སྔོན་མར་འདབ་པ་ཡང་ས་གནས་གཞན་དག་དང་འདྲ་བར་སྤྱི་ཚོགས་དང་དཔལ་འབྱོར་སོགས་ཀྱི་ཆ་རྐྱེན་ཞན་སྟབས་མི་དྲག་དང་ཚོང་པའི་ཁྱིམ་ཚང་རེ་གཉིས་ཀྱིས་ཧ་ཡང་དང་དཀར་ཡོལ་གྱི་ཡོ་བྱད་བེད་སྤྱོད་ཐུབ་པ་ལས་དེ་མིན་རྣམས་ཀྱིས་ཤིང་དང་རྫ་ལས་བཟོས་པའི་སྣོད་ཆས་ཁོ་ན་སྤྱད་དགོས་པ་རེད། སྐབས་དེ་དུས་ཐོན་སྐྱེད་ལག་རྩལ་དམའ་བས་སྟ་རེ་དང་གྲི། འབིག་སོགས་ཀྱིས་བཅད་གཏུབ་གཞོག་འབིགས་བྱས་པའི་སྣོད་ཀྱི་བཟོ་དབྱིབས་མི་མཛེས་ལ་འཛིན་བཟུང་མི་བདེ་བས་མི་རྣམས་ཀྱིས་མིག་ལ་མཛེས་ཤིང་ལག་ལ་སྤྱོད་བདེ་བ་དང་། སྤྱོད་གོ་ཆོད་པའི་སྣོད་ཆས་དང་ཡོ་བྱད་ལ་རེ་སྨོན་བྱེད།

སྐབས་དེར་སྡེ་གསར་གྲོང་པར་དོན་གྲུབ་ཅེས་པའི་རྣམ་རིག་བཀྲ་བའི་མི་ཞིག་ཡོད། ཁོས་དུས་རྒྱུན་དུ་འཚོ་བའི་སྣོད་ཆས་དང་ཡོ་བྱད་ལ་འཚོལ་རྟོག་དང་བསམ་གཞིག་བྱས། ཉིན་ཞིག་ཁོས་ཆུ་ཡིས་བསྐོར་ཏེ་རྩམ་པ་འཐག་པའི་ཆུ་འཁོར་ལ་བལྟས་ནས་བསམ་གཞིག་འདྲ་མིན་སྣ་ཚོགས་བྱས་མཐར་ཤིང་དུམ་བུ་ཞིག་ཆུ་འཁོར་གྱི་མཆིག་རྡོ་ལ་བརྡར་དུ་བཅུག་པས་ཤིང་དུམ་གྱི་ཕྱི་ངོས་འཇམ་པོར་ཆགས། དེ་ནས་ཁོས་རྐང་པས་བརྫིས་ནས་བསྐོར་ཆོག་པའི་འཁོར་ལོ་ཞིག་བཟོས་ཏེ་ཤིང་གི་ཕྱི་ངོས་འཇམ་པོར་ཆགས་ཐབས་དང་ནང་ལ་སྟོང་ཆ་ཡོང་ཐབས་བཅས་ཀྱི་གནད་དོན་ཐག་བཅད་པས་དུས་དེ་ནས་བཟུང་མི་རྣམས་ལ་མཛེས་ཤིང་གོ་ཆོད་པའི་ཤིང་ཕོར་སྣོད་ཆས་འདྲ་མིན་སྣ་ཚོགས་ཐོན་ཏེ་འཚོ་བའི་ཆ་རྐྱེན་སྔོན་མ་ལས་ལྡབ་འགྱུར་གྱིས་ཕུན་སུམ་ཚོགས་པར་གྱུར།

སྡེ་གསར་གྲོང་ནི་འདབ་པ་ནས་ཉི་སྟེན་བར་གྱི་སྤྱི་ལེ53གྱི་མཚམས་སུ་གནས་ཤིང་། སྡེ་གསར་གྲོང་གི་ཤིང་ཕོར་རྐོ་བའི་ལག་རྩལ་ལ་དུས་ཡུན་རིང་བའི་ལོ་རྒྱུས་ལྡན་པ་དང་། ལག་རྩལ་འདི་ཐོག་མར་གསར་དུ་རྙེད་དུས་ཇ་ཕོར་ཙམ་ལས་བཟོས་མི་ཤེས་པ་ནས་ད་ལྟར་མ་དཔེ་ཡོད་ན་ཚང་མ་བཟོས་ཤེས་པའི་ཆུ་ཚད་གསར་པར་བསླེབས་ཡོད་དེ། མིག་སྔར་ཕྱི་ནང་ཀུན་ལ་ངོམ་ངོམ་བྱེད་ཆོག་པའི་ཇ་ཕོར་དང་ཆང་ཕོར། མར་སྒམ། རྩམ་སྒམ། བཀྲ་ཤིས་རྟགས་བརྒྱད། མེ་ཏོག་བུམ་པ། ལག་གདུབ། ཆོ་གའི་ཡོ་བྱད་སྣ་ཚོགས་དང་སྡེར་མ་སོགས་སྣ་ཁ་མང་པོས་ཡུལ་མི་རྣམས་ཀྱི་ཡོང་སྒོ་དབྱར་ཁའི་མཚོ་ལྟར་རྒྱས་དང་རྒྱས་མུས་སུ་མཆིས།།