས་དབང་བཅས་ལ་རག་ལས་པ་ཡིན་ནོ།།
རླུང་རྟའི་དཔར་གཞིའི་རྒྱུ་ཆ་ནི། རླུང་རས་དང་། ཤོག་གུ། སྤྱིར་བཏང་གི་རས་དཀར་སེར་དམར་ལྗང་དང་། དར་རས། གོས་ཆེན། རས་བལ་དང་སྤུ་ལས་བཟོས་པའི་པར་གཞི་རྣམས་ལ་དཔར་སློག་བརྒྱབ་ནས་ཡི་གེ་དཔར་ན་ཆེས་ཡག་ཤོས་རེད། གཞན་ཡང་དེང་སང་འགྱིག་རས་ཀྱིས་རླུང་རྟ་དཔར་གཞི་བྱས་པ་རྣམས་ནི་ཆེས་ངན་པ་དང་ཆེས་ཐབས་སྡུག་ཤོས་དེ་རེད། དེ་ཅི་འདྲ་རེད་ཅེ་ན། འགྱིག་གི་རྒྱུ་ཆ་བྱས་པའི་ཇོ་དར་དང་རླུང་རྟ་འདྲ་མིན་སྣ་ཚོགས་རླུང་གཡུག་ནས་མར་ས་ཐོག་ཏུ་ལྷུང་རྗེས། ར་ལུག་དང་རྟ་ཟོག་གིས་ཟོས་རྗེས་ཁོག་པའི་ནང་ནས་ཞུ་མི་ཐུབ་པས་སེམས་ཅན་མང་པོ་ཞིག་འབྲོག་ཁུལ་དང་རོང་ཁུལ་སོགས་སུ་ཤི་དང་འཆི་བཞིན་ཡོད་ཀྱང་དེའི་སྐོར་ལ་བསམ་བློ་ནན་ཏན་བཏང་ནས་རྟ་ཟོག་མི་འཆི་བའི་ཐབས་ལམ་སྤྱོད་མཁན་ནི་ཤིན་ཏུ་ཉུང་བས་དེ་ལུགས་ཞུའོ།།
རླུང་རྟ་བཏགས་ཡུལ་ནི་རི་མཐོན་པོའི་མགོ་དང་། ཆུ་ཆེན་པོའི་ཁ། སྡོང་མ་རིང་པོ་དང་། རི་དང་རི་ཡི་བར་དང་ཟམ་པ་སོགས་ཀྱི་བར་དུ་ཐག་པ་དང་ལྕགས་སྐུད་རིང་པོ་འཐེན་ནས་དར་ཐག་བརྒྱངས་ཏེ་བཏགས་མཁན་ཡང་ཡོད། ཡང་གཞི་བདག་དང་ལབ་རྩེའི་མགོ་མཆོད་རྟེན་སོགས་ཀྱི་རྩ་བ་ལའང་རླུང་རྟའི་ཤིང་སྡོང་བཙུགས་ནས་བཏགས་སྲོལ་ཡང་ཡོད། རླུང་རྟ་བཏགས་པའི་དུས་ཚོད་ནི། ལོ་གསར་དང་རྟ་རྒྱུག་གི་སྐབས་དང་། དེ་མིན་སྐར་བཟང་དུས་བཟང་རྣམས་ལ་བསྟུན་ནས་བཏག་དགོས་པ་ཡིན་ནོ།།
རླུང་རྟ་དཔར་ཚར་རྗེས་རབ་གནས་རྒྱག་དགོས། རླུང་རྟ་བཏགས་སྐབས་རླུང་རྟ་བསྐྱེད་པ་འདོན་དགོས། རི་བསང་བྱེད་སྐབས་རླུང་རྟའི་ཤོག་བྱང་རྣམས་ཆག་པ་ཆག་པ་བྱས་ནས་བསང་མེའི་ནང་དུ་སྲེག་ན་བསང་གྲོལ་ཉན། བསང་ཕུད་རྗེས་རླུང་རྟའི་ཤོག་བྱང་རྣམས་ཆག་པ་དང་ཆག་པ་བྱས་ནས་ནམ་མཁའི་དབྱིངས་སུ་གཏོར་ན། རླུང་རྟ་རྣམས་མཁའི་དབྱིངས་སུ་བྱ་འཕུར་བ་ལྟར་ནམ་མཁའི་དབྱིངས་སུ་ལྡིང་འགྲོ་བ་ཡིན་ལ། མི་ཚོས་ཀི་ཀི་བསྭོ་བསྭོས་ཧ་སྒྲ་ཆེན་པོ་བརྒྱབ་ནས་ཁ་འབོད་མང་པོ་བྱས་ནས་གཞི་བདག་བསྟོད་སྲོལ་ཡོད། རླུང་རྟའི་ལོ་རྒྱུས་ལ་མཚོན་ན་ལོ་ཁྲི་གཅིག་ལྷག་གི་དུས་ཚོད་སོང་བར་བོད་ཀྱི་ལོ་རྒྱུས་མཁན་པོ་ཚོས་བཤད་འདུག།རླུང་རྟ་ཐོག་མར་གསར་གཏོད་བྱེད་མཁན་ནི་བོད་མི་རིགས་ཀྱི་ཉམས་མྱོང་ཅན་གྱི་མེས་པོ་རྣམ་པ་ཚོ་ཡིན། རླུང་རྟའི་པར་ཤིང་དང་དཔར་གཞི་ནི། དཔར་བྱེད་ཤིང་ལེབ་ལ་རྐོས་བརྒྱབ་པའི་པར་ཤིང་ངམ་འཕྲུལ་པར་དང་གློག་པར་སོགས་ཡིན་ལ། རླུང་རྟའི་ཟུར་བཞི་ན་སྲོག་ཆགས་ཡོད་པ་རྣམས་ལ་གཉན་ཆེན་བཞི་ཞེས་འབོད་སྲོལ་ཡང་ཡོད། འཇུ་མི་ཕམ་གྱིས་ཀླུང་རྟ་ཞེས་འབྲི་མི་ཉན་རླུང་རྟ་ཞེས་བྲིས་ན་བཟང་ཞེས་གསུངས་སོ།།
རླུང་རྟ་དང་གླིང་སྒྲུང་བར་གྱི་འབྲེལ་བ།
དེ་ཡང་གླིང་རྗེ་གེ་སར་རྒྱལ་པོའི་སྒྲུང་གི་ནང་དུ་སྟག་དང་། ཁྱུང་དང་། འབྲུག སེང་གེ་བཅས་ནི་གླིང་གི་རིགས་རུས་མཚོན་བྱེད་ཡིན་ལ། སྟག་ནི་གླིང་གེ་སར་གྱི་ཨ་ཁུའི་རུས་རྒྱུད་སྟག་རོང་ཞེས་པའི་མཚོན་བྱེད་དུ་རྩི་བ་ཡིན། ཁྱུང་ནི་གླིང་གི་མི་རབས་གསུམ་གྱི་མི་རྒན་ཨ་མྱེ་སྤྱི་དཔོན་རོང་ཚ་ཁྲ་རྒན་མཚོན་བྱེད་ཡིན། འབྲུག་ནི་གླིང་གེ་སར་རྒྱལ་པོ་ནི་ལྡོང་གི་རུས་སུ་གཏོགས་པས་གླིང་གེ་སར་མཚོན་བྱེད་ཡིན། སེང་གེ་ནི་གེ་སར་གྱི་ཡབ་དང་ཡུམ་དང་གླིང་སྤྱིའི་རུས་རྒྱུད་རྣམས་ཀྱི་མཚོན་བྱེད་ཡིན་ལ། གླིང་གིས་གེ་སར་རྒྱལ་པོ་བསྐོས་པ་ནས་བཟུང་རླུང་རྟའི་དཀྱིལ་གྱི་རྟ་དེ་གེ་སར་གྱི་ལྷ་རྟ་རྐྱང་ལུ་མཚོན་བྱེད་དུ་རྟའི་མདོག་རྐྱང་ངུ་ཞིག་འབྲི་སྲོལ་ཡང་དར་བ་ཡིན་པར་བཤད། ཡང་གླིང་སྒྲུང་ལས། ཕོ་ལ་རྒོད་ཞན་ཟེར་བ་དེ།།ཉིན་གཅིག་གི་རླུང་རྟ་དར་རྒུད་རེད།།རྟ་ལ་མགྱོགས་ཞན་ཟེར་བ་དེ།།ཉིན