དོ་ནུབ་ཆུ་འཛིན་དཀར་པོའི་བགྲོད་ལམ་དུ།།

སྤྲིན་གྱི་འགྱུ་བ་མི་མངོན་དབྱིངས་སུ་ཐིམ།།

བདག་སེམས་ཤིན་ཏུ་འདྲེས་སའི་བླ་མའི་ཞལ།།

ཧ་ཅང་བརྩེ་བའི་ཚུལ་གྱིས་ཝ་ལེར་གསལ།།

ཧ་ལོའི་མེ་ཏོག་རྩྭ་ཐང་འཁྲིས་སུ་བཞད།།

དུང་སེམས་འདབ་མ་གཡོ་བའི་ངང་ཚུལ་སྟོན།།

མི་སེམས་ལྡུམ་རའི་ཚལ་གྱི་མེ་ཏོག་དེའི།།

འདས་སོང་བརྩེ་བའི་སྣང་བརྙན་ཡིད་ལ་བསླངས།།

མཛའ་བརྩེའི་རྨུ་ཐག་སྦྲེལ་བའི་ངང་ཆུང་གཉིས།།

ཤིན་ཏུ་བརྩེ་བའི་སེམས་འདུན་དྭངས་མོ་ཡིས།།

ལྗང་མདོག་མཚོ་མོའི་རྦ་རླབས་བརྩེ་བས་བསྐྱོམས།།

འདི་ཡི་གཏམ་རྒྱུད་ཕན་ཚུན་སེམས་སུ་ཉར།།

ལྷད་མེད་སེམས་ཀྱི་གཏིང་མཐའ་གང་ཞིག་ཏུ།།

མཛའ་བརྩེའི་རི་མོ་ཚོན་གྱིས་རིས་སུ་སྡེབ།།

རྨི་ལམ་དྲན་པ་མནར་བའི་གདུང་བ་རྣམས།།

མལ་སར་ལྷུང་བའི་ཟླ་བའི་འོད་ཀྱང་སྨྲེང་།།

ཕན་ཚུན་གཞོན་ནུའི་བཟོ་ལྟ་མ་འགྱུར་བ།།

ཧ་ཅང་ལྷད་མེད་ཁོ་ནས་སེམས་གཤིས་དེས།།

རྒྱུས་མེད་རི་སྡེའི་འཁྲིས་ཀྱི་ཆ་མེད་གཉིས།།

ལས་སྐལ་ལྷན་གཅིག་བསགས་པ་ཡོད་དམ་ཅི།།

མི་ཚོགས་ཁྲི་མ་འབུམ་གྱི་འཚང་ཁའི་ཁྲོད།།

བརྩེ་བའི་མིག་ཟུང་ཕན་ཚུན་འཁྲིས་སུ་འབབ།།

གཏན་དུ་ལས་སྐལ་མེད་པའི་མེ་ཏོག་ཅིག།

ཅིའི་ཕྱིར་བདག་སེམས་ཁོ་ནའི་གཏེར་དུ་སྦས།།

ཁྱོད་ཐུགས་བརྩེ་བའི་དབུ་མནའ་བཞེས་པ་ཡིས།།

བདག་སེམས་བརྩེ་བའི་རྦ་རླབས་དྲག་ཏུ་འཕྱོ།།

མཐའ་མེད་རྒྱ་མཚོར་བསྐྱལ་བའི་གསེར་ཉ་བཞིན།།

ལས་སྐལ་ལྷན་ཅིག་མེད་པ་གདུང་སྙམ་སྐྱེས།།

རྩྭ་ཐང་མེ་ཏོག་ཡངས་བའི་སྤང་ལ་བཞད།།

གཡུ་སྦྲང་རྩེད་འཇོའི་གར་ལ་རོལ་ན་ཡང་།།

མི་འགྱུར་ང་ཡི་ཧ་ལོའི་མེ་ཏོག་དེ།།

ཅི་འདྲའི་བརྟན་ཚུགས་ཆེ་བས་སྙིང་ལ་ཉེ།།

སྒེའུ་ཁུང་ཕྱི་རོལ་ཁ་བའི་འདབ་མ་ཐོར།།

རི་ལུང་ཐང་གསུམ་དངུལ་དཀར་ལྭ་བས་གཡོགས།།

གཅིག་པུར་འདི་ན་ལུས་པའི་བདག་སེམས་ཀྱིས།།

ཡིད་མཐུན་བྱམས་པ་དྲན་པའི་རྟེན་དུ་བསྒོམས།།

ཡིད་ཆུང་བརྩེ་བའི་མེ་ལོང་དྭངས་མ་རུ།།

གྱེས་ཁའི་བརྩེ་བའི་མིག་མཐའ་མཆི་མ་འཁོར།།

འདུས་མཐར་བྲལ་བའི་ཆོས་ཉིད་སུ་ཡིས་རྒོལ།།

ད་ནི་རང་སར་བརྩེ་བའི་གདུང་བཞིན་གྱེས།།

ལྷད་མེད་སེམས་གཤིས་དྭངས་པའི་ན་ཆུང་མ།།

ལས་སྐལ་སོ་སོར་བསྐོས་པའི་སྣང་བརྙན་འདི།།

