ཆུང་དུས་དཀར་མཛེས་ཐག་རིང་རྒྱང་ལ་ཡོད།།
འགྲོ་འདོད་སྙིང་ཤ་འདར་བའི་ཡུལ་དེ་ཡིན།།
འགྲོ་དུས་ལ་དང་ལུང་པ་བརྒལ་དགོས་ཡོད།།
འགྲོ་ལམ་ས་རྡོ་འཁྱགས་པས་བཟུང་ནས་ཡོད།།
འགྲོ་ཁར་དགའ་ཚོར་དཔག་མེད་སྣང་བ་ཡིས།།
མཚན་མོའི་གཉིད་ཀྱི་བདེ་བ་འཕྲོགས་ཏེ་ལུས།།
ནངས་མོའི་སྐྱ་རེངས་ཤར་དང་ལྷན་ཅིག་ཏུ།།
ལམ་ཁར་འགྲེང་ནས་རླངས་འཁོར་བསྒུག་དགོས་ཡོད།།
ལེ་བར་བརྒྱ་ཕྲག་ཅིག་གི་ཕར་ཕྱོགས་ཀྱི།།
གནས་མཆོག་དཀར་མཛེས་ཡུལ་དེ་སེམས་ལ་འཁོར།།
ཀྱག་ཀྱོག་ལམ་ཕྲན་ཅི་ཙམ་འཇིགས་ན་ཡང་།།
ཁྱོད་ལ་ཕྱོགས་པའི་སེམས་འདུན་འགྱུར་བ་མེད།།
འཁྱགས་རོམ་ཡོད་སར་མི་ཡིས་རླངས་འཁོར་འདེགས།།
རི་ལམ་ཉིལ་སར་རྐང་ཐང་བགྲོད་ན་བདེ།།
ཁ་ཆར་བུ་ཡུག་འཚུབ་དུས་ལྷག་ཏུ་དཀའ།།
དཀར་མཛེས་ཐེངས་རེ་ཆས་པ་སླ་མོ་མིན།།
དབྱར་དང་སྟོན་དུས་ལམ་འདི་ཆར་པས་བཅད།།
དགུན་དང་དཔྱིད་ལ་ལམ་འདི་འཁྱགས་པས་བསྡམས།།
བགྲོད་དཀའི་ལམ་བུ་ཇི་ལྟར་གཟར་ན་ཡང་།།
འགྲོ་བའི་འདུན་པ་ནམ་ཡང་འགོག་ཏུ་མེད།།
ལོ་ངོ་བཅུ་ཕྲག་གོང་གི་འཚོ་བ་དེ།།
ངན་ངོན་ཙམ་ཡང་དྲན་ན་དགའ་ཚོར་རེ།།
སེམས་ཀྱི་ཡང་སྙིང་ཞིང་དུ་བསྙེལ་མེད་པར།།
ད་དུང་ཡིད་ཀྱི་གཏིང་ན་གསལ་ལམ་ལམ།།
རྒྱལ་ཁྲིམས་ཞིང་ས་གཤིན་པོའི་ཐང་ཡངས་སུ།།
ཚན་རྩལ་རིག་པའི་དཔལ་གྱི་ལང་ཚོ་འབར།།
འཚོ་བའི་འཕོ་འགྱུར་སྐྱེན་པའི་རྟ་མཆོག་ཡང་།།
འདོད་པའི་ཚལ་དུ་སྐྱོད་པའི་སྐལ་བཟང་ལྡན།།
གོང་གི་ཐུགས་བཀོད་ཡངས་པོའི་ལྷ་ལམ་ནས།།
སྔོན་ཐོན་རིག་པའི་ཉི་གཞོན་རབ་གསལ་བས།།
འཚོ་བ་གསར་པའི་པད་དཀར་རྣམ་གྲོལ་ཏེ།།
ཉིང་བཅུད་ཅི་འདོད་རོལ་བའི་ཉིན་བྱེད་འཛུམ།།
ཡར་ཐོན་དབྱར་གྱི་མཚོ་མོའི་ངང་ཚུལ་རྒྱས།།
གློག་འོད་ཁྲ་ཚོམ་མེ་ཏོག་རྣམ་པར་བཀྲ།།
ཕྱོགས་སུ་རྐྱོང་བའི་ལམ་ཕྲན་སྔར་ལས་ཡངས།།
འགྲུལ་པ་བདེ་ལེགས་ངང་དུ་ཁྱིམ་ལ་ལོག།
འདི་ནས་ལེ་བར་བརྒྱ་ཡི་ཕར་ཕྱོགས་སུ།།
