སྟོན་མཇུག་འདིར། རྒྱང་རིང་རྒྱང་རིང་གི་གནམ་སའི་མཐའ་མཚམས་ཀྱི་སྤྲིན་པ་དཀར་ནག་གི་ཕོན་པོ། བར་སྣང་ལ་སྲོད་དུས་ཀྱི་དུས་ཚོད་སླེབས་པའི་གཞུག་གི་མུན་པ་ནག་པོ་སོལ་བ་འདྲ་བའི་མདོག་བཞིན་གྱུར་ཅིང་། ཁོ་བོའི་ཐོས་འཛིན་རྣ་ཅོག་འདིའི་ནང་ལ་མུན་པ་ཚེས་པའི་དུས་དང་མཉམ་དུ་འཛུལ་འོངས་བ་ཞིག་ཡོད་པ། བྱད་བཞིན་དང་ཕྱག་མཛུབ། སྐུའི་ན་བཟའ་དང་མིག་གི་ཀེམ་ཀེམ། ཡོད་ཚད་མུན་པ་ནག་པོ་སོལ་བ་འདྲ་བས་གཡོགས་པའི་བུ་མོ་གཞོན་ནུ་མ་ཞིག་གིས་མཚན་མོའི་དུས་སུ་བར་སྣང་ལས་སྤྲིན་པ། ཤར་ནུབ་ལྷོ་བྱང་། མཐའ་དབུས་མཚམས་བརྒྱད་ལ་བསྐྱོད་དོ་ཞེས་བཤད་འོངས་བ་དེའོ།། འཇིག་རྟེན་དཀར་ངོགས་འདིའི་ཆེས་སྐྲག་པའི་དུས་ཚོད། མུན་པ་ནག་པོ་སོལ་བ་འདྲ་བ་འཇིག་རྟེན་དཀར་ངོགས་ལ་འཇབ་ནས་འོངས་ཏེ། ཤེས་མེད་ཚོར་མེད་ངང་ས་གཞི་དང་བར་སྣང་ཐམས་ཅད་ནག་པོར་གྱུར་པ་འདི་ཀ་ཡིན་ནོ།། ཆེས་སྐྲག་སྣང་མོད་པའི་དུས་ཚོད་རིང་པོ་དེའི་ནང་། ཁོ་བོའི་མིག་གི་ཡུལ་ལ་གསལ་གསལ་རྗེན་རྗེན་དུ་གྱུར་ཐུབ་པ་ཞིག་ཡོད་པ། མུན་པ་ནག་པོ་སོལ་བ་འདྲ་བ་དེ་ལས་ཁྱབ་པའི་བར་སྣང་གི་སྐར་མ་སིམ་སིམ་གཡོ་བ་དེ་ཡིན། ཆེས་སྐྲག་སྣང་མོད་པའི་དུས་ཚོད་ནག་པོ་དེའི་ནང་ལ་དགུང་ཞག་སྐར་མ་སིམ་སིམ་ངང་གཡོ་བྱུང་། རྐང་པའི་འོག་ཏུ་ཡོད་པའི་ས་དང་མིག་གི་ཡུལ་རྣམས་གཅིག་དང་གཉིས་སུ་མེད་པར་ནག་པོར་འགྱུར་པའི་སྐབས་འདིར། སྲོད་དུས་ནས་འགུལ་ཙམ་མ་བྱས་པར་ཁོ་བོ་སྡོད་སའི་དེའུ་འབུར་འདི་རུ་མཆེད་པའི་གཟུགས་མེད་པའི་ཤིན་ཏུ་སྙན་པའི་སྐད་གདངས་དེ་ལས་སྐར་མ་སིམ་སིམ། ཁོ་བོས་མུན་པ་ལས་ཅི་ཡང་མི་མཐོང་པའི་མཚན་མོ་ཞིག་གི་རྒྱང་རིང་དགུང་གི་སྐར་མ་སིམ་སིམ་མཐོང་བྱུང་། ཆེས་སྐྲག་པའི་མུན་པའི་འོག་ནས་སྐར་མ་སིམ་སིམ་གཅིག་ལས་དགུང་གི་སྐར་མ་ཁྲི་མཇལ་འབུམ་མཇལ། ནང་སེམས་འདིའི་སྐྲག་སྣང་དང་སྐྱོ་སྣང་། བར་སྣང་སྟོང་པའི་མཁའ་རུ་དེངས། འདི་ལྟར་མུན་ནག་སོལ་བ་འདྲ་བས་ཀུན་ཏུ་ཁྱབ་པའི་དགུང་ལ་སྐར་མ་སིམ་སིམ་ལམ་ལམ་ལ་བཀྲ་བ། དེ་མཐོང་དེ་ཡི་ཚུལ་ལས་ཁོ་བོས་ཁྱེད་ཉིད་དྲན་ཞིང་། ཁོ་བོས་མགྲིན་པ་ཡར་ལ་བཀྱགས་ནས་ཁྱོད་ལ་འདི་ལྟར་ཞུ་འདོད་སྐྱེས། ཁྱོད་ཉིད་བདག་གི་མཚན་མོའི་སྐར་མ་བྱོས། ཁོ་བོས་ཁྱོད་ཀྱི་ཀེམ་ཀེམ་གཡོ་བའི་སྤྱན་ལ་ལྟ། ཁྱོད་ཀྱི་མཛེས་སྡུག་སིམ་སིམ་ལེ་དེ་ལའང་ལྟ། ཡུན་ཐུང་མི་ཚེའི་དུས་ཚོད་ཐུང་ངུའི་འདིའི་ནང་། ཁོ་