ཀ་བ་ལྟ་བུའི་རིགས་ཀྱི་སྲོག་ཤིང་སྟེ།།
ཁ་འབྲས་མཚར་བའི་ན་ཆུང་བྱིས་པ་ཚོ།།
ག་དུས་ཡིན་རུང་རང་རེའི་སྐད་ཡིག་འདི།།
ང་ཚོའི་ཁྱད་ནོར་ཡིན་པས་མ་བརྗེད་ཅིག།
ཅ་ཅོའི་འདུ་འཛི་རྒོད་པའི་འཇིག་རྟེན་དུ།།
ཆ་ཚང་ཤེས་བྱ་སློབ་པའི་ཐེམ་སྐས་ནི།།
ཇ་ལ་ཚྭ་བཞིན་ཡི་གེའི་དཔལ་ཡིན་པས།།
ཉ་མོ་ཆུ་ལ་དུངས་ལྟར་སྐད་ཡིག་སློབས།།
ཏ་ཐཱ་ག་ཏའི་བསྟན་པ་འཛིན་དགོས་ན།།
ཐ་མལ་ཡིག་རྨོངས་མི་ཡིས་ཇི་ལྟར་འཛིན།།
ད་ལྟ་སློབ་པའི་དཀའ་བ་ཁྱད་བསད་དེ།།
ན་ཆུང་བྱིས་པ་ཚོ་ཡིས་འབད་པར་འཚལ།།
པ་ཕ་ཨ་མའི་སྐུ་དྲིན་འཇལ་བ་དང་།།
ཕ་རོལ་མི་ལ་ཕན་པ་བསྒྲུབ་དགོས་ན།།
བ་ལང་ལྟ་བུའི་གླེན་པས་མི་ཡོང་བས།།
མ་ལུས་ཤེས་བྱའི་འཇུག་སྒོ་ཡི་གེ་སྦྱོངས།།
ཙ་རི་བཞིན་དུ་སྐད་གྲགས་ཆོད་དགོས་ན།།
ཚ་གྲང་ངལ་དུབ་སོགས་ལ་མ་འཛེམ་པར།།
ཛ་ཧུའི་བུ་མོའི་རྒྱུན་བཞིན་བརྩོན་དགོས་ཀྱི།།
ཝ་ལེར་ཤེས་པའི་ཤེས་བྱ་མི་སྲིད་དོ།།
ཞ་ཞི་དག་ནི་ཕ་མའི་སྲོག་ཡིན་པས།།
ཟ་མ་བྱིན་ཏེ་ལུས་པོ་གསོ་བ་ལྟར།།
འ་འུར་ངང་དུ་མི་ཚེ་མི་འཛད་པར།།
ཡ་མཚན་ཅན་གྱི་རིག་པ་སློབ་ཤོག་ཀྱེ།།
ར་བ་གངས་ཀྱིས་བསྐོར་བའི་རིགས་གཅིག་ཚོ།།
ལ་རྒྱ་འཛིན་ན་སྐད་ཡིག་ཤེས་པར་གྱིས།།
ཤ་ཁྲག་སྒྱུ་མའི་ཐོ་ཡོར་བོད་ཡིན་ཞེས།།
ས་བཤད་རྡོ་བཤད་ཙམ་གྱིས་ཅི་ཞིག་ཕན།།
ཧ་ཅང་མི་རིང་ཧ་ཅང་མི་ཐུང་བའི།།
ཨཱ་ལི་ཀཱ་ལི་སློབ་སྐུལ་ཀ་རྩོམ་འདི།།
ཧ་ཅང་མི་རྒས་ཧ་ཅང་མི་གཞོན་པའི།།
ཨ་ལ་པ་ལ་ཕྱག་སྨྱོན་གང་དེས་སྦྱར།།
༼ ཕྱག་སྨྱོན། ༽