་གཅིག་གི་རྩྭ་ཆུ་འཕྲོད་ལུགས་རེད།།ཅེས་གསུངས་པ་ལྟར་རེད། གེ་སར་རླུང་རྟའི་གསོལ་བསྡུས་ལས།། ཧཱཾ།། བཀྲ་ཤིས་རླུང་རྟ་སྙན་པའི་བ་དན་ཆེ།།ཀུན་བཟང་མཆོད་པའི་སྤྲིན་ཆེན་འཕྲོ་བ་འདི།།རྩ་གསུམ་སྲུང་མ་དགྲ་ལྷ་ཟོ་དོར་དང་།།མགོན་ཞིང་སྐྱོབས་པ་མཆོད་པའི་མགྲོན་གྱུར་སོགས།། ཁྱད་པར་གེ་སར་ནོར་བུ་དགྲ་འདུལ་རྩལ།།རྫུ་འཕྲུལ་རྡོ་རྗེའི་རྐྱང་རྒོད་ཕེར་པོ་དང་།། དཔའ་རྟུལ་དྭངས་སྨན་བཀའ་སྡོད་ཕོ་ཉར་བཅས།།གསོལ་ལོ་མཆོད་དོ་བསམ་དོན་ལྷུན་གྲུབ་མཛོད།།ཅེས་གསུངས་པ་དང་། བསོད་ནམས་རླུང་བསྐྱེད་པའི་ཆོ་ག་སྐལ་བཟང་སྙིང་གི་ཐིག་ལེ་ལས། རླུང་རྟ་སྙན་པའི་བ་དན་དགེ་མཚན་རླུང་གིས་བསྐྱོད་པས་ཕྱོགས་བཅུར་གྲགས་པ་རྒྱས། ལས་བྱས་པ་རྣོ་མྱུར་ཐོགས་མེད་དུ་འོང་། ལེགས་པའི་ཕྱོགས་ལ་འཕྲད། ཉེས་པར་བསྣོལ། རྒྱལ་ཁ་ཐོབ་སྟེ་མི་ཡི་ཁྱུ་མཆོག་ཏུ་མངའ་གསོལ་བར་འགྱུར་རོ་ཞེས་གསུངས་ལ། རྡོ་རྗེའི་སེང་ཆེན་རྒྱལ་པོ་ལ་བརྟེན་པའི་རྟེན་འབྲེལ་རླུང་རྟ་བསྐྱེད་པའི་ཆོ་ག རླུང་རྟ་ལིང་ཚེ་དགུ་པ་ལ་བརྟེན་ནས་གེ་སར་གསོལ་འདེབས་སོགས་མང་པོ་ཞིག་འདོན་རྒྱུ་ཡོད་ལ། ཡང་སྡེ་དགེའི་རྫོགས་ཆེན་དགོན་པའི་ཐུབ་བསྟན་ཆོས་ཀྱི་རྡོ་རྗེ་ལ་གླིང་གེ་སར་གྱི་དག་སྣང་མང་པོ་ཞིག་ཤར་ནས་རྫོགས་ཆེན་གྱི་འཆམ་རྒྱག་སྐབས་སྤྱན་འདྲེན་དུས་སུ་ཆེད་དུ་དགྲ་ལྷ་ཝེར་མ་བཅུ་གསུམ་གྱི་ལྷའི་གཙོ་བོ་རླུང་རྟ་སྡེ་བཞི་འཆམ་སྲོལ་བྱུང་ཡོད། སྔོན་ཆད་རྟ་མདོག་དེ་སྔོན་པོ་ཞིག་ཡིན་ནའང་། གླིང་གི་རྟ་བརྒྱུགས་ལ་རྒྱལ་ཁ་ཐོབ་རྗེས་རླུང་རྟའི་དཀྱིལ་གྱི་རྟའི་མདོག་རྐྱང་ངུ་ཞིག་དགོས་ཞེས་སྤྱི་དཔོན་རོང་ཚ་ཁྲ་རྒན་གྱིས་ཐག་བཅད་པ་རེད་ཅེས་གནའ་མི་རྒན་པོ་ཚོས་བཤད།
རླུང་རྟ་དང་ཁོར་ཡུག་སྲུང་སྐྱོབ་བར་གྱི་འབྲེལ་བ།
