འཇམ་ཐིང་ཐིང་གི་རི་གྲོང་གི་མཚན་མོ།
སྒོ་ཁྱི་གཅིག་པུས་མཐོ་སྒང་གི་མཚན་མོ་བསྲུངས་ནས་བསྡད།
སྐར་ཚོགས་ཀྱི་ཚོགས་ནི་སོ་སོའི་གསང་བ་སྦེད་ཀྱིན་ཡོད་པས།
ཟླ་བ་ཡང་སྔ་ས་ནས་གཉིད་དུ་ཡུར་ཟིན།
ཟླ་བ་གཉིད་དུ་ཡུར་ཟིན་པས་མཐོ་སྒང་གི་རི་ལུང་ན་རྫི་བོ་མེད།
འཇམ་ཐིང་ཐིང་གི་རི་གྲོང་གི་མཚན་མོ།
ནོར་གནག་ཚོས་ལྷས་རྭ་གྲུ་བཞིའི་ནང་དུ་རྭ་རྩེ་གཉིས་
གནམ་ལ་གཟེངས་ནས།
སིམ་སིམ་སིམ་ལ་ངལ་གསོས་པས།
གནག་རྫི་དང་ཆུང་འདྲིས་ནི་སྔར་ནས་གཉིད་ཟིན་ཅིང་།
རྨི་ལམ་གྱི་ཞིང་དུ་ངང་གིས་ཆས།
འོན་ཀྱང་མཐོ་སྒང་གི་རླུང་བུ་ནི།
ད་ཆ་རི་གྲོང་དུ་ཉལ་ཟིན་ནམ།
ཡང་ན་རི་གྲོང་ནས་རྒྱང་རིང་དུ་ཕྱིན་པ་ཡིན།
དེ་ནི་མཐོ་སྒང་གི་སྒོ་ཁྱི་གཅིག་པུར་གྱུར་བའི་འབྲོག་ཁྱི་
མ་གཏོགས་སུ་དང་གང་གིས་མི་ཤེས།
འཇམ་ཐིང་ཐིང་གི་རི་གྲོང་གི་མཚན་མོ།
དུས་རྟག་ཏུ་ཨ་མས་བཤད་པའི་སྙན་ལྷང་ལྷང་གི་གཏམ་
རྒྱུད་གཅིག་དང་མཚུངས།
ཆུང་བྱིས་པའི་སྐབས་སུ་རི་གྲོང་དུ་དལ་ལྷོད་ལྷོད་ངང་
མཚན་མོར་གཉིད་དུ་ཡུར་བའི་ཆུ་ཕྲན་ཞིག་ཡོད་ཟེར།
དེ་དང་ཆབས་ཅིག་ཏུ་ས་གཞི་དང་རྡོ་བ་ཡང་གཉིད་དུ་ཡུར་སྐད།
འོན་ཀྱང་བྲེལ་ཟིང་དང་འཚབ་འཚུབ་ངང་སྐྱོད་བཞིན་པ་ནི།
དུས་ཚོད་ཀྱི་སྐར་མདའ་སྤུན་གསུམ་ཡིན་པས།
ཆུང་ནས་གཅེས་པའི་བུ་ཆུང་རི་གྲོང་དང་གྱེས་ཤིང་།
རྒྱང་རིང་དུ་རྨི་ལམ་འཚོལ་དུ་སོང་།
སྔར་ནས་ད་བར་དུ་དུས་ཚོད་དག་ལ་བརྩེ་བ་དང་ཆགས་
ཞེན་གང་ཡང་ཡོད་མ་མྱོང་བས།
འཇམ་ཐིང་ཐིང་གི་རི་གྲོང་གི་མཚན་མོ་ད་ཆ་རྒས་ཟིན།
དེའི་དུས་དེ་དང་མཉམ་དུ་རྒས་བཞིན་པ་ནི།
འདམ་བག་བརྫིས་ནས་རྩེད་འཇོར་རོལ་སའི་ཕ་ཡུལ་དང་།
རི་གྲོང་དུ་ཡོད་པའི་བྱམས་བརྩེའི་ཕ་མ་ཡིན།
༼ ནག་ཤོད་ང་རོའི་འཚེར་སྒྲ། ༽