ཡིད་གདུང་མཆི་མ་བཀུ་ཡང་མི་ཕན་པས།།

ཕན་ཚུན་བརྩེ་བཞིན་གྱེས་དང་ན་ཆུང་མ།།

མ་བཅོས་རང་གཤིས་འཇམ་པའི་ཚུགས་ཀ་དང་།།

བཅོས་མའི་བརྩེ་དགོད་གཡེང་བའི་རྣམ་པ་ཡིས།།

བདག་སེམས་དུང་བའི་བག་ཆགས་ཡང་ཡང་བཞག།

འདང་བརྩེའི་འདུན་མ་ཉིས་ཁྲི་ཆིག་སྟོང་བསགས།།

ལས་འཕྲོ་ལྷན་འཛོམས་མེད་པའི་གྲུ་ཁ་རུ།།

ཕན་ཚུན་སྙིང་ལ་བརྩེ་བའི་སྒྲུང་གཏམ་འཆད།།

བུ་མོ་པད་སྒྲོན་རྒ་འགྱའི་སྐར་མ་སོགས།།

ཕལ་ཆེར་ལས་སྐལ་མཐུན་པའི་སྣང་བ་བསྐྱེད།།

ཁྱེད་ཀྱི་གཤིས་འཇམ་སྨྲ་བ་ཉུང་ལུགས་དང་།།

གཏན་ཚིགས་སྙིང་ལ་སྦས་པའི་དམ་བཅའ་ཡིས།།

བདག་ཡིད་མཆི་མ་བཀུ་བའི་སྨྲེང་བ་འཐེན།།

ལས་སྐལ་སོ་སོར་བསྐོས་པ་སུ་ཡིས་ལན།།

ལས་སྐལ་སོ་སོར་བསྐོས་པའི་ངང་ཆུང་གཉིས།།

བརྩེ་བའི་མིག་ཟུང་ཕན་ཚུན་རྗེས་སུ་བསྙེགས།།

འཇིག་རྟེན་གཅིག་ལ་གནས་པའི་ལས་སྐལ་ཡང་།།

ཧ་ཅང་བསོད་ནམས་ཆེ་བའི་ཚད་དུ་བསྒོམས།།

འདི་ན་བརྩེ་བའི་གདུང་བཞིན་བྲལ་བ་ཡང་།།

མི་སེམས་མི་ལ་ཟུག་པའི་གཏམ་རྒྱུད་དེ།།

ཤིན་ཏུ་སྙི་བའི་སེམས་པ་དྭངས་མོ་གཉིས།།

ལས་སྐལ་སོ་སོར་བསྐོས་པ་སུ་ཡིས་བཟློག།

བརྩེ་བའི་ངག་ལན་མཆི་མས་བརླན་པ་དེ།།

གཤིན་རྗེས་མཐོང་ན་བརྩེ་བའི་སྤྱན་ཟུང་གཡོ།།

འདི་ན་ཨ་ལན་མེད་པའི་ལས་སྐལ་དེ།།

བུ་མོ་ཐུགས་སྐྱོ་མ་མཛད་དགའ་བར་གྱིས།།

ལྷད་མེད་སྙིང་ལ་སྦས་པའི་གཏན་ཚིགས་དེ།།

གཏན་དུ་ཡལ་མེད་སེམས་ཀྱིས་བརྩེ་ན་ཡང་།།

བརྩེ་བའི་ལས་སྐལ་སྤྱོད་པའི་འཕེན་པ་རྫོགས།།

སྐྱོ་སྐྱོ་མ་གནང་ཡིད་མཐུན་མཛའ་ན་མོ།།

དང་པོ་སྐྱེ་དུས་རང་ཉིད་གཅིག་པུར་སྐྱེས།།

བར་དུ་རྒས་པའི་གཉེར་མ་གཅིག་པུས་བསགས།།

ཐ་མ་འཆི་བའི་ཉིན་མོར་གཅིག་པུ་སྟེ།།

བརྩེ་བའི་བྱམས་པ་འཁྲིས་སུ་བཞག་ལ་ལྟོས།།

འཁྲུལ་རྟོག་སྒྱུ་མའི་རྨི་ལམ་མ་རྫོགས་པར།།

ངས་ནི་ཀུན་བཏགས་སྒྱུ་མ་བདེན་པར་བཟུང་།།

མཛའ་བརྩེའི་མེ་ཏོག་དྲན་པའི་ཐོང་གར་བཞད།།

དེ་ཡང་དུང་སེམས་སྒྱུ་མའི་མཛའ་བརྩེ་བརྐོས།།

སེམས་དང་སེམས་ཀྱི་བརྩེ་བ་འདྲེས་མཚམས་སུ།།

འོད་གསལ་ཀུན་ཏུ་བཟང་པོའི་དགོངས་པ་སྦྲེལ།།

མཐའ་ཐུག་ཡིད་མཁའི་ངོས་ཀྱི་མཚོ་བྱུང་མ།།

སྣང་སྲིད་ཀུན་ཏུ་བཟང་པོའི་རྒྱལ་སར་སྤྱོད།།

༼ ཚུལ་མཁས། ༽