ཀ་དར་མདངས་འོད་འཛིན་པའི་ལྷག་བསམ་ཅན།།
ཁ་ཏ་སློབ་གསོའི་ལེགས་བཤད་སྦྲུམ་པའི་མ།།
ག་དག་གཞན་དོན་གཞོལ་བའི་བྱང་ཆུབ་སེམས།།
ང་དང་ཁྱོད་ཀྱི་གཙུག་རྒྱན་བཤེས་གཉེན་ལགས།།
ཞི་དུལ་ཚུལ་མཐུན་ལུས་ཀྱི་འཁྲི་ཤིང་རྩེར།།
ངག་འཇམ་སྨྲ་བའི་ཁུ་བྱུག་མགྲིན་དབྱངས་རྩེན།།
ཕྱོགས་མེད་མཁྱེན་རབ་གྲིབ་བསིལ་སྟུག་པོ་ཡིས།།
སྐལ་ལྡན་རྨོངས་པའི་ཚ་ཟེར་བཅོམ་མཁན་རྨད།།
དྲི་བསུང་ཟེའུ་འབྲུའི་ཁུར་གྱིས་ཡོངས་དུད་པའི།།
མ་བསྐུལ་སྦྲང་ཚོགས་འཁོར་སའི་དགའ་ཚལ་བཞིན།།
ཤེས་བྱའི་ལང་ཚོའི་དཔྱིད་ཀྱི་དཔལ་བརྟས་པའི།།
མ་བསྡུས་ཤེས་ལྡན་དྲུང་དུ་སློབ་ཚོགས་འཁོར།།
ལྷག་བསམ་རི་ལ་གཞན་དོན་གྱིས་ཕྱུག་པས།།
དབྱར་གསུམ་ཆར་ཆུ་དགུན་གསུམ་གྲང་ངར་ཁྲོད།།
དཀའ་སྡུག་སྨུག་པའི་ཡོ་ལང་རབ་རྒོད་ཀྱང་།།
མདུན་སྐྱོད་གོམ་ཁ་མ་ལྷོད་བཤེས་གཉེན་རྒྱལ།།
འཁྲུལ་མེད་རྣམ་དཔྱོད་རྩལ་ལས་ཉེར་འཁྲུངས་པའི།།
ལེགས་བཤད་སྨྲ་བའི་ལྷ་ལམ་ཡངས་པོ་རུ།།
གོལ་བའི་ཆར་སྤྲིན་གུ་ཡངས་རྒྱུ་བའི་ས།།
ཏོག་ཙམ་ཡོད་རེ་སྐན་ནོ་སྨྲ་དབང་མཆོག།
མ་གུས་རྩིང་པོའི་ཚིག་གི་ཉག་ཕྲན་མདས།།
གང་ཞིག་ཡིད་ཀྱི་འབེན་ལ་རེག་གྱུར་ཀྱང་།།
ལྡོན་པ་འཛུམ་གྱི་རླབས་ཕྲེང་གཡོ་བ་ལས།།
བྱམས་པ་ཟེགས་མའི་མུ་ཏིག་ཅི་ཡང་འཐོར།།
ལྔ་རིག་ཤེས་བྱའི་སྦྲང་ཆར་བསིལ་མ་ཡིས།།
སྐལ་ལྡན་ཡིད་ཀྱི་འཛིན་མ་བརླན་བྱས་ཏེ།།
སྔར་མེད་ཤེས་རབ་མེ་ཏོག་རབ་བཞད་པས།།
ལེགས་བྲིས་སུམ་རྩེན་དགའ་བའི་འཛིན་པ་ལྷོད།།
༼ ཨ་བཙུན་གཡུང་དྲུང་བཀྲ་ཤིས། ༽