སུས་ཀྱང་མ་སློང་གནམ་འདེགས་ཀ་བ་ལ།།
ཤེལ་དཀར་མདངས་ཀྱིས་འཚེར་བའི་ལྷུན་པོའི་འདབས།།
ཁང་ཆེན་བཀོད་པ་མཛེས་ལ་གཙང་དག་ཞིང་།།
དཀར་མཛེས་གྲོང་ཁྱེར་སྔར་ལས་ལྷག་པར་བརྗིད།།
ཚོང་ཟོང་སྣ་མང་ལྟ་བའི་མིག་ལ་མཚར།།
ཟས་བཅུད་དྲི་བཟང་སྣོམ་བྱེད་ལྕགས་ཀྱུར་འཕོས།།
ཚོང་འདུས་མགྲོན་ཚོགས་འདུ་འགོད་སྤྲིན་ལྟར་བསྐྱོད།།
ཚངས་པའི་སྐྲ་ཉག་འཐོར་འདྲའི་སྣུམ་ལམ་ཟུར།།
རྒྱ་ལྕང་ལོ་མའི་ཚོགས་རྣམས་གུས་ཉམས་ཀྱིས།།
ཡང་ན་ངལ་བ་གསོ་བའི་བསིལ་གཡབ་སླད།།
གནས་འདིར་བྱོན་པའི་མགྲོན་རྣམས་དང་བས་བསུ།།
ལམ་འགྲམ་ཁྲི་ལྕོག་སྟེང་གི་མེ་ཏོག་ཀུན།།
འཕྲུལ་བསྒུལ་རླངས་འཁོར་བགྲོད་པར་ཞལ་ཕྱོགས་ནས།།
མ་བཅོས་འཛུམ་བག་གྲོལ་དང་སྟབས་ཅིག་ཏུ།།
བསུ་སྐྱེལ་ཡང་ཡང་གནང་ཞིང་གར་ལ་བྲེལ།།
མཚན་མོའི་སྲང་ལམ་ཉུལ་བའི་སྐྱེ་འགྲོ་ཀུན།།
གློག་སྒྲོན་ཁྲ་ཚོམ་འོག་ནས་དགའ་ལྷང་ལྷང་།།
རང་མཐུན་ཚེ་ཡི་གྲོགས་དང་ལྷན་ཅིག་ཏུ།།
སེམས་གཏམ་རེས་མོ་ལབ་ཀྱིན་ལྗོངས་རྒྱུར་འགྲོ།།
གཡས་ན་གངས་དཀར་ཤེལ་གྱི་དབལ་སོ་རྣོ།།
གཡོན་ན་སྤང་རི་གཡུ་ཡི་མནྜལ་མཛེས།།
བར་ན་མཐོང་བ་ཀུན་སྨོན་དཀར་མཛེས་ཞིང་།།
སྙན་པའི་གྲགས་པ་རྐང་གཉིས་རྣ་བའི་བཅུད།།
ཁོད་ཡངས་གནས་སུ་འཕོས་པའི་ཡུལ་འདི་ནི།།
ཕྱོགས་བཅུར་གཟེངས་པའི་རི་བོའི་དཔངས་ཚད་དེ།།
འདི་ལས་ཅུང་ཟད་ས་དབྱིབས་བབས་གྱུར་ན།།
དགུང་སྔོན་ཐང་ལ་རེག་པའི་འཕྱང་མོའང་སྐྱེས།།
གོང་གི་ཐུགས་བཀོད་འཕྲིན་ལས་གཙང་པོའི་རྒྱུན།།
ཡུལ་འདིའི་ནོར་འཛིན་ལྟེ་བར་བཞུར་གྱུར་པས།།
འགྲོ་ལ་ཕན་པའི་མཛད་བཟང་སྙིང་བཅུད་ཀྱིས།།
འདི་ལྟར་ཕུན་ཚོགས་སྡེ་བཞིའི་དཔལ་འབར་བྱུང་།།
ཨེ་མ་རྨད་དོ་དྭངས་གཙང་ཁ་བའི་ལྗོངས།།
གངས་རིའི་རང་མདངས་མི་ཉམས་བརྟན་པའི་ཞིང་།།
སྨུག་པའི་དར་གོས་ཆད་མེད་མགུལ་ཆིངས་མཛེས།།
ཡུལ་འདིའི་སྣོད་བཅུད་བཀོད་པ་རྟག་བརྟན་ཤོག།
༼ གློག་འོད།༽