འཁོར་བའི་རི་ལུང་བརྒལ་བའི་མི་མོ་ཁྱུས།།
གཞོན་ཆུང་སྣང་བའི་མེ་ཏོག་ལྷ་ལ་ཕུལ།།
ཐུགས་བསྐྱེད་སྨོན་ལམ་ཟབ་པའི་རྟེན་འབྱུང་གིས།།
ད་ལན་བརྩོན་པའི་རྣམ་ཐར་བརྗིད་རེ་ཆེ།།
མཚན་སྙན་དགེ་ལེགས་བཀྲ་བའི་ཞིང་ས་ནས།།
འཚེ་མེད་ཞི་བའི་རྒྱལ་བསྟན་སྐྱོང་མཛད་པའི།།
ངུར་སྨྲིག་བླ་གོས་འཆང་བའི་བཙུན་མ་དག།
མཐོང་ན་ཡིད་དགའི་གྲོང་དུ་སྤྲོ་བ་འཕེལ།།
མཐའ་ཀླས་འགྲོ་བའི་སྐྱིད་སྡུག་ལ་བསམས་ཏེ།།
དམ་ཆོས་འོ་དཀར་ཚུལ་བཞིན་བཏུང་བ་དང་།།
དམ་སྡོམ་མེ་ཏོག་མཛེས་ཚལ་ལེགས་བསྲུངས་ཏེ།།
མདོ་སྔགས་རིག་པའི་གཞུང་ལ་སེམས་པ་གླན།།
གོམ་ཆུང་དམན་པའི་ཕྱོགས་སུ་མ་ལྷུང་ཞིང་།།
ནང་སེམས་ངན་པའི་གཤིས་ཀྱིས་མ་བརྫད་པར།།
བདེན་པའི་གནས་ལུགས་འཚོལ་བའི་ཕ་ས་ནས།།
མི་ཚེའི་ལོ་ཟླ་འཛུམ་པའི་སྐལ་བཟང་བརྙས།།
སྐབས་རེ་ཀུན་རྟོག་ཟི་ར་འཚུབ་པའི་ཚེ།།
སྙན་ངག་ཆང་གི་ཆུ་ཀླུང་འཐུང་ཞོར་དུ།།
དོན་དམ་གཉུག་མའི་གཤིས་སུ་བྱ་ར་དང་།།
ཚེ་ཡི་དར་རྒུད་ལས་ཀྱི་ལམ་དུ་བསྒྱུར།།
རེ་དོགས་ཆུ་མོ་བཞུར་བའི་གྲོང་མཐའ་ནས།།
ངེས་འབྱུང་སྐྱ་རེངས་གསལ་བའི་བློ་གྲོས་སམ།།
ཕན་བདེ་ལེགས་ཚོགས་འབྱུང་བའི་གླིང་ཕྲན་དུ།།
བསོད་ནམས་དཔག་མེད་ཅིག་གིས་བསྐྱལ་འདི་མཚར།།
ཐོབ་འབྱོར་དབང་བའི་གྲགས་དཀར་བཞེས་ན་ཡང་།།
སྲོག་གི་རྒྱུ་བ་ཆད་དང་མཉམ་དུ་ཤི།
བསྐལ་བའི་རིམ་པར་རྫོགས་ཀྱང་མི་ཟད་པའི།།
རབ་བྱུང་རྟེན་འདིའི་དགེ་མཚན་སུ་ཡིས་སྨྲ།།
ཤག་ཆུང་དྲི་ངད་ལྡང་བའི་མལ་ས་ནས།།
དུས་བཞིའི་ཆོས་ཉིད་ཀློང་ན་གཟིགས་ཞོར་དུ།།
དུས་གསུམ་ལྷ་ལམ་གསལ་བའི་གླེགས་བམ་ལས།།
ལེགས་བཤད་དལ་གྱིས་བཞེས་པའི་རིགས་དག་སྐྱིད།།
གཞན་ངོ་སྲུང་བའི་གནས་ལུགས་མི་དགོས་ཤིང་།།
གཅིག་པུར་འདྲ་ཡང་གཅིག་པུར་མ་ཡིན་པའི།།
སྐྱིད་སྡུག་སེམས་ཀྱི་དཔུང་པ་བཤིབ་པའི་སྡེ།།
འདི་ཕྱིའི་ལས་སྨོན་གཙང་བའི་མི་རིགས་ཡིན།།
ལུགས་གཉིས་མེ་ལོང་སྟོན་པའི་བཤེས་གཉེན་དང་།།
ཟས་གོས་གནས་ལམ་སྤྲད་པའི་ཕ་མ་སོགས།།
དགའ་དད་བརྩེ་བའི་ཀློང་དུ་རྟག་སྦྲུམ་སྟེ།།
ཚིག་གི་ཨུ་དུམ་དྲན་པའི་རྟེན་དུ་འབུལ།།
༼ མཱ་ལིན་ནཱ། ༽