ལོ་ད་ཆུང་སྣང་བ་རང་ཡན་དུ་ཡོད་དུས།།

རྐང་རྐ་ལག་བདེ་མྱུར་འཁྱུག་རྩལ་ཞིག་ཡོད་དུས།།

རྩེད་མ་བཅུག་ཁྱེད་ཅག་སློབ་གྲྭ་རུ་བསྒྲིགས་ཏེ།།

དུས་འདའ་བ་སེམས་རྩར་སྐྱོ་སྣང་ཞིག་ཡོད་ཀི།

ཡང་མ་སོང་རི་ལུང་ཁྱི་ལྡོམ་བཞིན་འཁྱམས་ནས།།

སྡེ་ཡུལ་ལུང་རྐུན་འཕྲོག་འཛིང་རྩོད་ཀྱིས་འདའ་ན།།

དེའི་རོག་ལ་ཤེས་བྱ་རིག་གནས་ཀྱི་སློབ་ར།།

སོང་ཡོད་པ་དོན་གོ་ཆོད་འདུག་ཅིག་བསམ་བྱུང་།།

དེ་བསམ་རུང་ཤེས་བྱ་རིག་གནས་ཀྱི་གདེང་ཚོད།།

སྒོས་མི་གཞི་ཀུན་སྤྱོད་སློབ་གསོ་ཡི་ལམ་སྟོན།།

གྲི་རྣོ་མེད་རུས་སྟེང་གཡུག་གཡུག་ལ་དཔེ་བཞག།

དོན་དམ་པ་ཆོད་མིན་དོགས་པ་ཞིག་སྐྱེས་ཀི།།

ད་དེ་འདྲ་ཡིན་ན་ཕ་མའི་ཞལ་སྔ་རུ་བསྡད་དེ།།

རྟ་ནོར་ལུག་རྨིག་རྗེས་གོམ་སྟབས་ཀྱིས་བསྙེགས་ཏེ།།

ཞིང་གྲུ་བཞི་རྨོ་འདེབས་ནམ་ཚོད་ཅིག་བཟུང་ནས།།

དྲིན་ཕ་མ་གཡོག་ན་དེས་དགའ་གཅིག་བསམ་བྱུང་།།

ཤ་ཚ་ལེ་ཕ་མ་དྲིན་ཆེན་གྱི་བསམ་པ།།

སེམས་བུ་རྒྱུད་ཐོགས་ཐོགས་སུ་ཞིག་ལ་ཐོགས་ཏེ།།

སྐྱིད་རང་ལག་གོར་གོར་མར་ཁུ་བཞིན་འཁྱིལ་བ།།

དེ་བསམས་ནས་ཁྱེད་ཅག་སློབ་གྲྭ་ལ་བཏང་ཟིན།།

དེ་བཏང་རུང་ཁྱེད་ཚོས་རང་བསམ་ནི་མི་གཏོང་།།

སྦྱོང་དགོས་རྒྱུ་རིག་གནས་ལག་ཤེས་ནི་མི་འབད།།

དེ་མི་དགོས་མ་རབས་བྱ་སྤྱོད་ཀྱིས་བསྒྱུར་ན།།

ལས་ངན་པ་ཕ་མ་དྲིན་ཆེན་ཚོ་རེད་བསམ།།

ཉིན་མིག་གིས་ཟིན་ཟིན་གསོག་འཇོག་ཅིག་བྱས་ཏེ།།

མཚན་རྣ་བས་ཐོས་ཐོས་རང་འདོད་ཅིག་བྱས་ཏེ།།

ཟ་མ་བྲ་ཡོང་སྒོ་ཁྱེད་ཚོ་ལ་བསྐུར་ན།།

ད་ཁྱེད་ཚོས་མགྲོན་ཁ་རྩེད་གཡེང་གིས་ཟད་འགྲོ།།

དེ་ཟད་རུང་ཁྱེད་ཚོས་དཀའ་ངལ་དེ་མི་དྲན།།

ཟ་གང་འདོད་གང་འགྲོར་ཅི་དགའ་རེ་བྱས་ནས།།

རང་མི་བསམ་རོགས་ཀྱང་རྣམ་གཡེང་དུ་ཁྲིད་དུས།།།

ལས་རྒྱུ་འབྲས་མེད་འདིར་འཇིགས་སྣང་རེ་སྐྱེས་ཀི།

ལས་རྒྱུ་འབྲས་བཤད་དུས་རང་སྟེང་ལ་ཁ་བསྐོར།།

དུས་ད་སྔོན་བསྐྱངས་པའི་སློབ་མ་ཡི་གྲངས་ཀ།

སྟོང་གཉིས་ཙམ་ཟིན་མོད་དེ་དག་གི་རྒྱུད་ལ།།

ཕན་ཡོད་མེད་དོགས་པའི་ན་བུན་ཞིག་འཁྲིགས་བྱུང་།།

ཤེས་ཟེར་ན་རྫུན་རེད་ཡོད་ཚད་དེ་མི་ཤེས།།

