འཛུམ་ཆུང་མེ་ཏོག་སེམས་སུ་བཞད་པས།།
ཡིད་ཀྱི་བརྟན་པ་དབང་མེད་འཕྲོག་སོང་།།
བརྩེ་བའི་བརྩེ་བ་དྭངས་གཙང་ཡིན་རུང་།།
སྙིང་གཏམ་དྲོན་མོ་བཤད་པར་མ་ནུས།།
སྒེའུ་ཁུང་ངོགས་ཀྱི་རྨི་ལམ་ནང་དུ།།
ཁྱོད་རང་འཁོར་བ་ཐེངས་གཅིག་མ་རེད།།
དྲན་གདུང་ཡིད་ཀྱི་རྟ་ཁ་ལྷོད་ན།།
ཁྱོད་ཀྱི་ཕྱོགས་སུ་དབང་མེད་རྒྱུ་འགྲོ།།
རུ་སྡེ་གཅིག་ལ་མཉམ་དུ་འཛོམས་པ།།
ཚེ་རབས་སྔོན་གྱི་ལས་འཕྲོ་ཨེ་རེད།།
ལྷན་དུ་འགྲོགས་པའི་སྐལ་བ་འདི་ཡང་།།
སྐྱེ་བ་གཅིག་གི་འབྲས་རྟགས་ཡིན་ནམ།།
ཁྱོད་རང་མེད་པའི་ཉིན་ཞག་དག་ལ།།
སེམས་ཆུང་དམར་པོ་འཁྱག་པས་བཟུང་འགྲོ།།
ཁྱོད་རང་ཉེ་བའི་ག་ཤེད་ཡོད་དུས།།
སེམས་ཀྱི་དྲན་ཤིང་ཁྱོད་ཉིད་ཡིན་འགྲོ།།
རུ་སྡེ་གཅིག་ནས་ལྷན་དུ་འཕྲད་དུས།།
མིག་ཟུང་གཉིས་པོ་གདོང་ལ་ཧད་ཡོད།།
མི་ཚོགས་དཀྱིལ་ནས་ཁྱོད་རང་འགྱིང་ན།།
དམ་དུ་འཁྱུད་པའི་ཚོར་བ་ཟབ་ཡོང་།།
ཤ་དང་ཁྲག་གི་འབྲེལ་བ་མེད་ཀྱང་།།
རིགས་དང་བརྒྱུད་པའི་རྙོག་དྲས་དབེན་རུང་།།
སེམས་ཀྱི་སྤོབས་པ་ཆུང་ཆུང་ཞིག་གིས།།
དགའ་རུང་སྙིང་གཏམ་བཤད་པར་མ་ཕོད།།
ཟླ་འོད་མེད་པའི་མཚན་མོ་ཞིག་ལ།།
ཁྱོད་རང་མཇལ་བར་འགྲོ་སྙིང་ཆེ་ཡང་།།
སྙིང་གི་འཕར་ལྡིང་རྒོད་ཀྱིན་རྒོད་ཀྱིན།།
གོམ་ཁ་མྱུར་མོ་ཕྱིར་ལ་འཁོར་སོང་།།
ཕར་ལ་བརྩེ་བའི་མེ་ཏོག་བཞད་ཀྱང་།།
ཚུར་ལ་དུང་བའི་ཉམས་ཤིག་མེད་པས།།
ཡུན་རིང་ཉར་བའི་སེམས་ཀྱི་གསང་བ།།
བཤད་ན་འདོད་ཀྱང་མགྲིན་པར་བརྣངས་སོང་།།
ང་ལ་དུང་བའི་སྙིང་གཏམ་མེད་ཅིང་།།
གཞན་དང་འགྲོགས་པའི་མི་ཁ་མེད་པས།།
ཁྱོད་ནི་ཞེན་ཆགས་འཆིང་ལས་གྲོལ་བའི།།
ཨ་མ་རྗེ་བཙུན་སྒྲོལ་མ་ཨེ་ཡིན།།
སྨྲ་བརྗོད་ཉུང་བའི་གཤིས་བཟང་བུ་མོ།།
ཁྱོད་ཀྱི་སེམས་པ་གང་དུ་གཡེང་བ།།
མ་འོངས་འཚོ་བའི་གཞིས་ཁྱིམ་གཅིག་པའི།།
ལས་ཀྱི་མི་དེ་ནམ་ཞིག་བཙལ་རྒྱུ།།
གཞན་དང་འགྲོགས་པའི་སེམས་ཐག་མ་ཆོད།།
ཁྱོད་དང་འདྲིས་ཀྱང་སྙིང་གཏམ་མི་ཐོས།།
རེ་སྒུག་ཅེས་པའི་ཐ་སྙད་བར་ནས།།
ཁོ་བོའི་ལང་ཚོ་རྒས་ལ་ཉེ་ཡོང་།།
༼ དམར་ཁ་ཚ། ༽