དེ་ཡང་བོད་ཀྱི་རི་བསང་རླུང་རྟ་བྱ་རྒྱུའི་གཙོ་བོ་དོན་མཚོན་བྱེད་བརྡ་རྟགས་ཀྱི་གནད་འགག་མཐར་ཐུག་ས་ནི། སྤྱིར་མི་དང་མིའི་བར་དང་། མི་དང་ཁོར་ཡུག་གི་བར། མི་དང་རི་སྐྱེས་སྲོག་ཆགས་ཀྱི་བར། རྒྱལ་ཁབ་དང་རྒྱལ་ཁབ་ཀྱི་བར། ཆོས་ལུགས་དང་ཆོས་ལུགས་ཀྱི་བར། ཆོས་དང་འཇིག་རྟེན་གྱི་བར། འབྱུང་བ་དང་འབྱུང་བའི་བར་སོགས་ལ་ཆ་སྙོམས། མཐུན་སྦྱོར། འཆམ་མཐུན་བྱ་རྒྱུ་ཤིན་ཏུ་གལ་ཆེ་བ་ཡིན་ལ། དོན་དེའི་ངོ་སྤྲོད་ཀྱི་དཔེར་བརྗོད་གོ་སླ་མོ་ཞིག་བཞག་ན། མི་ཞིག་ལ་མཚོན་ན། ཐོག་མར་ཕ་མའི་ཁུ་ཁྲག་གི་འབྱུང་བ་རྣམས་འདུས་ནས་འཛམ་གླིང་སྟེང་དུ་ཐོག་མར་སྐྱེས་ནས་གོམ་པ་དང་པོ་སྤོས་པ་རེད། དེ་ནས་ས་ཆུ་མེ་རླུང་ནམ་མཁའ་བཅས་ཀྱིས་སྙོར་སྐྱོང་བྱས་པ་ལས་ནར་སོན། རྗེས་སུ་རིམ་བཞིན་འབྱུང་བ་རྣམས་སྙོམ་པ་ལས་སེམས་ལ་དགའ་སྐྱིད་དང་ཟས་ལ་བྲོ་བ་མངར་སྐྱུར་ཚ་གསུམ་སོགས་ཀྱིས་ཚོར་བ་སྣ་ཚོགས་མྱོང་བ་དང་། འབྱུང་བ་ཆ་མ་སྙོམས་པ་ལས་མི་ལ་སྐྱེ་རྒ་ན་འཆི་བཞིའི་སྡུག་བསྔལ་གྱི་ཆུ་བོ་ཆེན་པོ་རྣམས་འབྱུང་བས་མ་ཚད་ཟས་ལའང་བྲོ་བ་སྣ་ཚོགས་ཤིག་འབྱུང་སྲིད་པ་ཡིན་ཞིང་། དེ་བཞིན་དུ་སྐྱེ་དངོས་རྣམས་ལ་མཚོན་ནའང་། འབྱུང་བ་རྣམས་འཕྲོད་པ་ལས་ཤིང་སོགས་ཀྱི་ཡལ་ག་དང་ལོ་མ་རྣམས་རྒྱས་པ་དང་། འབྱུང་བ་རྣམས་མ་འཕྲད་ན་ཤིང་སྡོང་དང་རྩི་ཤིང་རྣམས་སྐམ་རུལ་དུ་གྱུར་ནས་མེད་པར་འགྱུར་འགྲོ་བ་དཔེར་ན། སའི་གོ་ལ་རིལ་བོ་འདི་ལ་ཆ་མཚོན་ནའང་མིའི་ལུས་པོ་ལྟ་བུ་ཞིག་ཡིན་ཏེ། དཔེར་ན་འཛམ་གླིང་གི་ས་གཞི་ནི་མིའི་ལུས་ལྟ་བུ་དང་། དེ་བཞིན་དུ་ཆུ་ཁྲག་དང་། རླུང་དབུགས། མེ་དྲོད། ནམ་མཁའ་ཁོར་ཡུག །སྐྱེ་དངོས་རྣམས་གྱོན་པ། གཏེར་ཁའི་རིགས་རྣམས་དོན་ལྔ་སྣོད་དྲུག་ལྟ་བུ་ཡིན་པས་རང་བྱུང་ཁམས་ལ་གནོད་པ་གཏན་ནས་བྱེད་མི་རུང་། གཞན་མི་དང་སྲོག་ཆགས་སོགས་སའི་གོ་ལའི་ཕྲུ་གུ་ལྟ་བུ་ཡིན་པས། ཕྲུ་གུས་ཕ་མ་ལ་གནོད་སྐྱེལ་མི་ཉན་པ་ནང་བཞིན་དུ། འཇིག་རྟེན་གྱི་རང་བྱུང་ཁམས་ཀྱི་ས་གཞི་དང་སྤང་རི། བྲག་རི། རྫ་རི་སོགས་དང་། དེ་བཞིན་དུ་མཚོ་དང་མཚེའུ། རྒྱ་མཚོ། ཆུ་མིག །ཆུ་ཆུང་ཆུང་དང་། ཆུ་ཆེན་རྣམས་ལ་དོང་རྒྱ་ཆེན་པོ་བརྐོ་མི་ཉན། གཏེར་ཁའི་རིགས་རྣམས་ཀྱང་མང་པོ་རྐོ་མི་ཉན། ཁྱད་པར་དུ་གནས་རི་ལ་གཏོར་གཤིག་གཏན་ནས་བྱེད་མི་ཆོག །གལ་སྲིད་གཏམ་དེ་དག་རྣ་བས་མ་ཉན་ནས་རང་བྱུང་ཁམས་ལ་མི་སུ་དང་སུས་གནོད་འཚེ་མུ་མཐུད་ནས་བྱས་ན་ཅི་འདྲ་ཞིག་འོང་རྒྱུ་རེད་ཅེ་ན། དེ་ནི་རླུང་གི་འཇིགས་པ་དང་། སའི་འཇིགས་པ། ཆུའི་འཇིགས་པ། མུ་གེའི་འཇིགས་པ། ནད་རིགས་སྣ་ཚོགས་ཀྱི་འཇིགས་པ། གནམ་གཤིས་ལ་འགྱུར་ལྡོག་མང་པོ་འོང་རྒྱུ་ཡིན་པར་མ་ཚད། མཐར་རང་གཞན་སེམས་
རླུང་རྟའི་དབྱེ་བ་དང་ཁྱད་ཆོས་འགའ།
ཅན་ཐམས་ཅད་འདུག་ན་འདུག་མི་བདེ་བ་དང་འགྲོ་ན་འགྲོ་མི་བདེ་བ་ཞིག་འོང་རྒྱུའི་ཉེན་ཁ་ཤིན་ཏུ་ཆེ་བས། གོང་ཞུས་ཀྱི་དོན་གནད་རྣམས་ལ་རྒྱལ་ཕྱི་ནང་གི་མཁས་པ་དང་ཆེད་རམས་པ་ཚོས་བསམ་གཞིག་ནན་ཏན་རེ་མཛད་རྒྱུ་བཀའ་དྲིན་མ་ཆུང་རོགས་ཞུ་ཞུ།
དེ་ཡང་རླུང་རྟའི་དབྱེ་བ་ནི་རླུང་རྟ་འཕེལ་རྒྱས་ཆེན་པོ་སོང་ནས་ནང་དོན་ཁག་གཉིས་སུ་ཕྱེས་ཡོད་པ་གཤམ་གསལ།
（༡）རླུང་རྟའི་དར་ལྕོག་གི་སྟེང་དུ་ཆོས་ལུགས་ཀྱི་འདོན་ཆ། རྒྱལ་མཚན་རྩེ་མོ་དང་། རྒྱལ་མཚན་རྩེ་མོའི་དཔུང་རྒྱན། གཟུངས་སྔགས་འདྲ་མིན་སྣ་ཚོགས་དང་སྒྲོལ་མ། བསམ་ལྷུན། བར་ཆད་ལམ་སེལ། གདུགས་དཀར་སོགས་དཔར་ནས་བཏགས་རྒྱུའི་རིགས་རྣམས་ལ་དེང་སང་རླུང་རྟ་ཞེས་འབོད་བཞིན་ཡོད་དོ།།