ཡང་མི་ཤེས་ཟེར་ན་ཅུང་ཙམ་རེ་ཤེས་མོད།།

དེ་སློབ་མ་རེ་རེའི་བློ་འབྱེད་ཀྱི་ལྡེའུ་མིག།

འགྱུར་ཡོད་མིན་གདེང་སྤོབས་ད་དུང་ཡང་མི་འདུག།

དཔའ་མེད་རུང་དམག་སྔོན་བུ་རྟ་གཉིས་ལྷུང་དུས།།

གྲི་མི་འཕྱར་ཕྱི་ནུར་འགྲོ་ས་ནི་མེད་ཀི།།

དེ་ཡིན་ན་ཤེས་ཚོད་ལྷག་བསམ་གྱི་འོ་མ།།

གང་འཐུང་འཐུང་བླུད་བླུད་ད་དུང་ཡང་དེ་ཡིན།།

ནངས་སྔ་ལངས་དགོང་ཀར་ཕྱི་ཉལ་རེ་བྱས་བྱས།།

དབྱར་དགུན་དུས་ཚ་གྲང་གྲངས་མེད་ཅིག་མྱོང་མྱོང་།།

གཞོན་ད་དར་ལང་ཚོ་སློབ་ར་ནས་རྒས་པའི།།

ཡང་ཁྱེད་ཅག་རིག་ན་ཤ་ཚ་ཡང་སྐྱེས་ཀི།།

སྒྲིག་མ་བསྲུང་ཟེར་ནས་ཆད་པ་ཞིག་འཁུར་དགོས།།

རྒྱུགས་མ་འཕྲོད་ཟེར་ནས་སེམས་སྡུག་ཅིག་འཁུར་དགོས།།

ཤེས་མི་འདུག་ཟེར་ནས་གཤེ་གཤེ་ཞིག་མྱང་དགོས།།

ཁག་ཅི་ཡོད་ཁྱེད་ཚོ་དཀའ་ལས་ཀྱང་ཆེ་ཀི།།

ཡང་དཀའ་ལས་ཆེ་སོང་མི་དགོས་ནི་མི་ཕོད།།

དུས་དེང་སང་རང་ཁ་རང་ལག་གིས་གསོ་དགོས།།

གསོ་དགོས་ན་ཤེས་རིག་ལག་ཤེས་རེ་དགོས་ཀི།།

དེ་དགོས་ན་དཀའ་སྤྱད་དཀོན་ཚགས་རེ་དགོས་ཀི།

ད་ཚང་མ་ཤ་ཚ་སེམས་ཚེགས་རེ་ཆེ་ཀི།།

དེ་ཆེ་རུང་མིག་རྒྱང་རིང་རིང་ཞིག་བྱས་ཏེ།།

སྟག་ཤ་ར་རི་གསུམ་ལུང་གསུམ་དུ་སོང་ན།།

གཏམ་སྙན་གྲགས་སང་གྲག་གནངས་གྲག་ཅིག་དགོས་ཀི།།

མི་ཆུང་རུང་སེམས་པ་ཨ་དཀར་གྱི་ལུག་ཆུང་།།

ཡུལ་རོང་འབྲོག་གཅེས་པའི་ན་གཞོན་གྱི་ཚོགས་ལ།།

སེམས་བསམ་པའི་སྲི་ཞུ་སློབ་གསོ་རེ་ཕོག་ན།།

དྲིན་ཨ་མས་གསོས་པའི་དོན་གོ་དེ་རེད་བསམ།།

སྒོས་ང་དང་འབྲེལ་བའི་དགེ་སློབ་ཀྱི་ལས་དབང་།།

ཕ་ཨ་མྱེ་རིང་གི་རིག་གནས་དང་འབྲེལ་བའི།།

གཞོན་ད་སྐྱེས་མེ་ཏོག་ཡག་ཡག་འདྲ་ཁྱེད་ཚོ།།

ཡུལ་ཕ་མ་དགའ་བའི་མཆོད་རྫས་རེར་འགྱུར་སྨོན།།

འགྲོ་སའི་རྡོ་གཅལ་ལམ་ཡང་གཅིག་པ་རེད།།

སྡོད་སའི་ཁང་པའི་སྤྱིལ་ཡང་གཅིག་པ་རེད།།

སྔ་ཕྱི་ཟ་མ་བཟའ་སའི་འདུག་སྟེགས་ཀྱང་།།

བར་ཁྱམས་གཅིག་གི་བར་ཐག་མ་གཏོགས་མེད།།

དཔྱིད་འགོའི་མེ་ཏོག་བཞད་དུས་མཉམ་དུ་ཡོད།།

དགུན་འཁྱག་ཁ་རླུང་འདྲེས་དུས་མཉམ་གྲང་རེད།།

ར་བ་གཅིག་གི་ནང་གི་ཉི་ནུབ་ཀྱང་།།

