ཞིན་ཧྭ་གསར་འགྱུར་ཁང་པེ་ཅིང་ནས་ཟླ9ཚེས3ཉིན་གློག་འཕྲིན་འབྱོར་གསལ། སྐད་གསང་མཐོན་པོས་རྒྱལ་ཁའི་གླུ་དབྱངས་ལེན། སྒེག་ཉམས་ཞབས་བྲོས་དྲང་བདེན་སྟོབས་ཤུགས་མངོན། ཀྲུང་གོ་མི་དམངས་ཀྱི་རི་འགོག་དམག་འཁྲུག་དང་འཛམ་གླིང་གི་ཧྥ་ཤི་སིར་ངོ་རྒོལ་བྱེད་པའི་དམག་འཁྲུག་ལ་རྒྱལ་ཁ་ཐོབ་ནས་ལོ་ངོ80འཁོར་བར་དྲན་གསོ་ཞུ་བའི་རིག་རྩལ་མཚན་ཚོགས《དྲང་བདེན་རྒྱལ་ངེས》ཞེས་པ་ཚེས3ཉིན་གྱི་དགོང་མོར་པེ་ཅིང་མི་དམངས་ཚོགས་ཁང་ཆེ་མོར་གཟབ་རྒྱས་ངང་འཚོགས་པ་རེད། ཞི་ཅིན་ཕིང་དང་། ལི་ཆང་། ཀྲའོ་ལེ་ཅི། ཝང་ཧུའུ་ཉིང་། ཚའེ་ཆི། ཏིང་ཤུའེ་ཞང་། ལི་ཞི། ཧན་ཀྲེང་སོགས་ཏང་དང་རྒྱལ་ཁབ་ཀྱི་འགོ་ཁྲིད་པས་ཀྲུང་གོ་དང་ཕྱི་རྒྱལ་གྱི་མི་སྣ6000ཙམ་དང་ལྷན་དུ་མཚན་ཚོགས་ལ་གཟིགས་ནས། གཟི་བརྗིད་ལྡན་པའི་ཉིན་མོར་ལྷན་དུ་དྲན་གསོ་ཞུས་པ་རེད།

མཚན་ཚོགས་འགོ་མ་ཚུགས་གོང་། ལོ་ཆུང་གདོང་ལེན་རུ་མིས་འཁྲབ་སྟོན་ལ་གཟིགས་པར་ཕེབས་པའི་རི་འགོག་དམག་འཁྲུག་གི་འཐབ་འཛིང་པ་རྒན་གྲས་དང་བློ་མཐུན་རྒན་གྲས་ཀྱི་འཐུས་མིར་མེ་ཏོག་ཕུལ་བ་རེད། དེ་རྗེས་འཐབ་འཛིང་པ་རྒན་གྲས་དང་བློ་མཐུན་རྒན་གྲས་ཚོ་ལོ་ཆུང་གདོང་ལེན་རུ་མིའི་འཁྲིད་རོགས་འོག་ཚོགས་ཁང་ཆེ་མོའི་ལྟད་མོ་བའི་སྡོད་སར་ཕེབས་པ་དང་། ཚོགས་ར་ཡོངས་ཀྱི་མི་རྣམས་ཡར་ལངས་ནས་སྤྲོ་སེམས་འཁོལ་པོས་དགའ་བསུ་ཞུས་ཏེ་ཁོང་ཚོར་བླ་ན་མེད་པའི་གུས་ལུགས་མཚོན་པར་བྱས་ཡོད།

ཆུ་ཚོད19དང་སྐར་མ55ཙམ་ལ་སྤྲོ་སེམས་འཁོལ་བའི་མགྲོན་བསུའི་རོལ་དབྱངས་གྲགས་པ་དང་བསྟུན་ཏེ་ཞི་ཅིན་ཕིང་སོགས་འགོ་ཁྲིད་བློ་མཐུན་ཚོགས་ཁང་ཆེ་མོར་ཕེབས་ནས་རི་འགོག་དམག་འཁྲུག་ནང་ཞུགས་མྱོང་བའི་འཐབ་འཛིང་པ་རྒན་གྲས་དང་བློ་མཐུན་རྒན་གྲས་ཚོའི་འཐུས་མིར་བྱམས་བརྩེའི་ངང་ཕྱག་བཏང་གནང་བ་རེད།

( པར་ངོས་བཞི་པར་གཟིགས།)