国内统一刊号:CN51-0018-Z 中共甘孜州委机关报·甘孜日报社出版凝聚正能量·传播好声音






སྟོན་དུས་གྱི་ཕ་ཡུལ་རྩྭ་ཐང་།

ཡིད་འོང་སྟོན་ཟླའི་མཛེས་པ།།

མ་བྲིས་གསེར་གྱི་ཐང་ག།

མཛེས་སྡུག་ཕ་ཡུལ་རྩྭ་ཐང་།།

ཡིད་འོང་སུམ་རྩེན་འཕོས་འདྲ།།

ནམ་མཁའ་གཡུ་ཡི་མེ་ལོང་།།

སྤྲིན་དཀར་ཚོམ་བུར་བཀོད་པ།།

སྐར་མའི་མཛེས་སྡུག་ཁྲོད་ནས།།

ཟླ་བའི་ལང་ཚོ་བརྗིད་པ།།

གསེར་སྐུ་ཐང་ལ་བཞེངས་འདྲ།།

སྟོན་མཇུག་རི་བོའི་ཁ་མདོག།

སྤྲིན་དཀར་མགུལ་དུ་བརྒྱན་པའི།།

ཅི་འདྲའི་བརྗིད་ཉམས་ཆེ་བ།།

སྔོ་ལྗང་དྭངས་པའི་མཚོ་མོ།།

གཡུ་ཡི་མེ་ལོང་འཕྱིས་འདྲ།།

ཁྲུང་ཁྲུང་གར་ལ་རྩེན་བཞིན།།

ངང་པ་ཁྱོ་ཤུག་རྒྱུ་བ།།

ལོ་མ་སེར་མདོག་གྱུར་ནས།།

ལྗོན་པའི་འབྲས་བུའི་དུད་པ།།

ལྷ་ཤིང་ཤུག་པའི་རྩེ་ནས།།

བྱིའུ་ཆུང་གསུང་སྐད་སྙན་པ།།

སྨུག་ཆར་ཟིམ་ཟིམ་ཁྲོད་ནས།།

རི་དྭགས་ཤྭ་གནའ་རྩེན་པས།།

ཕ་ཡུལ་རྩྭ་ཐང་གཞུང་ལ།།

གསེར་མདོག་ལང་ཚོ་ལྡན་པ།།

༼ རྡོ་རྗེ་ཐར་ལམ། ༽