༡
མི་ཡི་བདེ་སྐྱིད་མི་རྟག་འཕྲལ་འཕྲལ་འགྱུར།།
སྡུག་ཐོག་སྡུག་བསྔལ་ལྷག་མ་གཞན་ཡང་འཕེལ།།
ཅི་བྱས་སྡིག་པའི་ས་བོན་འབའ་ཞིག་ལས།།
གཏན་བདེའི་ལམ་བཟང་རྙེད་པའི་དགེ་རྩ་ཕྲ།།
༢
རྣམ་ཤེས་ཨ་མའི་མངལ་དུ་ཞུགས་པ་ནས།།
ཉལ་འཆག་འགྲོ་འདུག་ལས་ཀྱིས་སྡུག་བསྔལ་བསྐྱེད།།
བཙའ་ཚེ་ལྕགས་ཀྱི་འཇུར་མིག་ལ་སོགས་པའི།།
སྡུག་གི་རྣམ་གྲངས་བསམ་གྱིས་མི་ཁྱབ་གསུངས།།
༣
ཚ་གྲང་འཐབ་པའི་ནད་ཀྱིས་ལོ་ཟླར་བཙིར།།
སྔོ་ཆགས་མིག་གིས་གསོན་ལ་རེ་ལྟོས་བྱེད།།
གཡས་གཡོན་ཉེ་བའི་མིས་ཀྱང་གཡོག་མི་འབྱོར།།
ཉིན་མཚན་རྔུལ་ཆུ་ཁོ་ནས་འདའ་བར་བྱེད།།
༤
ལུས་ཀྱི་ལྷུ་ལག་ཐོར་ཞིང་ཤ་རུས་ཟད།།
དབང་པོ་སྒོ་ལྔ་མི་གསལ་ཞག་རེས་ཉམས།།
མི་འདོད་ཁྲོ་གཉེར་བསྡུས་པའི་ཞེ་ངལ་ཅན།།
ཡོེད་ཚད་ཤོར་བའི་མྱ་ངན་སྙིང་ལ་ལྕི།།
༥
དབུགས་ཀྱི་རྒྱུ་བ་ཆད་པའི་འཇིགས་སྐྲག་དང་།།
ཕྱི་མའི་འཕྲང་རིང་འགྲིམ་པར་སྡུག་བསྔལ་ཀྱང་།།
འཆི་བདག་ལས་ཀྱི་གཤིན་རྗེ་དྲུང་དུ་སླེབས།།
སྲོག་གི་ཞགས་པ་ནག་པོ་མགུལ་དུ་བསྐོན།།
༦
ཕྱི་རོལ་སྡང་བའི་དགྲ་ལ་འཕྲད་དོགས་དང་།།
བྱམས་པའི་ཉེ་དུ་རྣམས་ལ་འབྲལ་དོགས་བཅས།།
འདོད་པ་མི་འགྲུབ་མི་འདོད་ཐོག་ཏུ་བབས།།
བསམ་ན་མི་ལ་བདེ་བའི་སྐར་གྲངས་ཉུང་།
༼ མཱ་ལིན་ནཱ། ༽