ལྷ་ཚོགས་མེ་ཏོག་འདུས་པའི་སྤང་ལྗོངས་སུ།།
འཛུམ་ཆུང་འོ་མའི་མདངས་སུ་གྲོལ་བའི་མུར།།
རྗེས་ཆགས་ཉམས་བརྒྱ་འབར་བའི་ལྷ་མོ་དེ།།
ང་ཡི་ཞེ་སེམས་གཏིང་གི་དཀྱིལ་དུ་བཞུགས།།
སྣ་མང་སྲིད་པ་འཁོར་བའི་མཚོ་ངོགས་སུ།།
རང་དབང་གཤོག་པ་ཐོགས་པའི་བྱེའུ་ཆུང་ཞིག།
བདག་གི་གྲོགས་སུ་འགུགས་ཏེ་ཁྱེད་རང་གི།
ཕྱོགས་ཀྱི་དག་ཞིང་དེ་ལ་འཕུར་བར་བྲེལ།།
རྩྭ་ཟིལ་རླུང་གིས་སྤུར་བའི་བས་མཐའ་ཞིག།
ཁེར་རྐྱང་གླིང་བུ་འབུད་པའི་ལ་ཁ་དེར།།
ཚོར་བ་དབྱངས་ལ་བརྒྱུས་པའི་ངག་རིག་གི།
སྙན་པའི་འགྱུར་ཁུག་རྫོགས་པའི་ན་ཆུང་ལགས།།
བདག་ནི་མི་ཡུལ་ས་ནག་གད་པའི་ཀློང་།།
ནམ་ཡང་ཡར་འགྲོ་མར་རྒྱུགས་བྱས་ཀྱང་རུང་།།
འདི་ནས་མི་ཚེ་སྙིང་པོ་རྙེད་འདྲ་བའི།།
རིན་ཐང་ཆུང་ངུ་ཙམ་ཞིག་གང་ནས་ཐོབ།།
ངེས་མེད་འཁོར་བའི་རེ་དོགས་ཆེ་ན་ཡང་།།
ཞེ་ཆགས་མགྲིན་པའི་ངག་རྟར་གསན་མཛོད་དང་། །
མ་བཅོས་ངང་དུ་རྒྱུ་བའི་འགྱུར་ཁུག་ཁྲོད།།
བདག་གི་སེམས་ཀྱི་དྲན་ཤིང་ཁྱེད་རང་ཡིན།།
ཕུལ་བྱུང་རྟ་བདུན་འཆར་བའི་གནམ་ཐང་དུ།།
སླས་མཐར་ཅང་ཤེས་རྟ་ཕོ་མཐུར་མེད་ལ།།
ཞོན་ཏེ་ས་གཞིའི་རི་ལུང་མང་དུ་འགྲིམས།།
མི་ཚེའི་འཚོ་བ་གང་ནས་རྫོགས་ཀྱང་རུང་།།
ཤེལ་དཀར་ཚིག་གི་ཕྲེང་བ་ཤམ་ཤམ་དུ།།
ཕ་ས་གངས་རིའི་ལྗོངས་ཀྱི་ལྟེ་བ་ཆེ།།
མདོ་སྨད་ཆོས་ཀྱི་ར་བའི་ལུང་པ་ནས།།
བདག་གིས་ཁྱེད་ལ་འབོད་པ་སྔར་བས་ཟབ།།
ང་ནི་མ་རིག་མུན་པའི་བཙོན་རལ་དུ།།
གཏན་དུ་འཆམ་འཆམ་བྱེད་བཞིན་གང་ས་རུ།།
ལྡོམ་སྟེ་ཁྱོད་ཉིད་འཚོལ་བའི་ལམ་ཁ་རེ།།
ང་ཡི་འདུན་མ་འཆང་བའི་ལམ་ཁ་རེ།།
༼ ཁམས་ཟླ་སྲས། ༽