བོ་ཁྱོད་དང་འདྲིས་སྣང་བྱུང་བའི་སྣང་བ་འགོག་མེད་དེའི་དབང་ལས། ཁྱོད་ཉིད་བདག་གི་མཚན་མོའི་སྐར་མ་བྱོས་ཞེས་མུན་ནག་སོལ་བ་འདྲ་བས་འཇབ་རྒོལ་ཐེབས་པའི་ཆེས་ནག་པའི་དུས་ཚོད་ཅིག་གི་སྐབས་ལ་ཞུས་མྱོང་། ཡང་གཅིག་ཞུ་ན། སྐྱེ་བ་ད་རེས་ཁྱོད་ཉིད་འཇིག་རྟེན་དཀར་ངོགས་འདི་རུ་འཁྲུངས་ཤིང་། ཁོ་བོའང་ཁྱོད་དང་དུས་མཉམ་བྱུང་བའི་བསྐལ་བ་རྙེད། ཁོ་བོ་ཁྱོད་དང་དུས་མཉམ་གྱི་བསྐལ་བ་རྙེད་པ་ལ་རབ་ཏུ་དགའ་ཞིང་། ཁོ་བོའི་དགའ་སྐྱོ་དང་སྐྱིད་སྡུག་གི་འཕེལ་འགྲིབ་དེ་ལྟར་དེ་ལྟར་བརྗོད་པའི་ཡིག་གཟུགས་གཞན་ངོ་བཞག་པའི་ཐ་སྙད་དུ་བཞག་པ་འདི་དག ། དཀོར་དང་རྔན་པ་ལ་སྲེད་པའི་མིག་ལ་ལམ་གྱི་བཞི་མདོའི་འཇག་རྩྭ་དང་མཉམ་དུ་རུལ་བཞིན་ཡོད་པའི་ཁྱི་རོ་ཞིག་ཅི་ལ་མིན། དེའི་ཕྱིར། ཚོར་བའི་སྐྱིད་སྡུག་གི་བཞུ་འདུལ་དང་བཙོ་སྦྱང་བྱས་པའི་ཐ་སྙད་འདི་དག་ལ། སེམས་པ་དཀར་ཞིང་། ནང་སེམས་གླན་མཁན་རང་ལས་མི་རྙེད་ཅིང་། གལ་ཏེ། ཁོ་བོས་རང་ཉིད་ཇི་བཞིན་རང་གི་ཐ་སྙད་དག་ལ་སེམས་པ་གླན་མཁན་ཞིག་རྙེད་ན། ཁོ་བོའི་དགའ་སྐྱོ་ཆགས་སྡང་དང་། འཕེལ་འགྲིབ་ཀྱི་སྐྱིད་རེས་སྡུག་རེས་ལ་ཤ་ཚ་ཞིང་། སྙིང་ཉེ་ཉེ་དང་གཅེས་མཁན་ཅིག་ཡིན་ཕྱིར། ཁོ་བོས་ཅིས་ཀྱང་དེ་ཉིད་གཅེས་པར་བྱ་ཞིང་། དེ་ཉིད་ཁོ་བོས་དཔྲལ་བའི་མིག་དང་ཁོག་པའི་སྙིང་ལ་གླན་པ་ཡིན། འོ་ན། ཁྱོད་ཉིད་ཁོ་བོའི་དཔྲལ་བའི་མིག་དང་ཁོག་པའི་སྙིང་ཆུང་ཡིན་ཏེ། ཁྱོད་ཉིད་ཁོ་བོའི་འཕེལ་འགྲིབ་ཀྱི་སྐྱིད་རེས་སྡུག་རེས་ལ་བློང་བློང་ཆེ་ཞིང་། ཁྱོད་ཉིད་ཁོ་བོའི་ཤྭ་བའི་རྭ་ཅོ་འདྲ་བའི་ཐ་སྙད་ཀྱི་ཁྱུ་འདི་རིན་ཆེན་ནོམ་ལ་འཛིན་མཁན་ཡིན། ད་དུང་། ཁོ་བོས་ཡང་ཡང་བརྗེད་དུ་མེད་པ། ཟླ་བ་འདི་ཡི་གོང་། ཁོ་བོས་ཉར་ཚགས་བྱས་པའི་སྐྱིད་རེས་སྡུག་རེས་དང་། དགའ་སྐྱོ་འདྲེས་མའི་ཐ་སྙད་ཀྱི་ཡིག་ཆུང་འདི་དག་བོར་ཏེ། མྱ་ངམ་ཐང་ལ་རྐང་རྗེན་དུ་འདར་ཞིང་། ཡིད་སེམས་རབ་ཏུ་སྐྱོ་བའི་དུས། ཁོ་བོའི་ཡིག་ཆུང་སྙིང་གི་དུམ་བུའམ་སྦྲམ་བུ་ལ། ཁོ་བོ་ལས་ལྷག་པའི་ཁྱོད་ཀྱིས་ཉར་ཚགས་བྱས་ཏེ། སྐྱོ་བས་མྱོས་པའི་ཁོ་བོ་ལ་ནོར་རྙིང་བདག་པོའི་ཕྱག་ལ་སྤྲད་པ་བཞིན་དུ་བྱས་པ་དེ་དྲན། ཁྱོད་ཉིད་ཁོ་བོའི་དཔྲལ་བའི་མིག་དང་ཁོག་པའི་སྙིང་ཆུང་ཡིན། ཁྱོད་ཉིད་བདག་གི་མཚན་མོའི་སྐར་མ་བྱོས། སྟོན་མཇུག་འདིར་ཁོ་བོའི་ཡིད་ལ་ཡང་ཡང་ཁྱོད་འཁོར།

༼ ཆོས་འབྱོར་རྒྱ་མཚོ། ༽