ཕལ་ཆེར་མཐོང་ན་མཉམ་མཐོང་ཡིན་ངེས་ཡོད།།

འོན་ཀྱང་ང་ཡིས་ཁྱེད་རང་ངོ་མི་ཤེས།།

མི་ཤེས་མ་ཚད་མཐོང་ཡང་མ་མྱོང་བ།།

བག་ཆགས་སེམས་ཀྱི་སྒེའུ་ཁུང་ཁྲ་བོ་ལ།།

རྡུལ་གྱི་ཆ་ཡང་མ་བསྐུས་གསལ་པོ་རེད།།

སྲོད་ལ་ཉི་མའི་ཁ་ཞུན་རི་རྩེ་ན།།

དམར་ལ་འོད་ཀྱིས་ཕྱུག་པའི་དགོང་ཀ་དེར།།

བསིལ་བའི་རླུང་ལྡང་ཆར་པས་བརླན་པ་ཡིས།།

ལུས་ཀྱི་གྲང་རེག་སེམས་ཀྱིས་ཐུབ་མ་བྱུང་།།

རེ་ཞིག་སྐྱོ་བའི་མགོ་བོ་གུག་བྱས་ཏེ།།

སུན་པའི་སྣང་བ་ས་ཆུ་ཐུར་བཞུར་ཚེ།།

ཁྱེད་ཀྱི་སྐད་རེད་མ་རེད་ཅི་ཞིག་གམ།།

བདག་ཡིད་ཀུ་མུད་འདབ་མ་ཕྱོགས་བཅུར་བཞད།།

རང་བྱུང་ངག་གི་སྒྲ་རྡུལ་རླུང་ལ་ཞོན།།

སྒྱུ་མའི་གར་གྱིས་མཉེན་ལྕུག་རྣ་དབང་དུ།།

འགོག་མེད་ཚོར་བའི་མྱོང་བྱེད་ཤེས་པ་ཡང་།།

སིལ་སིལ་འཐོར་ཞིང་ཕྱོགས་དང་ཕྱོགས་སུ་གྲམ།།

གླུ་ཚིག་གཅིག་ལ་ངག་གིས་སྐྱོར་བ་ཡིན།།

ཚིག་གི་དོན་ཁྲོལ་རྨོངས་པའི་དྲེགས་པ་གཞོམ།།

དབྱངས་ཀྱིས་བསྒྱུར་ཅིང་རིང་དུ་གྱེར་བ་ཡིས།།

སྙན་པ་རུས་གསེང་སྣུམ་ལྟར་ཞེན་ཞིང་སིམ།།

དེ་ལྟར་ཁྱེད་ནི་དབྱངས་ཅན་ལྷ་ཡི་སྲས།།

བདག་འདྲའི་མོས་དད་ཅན་གྱི་བགོ་སྐལ་ལ།།

དངོས་གྲུབ་མཆོག་གི་ཚུལ་དུ་གནངས་བ་ལ།།

དཔྱོད་ཤེས་བདག་ཀྱང་འཕྱང་མོའི་གནས་སུ་ལྷུང་།།

འགྲོ་སའི་རྡོ་གཅལ་ལམ་ཡང་གཅིག་པ་རེད།།

སྡོད་སའི་ཁང་བའི་སྤྱིལ་ཡང་གཅིག་པ་རེད།།

ང་ཡིས་ཁྱེད་རང་ཤིན་ཏུ་ངོ་ཤེས་པས།།

རྟག་ཏུ་མཐོང་ན་དགའ་བ་དཔག་མེད་འཕེལ།།

དེ་ལྟ་ན་ཡང་ཁྱེད་ནི་ཐང་གའི་ངོགས།།

མཛེས་སྙན་ཞི་བའི་ལྷ་མོའི་ངང་ཚུལ་བཞུགས།།

བདག་ནི་དེ་གའི་ཕྱི་ནང་སྲུང་པ་པོ།།

ལྟ་བ་ཙམ་ལས་རེག་ཐབས་ཡོད་མ་ཡིན།།

རེག་ཀྱང་ཅི་བྱ་བརྫད་ན་གྱོང་གུད་རེད།།

ཁྱེད་ཉིད་རྟག་ཏུ་ཡོན་ཏན་བྱེ་བའི་དབུས།།

ངག་དབང་ལྷ་མོའི་ཚབ་བྱས་བཞུགས་མཛོད་དང་།།

དེ་བས་ལྷག་ཅིག་བསོད་ནམས་མི་དགོས་ཨང་།།

ང་ཡིས་ཁྱེད་ཀྱི་སྒོ་གསུམ་སྐྱེད་ཚལ་ལས།།

འཁྲུངས་པའི་མཛེས་པ་ཡོད་དོ་ཕྱོགས་གཅིག་ཏུ།།

སྙན་ཚིག་ངག་གི་ལམ་དུ་བཀོད་བྱས་ཏེ།།

བདེ་བའི་ཕུན་ཚོགས་ཟད་མེད་ལམ་དུ་བཏེགས།།