ཡིད་འོང་གི་དུས་ཚོད་དེ་དག་ཕར་འགྲོ་ཚུར་འོང་མང་བས་སྙིང་ལ་འདིའོ་ཞེས་གཟུང་རྒྱུ་ཞིག་དཀའ་བའི་ཚད་དུ་གྱུར། སྐབས་རེ་སྙིང་ནས་དྲན་ཐབས་མེད་པའི་རྒྱང་རིང་གི་གཟུགས་དེ་ཡང་གློ་བུར་དུ་སེམས་ངོགས་སུ་ཤར་ཡོང་། སྔོན་ལས་ཀྱི་བཀོད་པ་འོག་ཏུ་ན་ཚོད་དང་མཐུན་པའི་སྣང་བ་ནི་འཇིག་རྟེན་དུ་ཆེས་བླ་ན་མཐོ་བའི་མཛེས་པ་ཞིག་ཏུ་རློམ། ཉིན་འདི་དག་ལ་ཉི་འོད་ཀྱི་ཚ་གདུང་འོག་ནས་ཚེ་སྲོག་ལ་གཅེས་སྤྲས་བྱེད་ཐབས་ཀྱིས་གསོན། ཡིན་ཡང་། མིག་ལམ་དུ་མངོན་ཞིང་ཡིད་གཞུང་དུ་འཁོར་བ་ནི་ཟླ་བ་བརྒྱད་པ། སྟོན་ཟླ་བརྒྱད་པ་ནི་དུས་ཀྱི་བྱེ་བྲག་སྟེ་ནམ་ཟླ་དམིགས་བསལ་ཞིག་ཏུ་འཁུམས། མཐོང་བར་མཛེས་པ་སྤྲས་ཤིང་ཐོས་པར་ཡིད་འོང་འདྲེན་པའི་ཉིན་ཞག་བསགས་པའི་ཟླ་བ་ཞིག་ཀྱང་ཡིན།
ཡིད་འགྱུར་རིང་དུ་སྲིང་བའི་མི་ཚོགས་སུ་སྣང་བ་འདྲ་མིན་འཁྱེར་མཁན་ཤིན་ཏུ་མང་མོད། དེ་དག་ཀྱང་བསམ་མནོའི་གཞུང་དུ་ཉར་བཞིན་བསམ་གཞིག་ཡང་ཡང་བྱེད་མཁན་གཅིག་པ་ཡིན་པའི་ངེས་གཏན་ག་ལ་ཡོད། ད་ལྟའི་མི་སེམས་ནི་འགྱུར་སྐྱེན་པའི་དུས་ཚོད་དང་འགྲོག་རྒྱུ་ལ་ཧ་ཅང་འཆུམས། གལ་ཏེ་སྟེགས་བུའི་སྟེང་གི་འཁྲབ་སྟོན་པ་བཞིན་རྣམ་འགྱུར་རེ་རེ་ངོམས་ནས་མི་སེམས་བསླུ་རྒྱུ་ལ་བརྩོན་ན་ང་ཡང་དེའི་གསེང་གི་འཁྲུལ་ཤེས་རྡོལ་བའི་ལྟད་མོ་བ་ཞིག་མིན་པར་རང་ཉིད་ལ་ལྐོག་ཏུ་གྱུར། དེ་ལྟ་བུའི་འདང་ཞེན་ཁྱེར་ནས་མི་ཡུལ་གྱི་མཛེས་སྡུག་དང་ཡིད་འོང་དག་ལ་ཡང་ཅིས་ཀྱང་མྱོང་རོལ་མ་བྱེད་ཐུ་མེད་དུ་བསམ། མཛེས་སྡུག་ཀྱང་འདི་ཞེས་བརྗོད་བྱའི་དཀྱིལ་དུ་མངོན་པ་ནི་ཟླ་བ་བརྒྱད་པ་ལས་རྙེད་ཐབས་མ་བྱུང་། དེ་ནི་རང་ཉིད་མཐོང་རྒྱ་དོག་པས་ཡིན་སྲིད་ཅེས་རང་བློ་རུ་ཤར་མར་འཆར།
ལྟོས་བཅས་དང་འཆར་གཞི་དུ་མའི་རྗེས་ཀྱི་ལང་ཚོ་ནི་གཞན་གྱིས་དོ་ཟླ་དཀོན་པའི་མཚར་སྡུག་ཅིག་ལ་དཔེར་བླངས། མཐོང་བ་ལ་མཛེས་པ་འཁུམ་པའི་བདག་གི་རྣམ་ཤེས་འདི་ཡུན་རིང་གི་འཆུམས་པ་ལ་ཉུལ་རྗེས་འབྲལ་ཡུན་རིང་བའི་ལོ་ཟླ་ཞིག་དང་འཕྲད། དེའི་ཉམས་འགྱུར་དང་མཛེས་སྡུག་མིག་ཏུ་མངོན་པར་རྒྱུག་པའི་མཐར་བདག་སེམས་ལ་སླར་ཡང་དང་བ་འདྲེན། དེ་ལྟར་བསམ་བཞིན་པའི་དུས་ང་ནི་ནམ་ཡང་འབྲལ་མི་འདོད་པའི་འཚོ་བ་དང་གཏན་དུ་འགྲོགས་ན་འདོད་པའི་དུས་ཚིགས་ཤིག་ལ་འདང་བརྩེ་ལུས། གཞན་ཅི་ཡང་མིན་ཏེ་དེའི་ཉམས་འགྱུར་དང་རང་བཞིན་ལ་དགའ་བས་ཡིན།
མཐའ་མེད་པའི་གཏན་ཚིགས་ཀྱིས་ཅི་ཞིག་འཚོལ་ཐབས་ལ་འབད་རུང་འཚོ་བའི་རང་མདངས་ལས་རང་ཉིད་ཀྱི་བདེ་སྐྱིད་བཙལ།
གཏིང་བྲལ་བའི་འཇིག་རྟེན་ལས་ན་ཚོད་ཀྱི་གོ་རིམ་དང་མཐུན་པའི་ལང་ཚོ་ཡོད་ཚད་ལོངས་སུ་སྤྱོད་ཐུབ་པའི་རེ་སྙེག་བགྱིད།
འདི་ལྟར་བསམ་ཞིང་དེ་ལྟར་དྲན་པའི་རྗེས་སུ་ལོ་ཟླ་བའི་མཛེས་ཉམས་ལ་སེམས་པ་འདྲེས་ནས་སྟོན་ཟླ་བརྒྱད་པའི་མཛེས་པ་མིག་དང་ཡིད་ཀྱི་དགའ་སྟོན་དུ་བྱེད་དོ། །
༼ ཁམས་འོད་གསལ། ༽