（༢）ཡང་རིགས་གཅིག་ནི་ཇོ་དར་ཞེས་པའི་ཐོག་ཏུ་རྒྱལ་མཚན་རྩེ་མོ་དང་རྒྱལ་མཚན་རྩེ་མོའི་དཔུང་རྒྱན། ཟོར་རླུང་རྣམས་ཕར་ཕུད་རྗེས། གཞན་གཟུངས་སྔགས་དང་སྒྲོལ་མ། བསམ་ལྷུན། བར་ཆད་ལམ་སེལ། གདུགས་དཀར་སོགས་རླུང་རྟ་དང་ཕལ་ཆེར་འདྲ་མཚུངས་ཡིན་ཞིང་། གཞན་རླུང་རྟའི་རི་མོ་རྣམས་ཇོ་དར་སྟེང་དུ་འབྲི་སྲོལ་མེད་པ་ཙམ་ཡིན་ལ། རླུང་རྟ་ནི་གནམ་ལོ་གསར་བ་དང་རྟ་རྒྱུག་རི་བསང་སོགས་ཀྱི་སྐབས་སུའམ་གཙོ་བོ་སྤྲོ་སྐྱིད་བྱེད་སྐབས་བེད་སྤྱོད་གཏང་རྒྱུ་ཡིན་ལ། ཇོ་དར་ནི་མི་ཤི་བ་དང་ན་བ། ནད་ཀྱིས་ཤིན་ཏུ་མནར་བ་སོགས་སྡུག་བསྔལ་སྣ་ཚོགས་འོང་དུས་བེད་སྤྱོད་གཙོ་བོ་གཏོང་བཞིན་ཡོད། གཞན་ཡང་དེང་སང་རླུང་རྟའི་སྟེང་དུ་བཀྲ་ཤིས་རྟགས་བརྒྱད་སོགས་རི་མོ་མང་པོ་ཞིག་འབྲི་སྲོལ་དར་ཡོད།
རླུང་རྟ་ནི་རྒྱལ་ཕྱི་ནང་གི་རྒྱལ་ཁབ་མི་འདྲ་བ་དང་མི་རིགས་མི་འདྲ་བའི་མཁས་པ་མང་པོ་ཞིག་གིས་བེད་སྤྱོད་བཏང་དང་གཏོང་བཞིན་ཡོད་པ་ལ་ཁོ་བོས་བརྟགས་ན། དེ་ཡང་སྤྱིར་ཚན་རིག་གི་ངོས་ནས་བཤད་ནའང་འབྱུང་བ་ལྔ་ལ་མ་བརྟེན་ནས་ཚན་རིག་ཅིག་མི་སུ་ལ་ཡང་བཤད་རྒྱུ་མེད་པས་ཚན་རིག་གི་འབྱུང་སའི་གཞིའམ་རྩ་བ་ནི་རླུང་རྟའི་རི་མོ་འདི་རྣམས་ཡིན་ལ། རླུང་རྟའི་ཐང་གའི་རི་མོའི་ནང་དོན་གཙོ་བོ་ནི་འབྱུང་བ་ལྔ་མཚོན་བྱེད་ཡིན།
གཞན་ཡང་དེང་སང་རླུང་རྟ་དང་དར་ལྕོག་གང་རུང་གི་ངོར་སངས་རྒྱས་བྱང་སེམས་ཀྱི་སྐུ་གཟུགས་དང་། མཆོད་རྟེན་སོགས་དཔར་ཡོད་པ་ནི་རྒྱུ་མཚན་མི་འདུག་པར་བླུན་པོས་བླུན་ལས་བྱས་པ་ཉག་གཅིག་རེད་སྙམ།
རླུང་རྟའི་ཁྱད་ཆོས་ནི། མི་རིགས་ཀྱི་རང་བཞིན་དང་། སྲོལ་རྒྱུན་གྱི་རང་བཞིན། སྒྱུ་རྩལ་གྱི་རང་བཞིན། སྤྱི་ཚོགས་བདེ་འཇགས་ཀྱི་རང་བཞིན། འཆམ་མཐུན་གྱི་རང་བཞིན། རྒྱུ་འབྲས་ཀྱི་རང་བཞིན། ཆོས་ལུགས་ཀྱི་རང་བཞིན། སྤྱི་ཚོགས་ཀྱི་རང་བཞིན། རྒྱལ་སྤྱིའི་རང་བཞིན། སློབ་གསོའི་རང་བཞིན། འཕྲོད་བསྟེན་གྱི་རང་བཞིན་སོགས་ཁྱད་ཆོས་དུ་མ་ཞིག་ལྡན་པ་ཡིན་ནོ།། ( མུ་འགོད།)