སྣང་བའི་མེ་ཏོག་བཞད་པའི།།
ལ་ཁའི་སྤང་ཐང་དེ་ནས།།
ཁྱེད་ཞལ་འཛུམ་གྱི་ཟླ་བ།།
བདག་གི་མིག་ལ་ཐོགས་ཡོད།།
ན་ཚོད་གཞོན་ནུའི་ཚུལ་བྱོན།།
ཞི་བའི་སྒེག་ཉམས་ལྡན་པ།།
མྱོས་བུམ་འབུར་དུ་དོད་པ།།
ལང་ཚོའི་ཕྲ་རྒྱན་བཏགས་ཡོད།།
ལན་རེ་མཐོང་ཙམ་མིན་པར།།
རིང་ནས་མཇལ་སྐལ་བྱུང་ན།།
ད་ཡོད་མི་ཚེའི་ནང་ལ།།
དེ་བས་གང་ལ་མི་ཆགས།།
རྒྱལ་ཡུམ་ངག་གི་ལྷ་མོ།།
དྲུག་འགྱུར་པི་ཝང་ཅན་མ།།
མཚོ་འཁྲུངས་ལྷ་ཡི་མི་མོ།།
འདང་གི་དཀྱིལ་དུ་འབབ་རོགས།།
སྐུ་ལུས་མིག་ལ་མཛའ་བ།།
ཕྱག་སོར་ངག་ལ་སྙན་པ།།
སྲིད་པ་འཁོར་བའི་པང་ནས།།
ང་ཡི་ནོར་བུ་ཡིན་སོང་།།
རི་བྲག་ཕུག་པའི་གསེབ་ནས།།
ལོ་ནས་ལོ་རུ་བསྐྱལ་ཏེ།།
ཁྱེད་རང་སྒོམ་ཐག་བཅད་ན།།
ཁོ་བོའི་གྲོགས་སུ་བཞུགས་སམ།།
དམར་སེར་ན་བཟའ་གྱོན་ཏེ།།
ལག་ཏུ་མེ་ཏོག་བཏུས་ཏེ།།
ཁྱེད་ལ་དབུལ་དུ་ཕྱིན་ན།།
མཇལ་བའི་སྐུ་བསོད་ཡོད་དམ།།
འཚོ་བའི་རི་ཐང་དེ་ནས།།
ཕ་ཀི་གཙང་འགྲམ་ཞིག་ནས།།
ཟླ་བའི་ཟེར་ལ་བལྟས་ཏེ།།
སྙན་པའི་གླུ་དབྱངས་འཐེན་མྱོང་།།
ལན་རེ་ངུ་སྙིང་འདོད་མོད།།
ལན་རེ་དགོད་སྙིང་འདོད་ཀྱང་།།
མི་ཚེ་སྐྱིད་ལ་སྡུག་འདིར།།
ཁྱེད་རང་མགོན་དུ་བཞུགས་ཤོག།
༼ ཁམས་ཟླ་སྲས། ༽