སྤྱི་ཟླ12པའི་ཚེས5ཉིན།2025ལོའི་དར་མདོའི་ཀུ་ཤུ་སྤུས་རྟགས་ཁྱབ་གདལ་བྱེད་སྒོ་མཛའ་གཞས་ཐང་ཆེན་དུ་སྤེལ་བ་རེད། ད་ཐེངས་ཀྱི་བྱེད་སྒོ་དེ“མཛའ་གཞས་ཡུལ་གྱི་སིལ་ཏོག་ཀུ་ཤུ་ཡི། ཞིམ་མངར་བྲོ་བ་ཁྱིམ་ཚང་ཀུན་ལ་ཁྱབ།”ཅེས་པའི་གཙོ་དོན་བྱས་ཤིང་། དེས་དར་མདོ་གྲོང་ཁྱེར་གྱི་ཀུ་ཤུ་སྤུས་རྟགས་སྔར་བས་གཏོད་རྒྱུ་དང་ཁྱད་ལྡན་ཞིང་ལས་ཐོན་རྫས་ཕྱིར་འཚོང་ཁྲོམ་རར་རྒྱ་བསྐྱེད་གཏང་རྒྱུ་ཡིན་པ་རེད།

བྱེད་སྒོ་སྤེལ་ཡུལ་དུ་འགྲེམས་ཚོང་བྱེད་པ་ཕུད། ད་དུང་མི་སྒེར་དང་ཁྱིམ་ཚང་། ཁེ་ལས། ཞིང་དུད་བཅས་ཀྱི་ཤིང་ཏོག་ལྡུམ་རའི་གསོ་སྐྱོང་གན་རྒྱ་འཇོག་པའི་མཛད་སྒོ་སྤེལ་བ་དང་། མཉམ་ལས་བྱེད་སྟངས་གསར་གཏོད་བྱས་པ་བརྒྱུད་དར་མདོ་ཀུ་ཤུ་དང་དེ་བཞིན་ཁྱད་ཆོས་ལྡན་པའི་ཞིང་ལས་ཐོན་རྫས་ཀྱི་སྐད་གྲགས་ཆོད་ཚད་དང་མཚན་སྙན་ཕྱོགས་ཡོངས་ནས་མཐོ་རུ་ཕྱིན་པ་རེད།

ཉེ་བའི་ལོ་ཤས་རིང་དར་མདོ་གྲོང་ཁྱེར་གྱིས་ཀྲི་པུའུ་དང་མཉམ་ལས་ཁང་།ཞིང་དུད་བཅས་མཉམ་འབྲེལ་འཕེལ་རྒྱས་གཏོང་སྟངས་རྒྱུན་འཁྱོངས་ཏེ་ཆེད་ལས་ཚན་རྩལ་ཞབས་ཞུའི་ཚོགས་པ་བཙུགས་ནས་ཚན་རྩལ་ཡུལ་སྡེར་སྐྱེལ་བའི་རྒྱུན་ལྡན་རང་བཞིན་གྱི་བྱ་སྤྱོད་སྤེལ་ཏེ་ལག་རྩལ་གྱིས་ཐོན་ལས་རིམ་སྤོར་ཐུབ་པ་བྱས་ཡོད། 2024ལོར་ཤིང་ཏོག་ལྡུམ་ཁུལ་གྱི་ཐོན་རྫས་རིན་ཐང་བསྡོམས་འབོར་སྒོར་ཁྲི6140ལས་བརྒལ་བ་དང་། ལྡུམ་ཁུལ་གྱི་མི་རེའི་ཆ་སྙོམས་བཀོལ་སྤྱོད་ཡོང་འབབ་སྒོར25510ཟིན་ནས་གྲོང་ཁྱེར་ཡོངས་ཀྱི་ཆ་སྙོམས་ཆུ་ཚད་ལས་བརྒྱ་ཆ21.27མཐོ་བ་རེད། དེའི་ནང་ཟླ་གམ་གྲོང་ཚོའི་མུའུ1200ཡི་ཀུ་ཤུ་ལྡུམ་རའི་ལོ་རེར་ཐོན་ཚད་ཏུན2500ལྷག་ཡོད་པས། ཁྱིམ་ཚང་སོ་སོའི་ཆ་སྙོམས་ཡོང་འབབ་སྒོར་ཁྲི25ལས་བརྒལ་བ་དང་། རྒྱལ་ཡོངས་ཀྱི“གྲོང་ཚོ་གཅིག་ལ་ཐོན་རྫས་གཅིག”གི་དཔེ་སྟོན་གྲོང་ཚོའི་གདེང་འཇོག་གྲུབ་འབྲས་ཐོབ་པ་རེད།

མ་འོངས་པར་དར་མདོ་གྲོང་ཁྱེར་གྱིས་ཀུ་ཤུ་ཐོན་སྐྱེད་ཀྱི་སྤུས་ཀ་ཁུངས་འདེད་མ་ལག་ཧྲིལ་པོ་བཙུགས་ཏེ“སྐྱེ་ལྡན་དང་། ཉེན་མེད། སྤུས་ལེགས”དེ་དར་མདོ་ཀུ་ཤུ་ཡི་མངོན་གསལ་དོད་པའི་མཚོན་རྟགས་ཤིག་ཏུ་འགྱུར་བ་དང་།དུས་མཚུངས་སུ“དར་མདོའི་ཀུ་ཤུ་དམར་པོ”ཡི་སྤུས་རྟགས་ཇེ་ལེགས་སུ་བཏང་ནས་ཀུ་ཤུ་འཐོག་པ་དང་ཡུལ་སྡེའི་ཡུལ་སྐོར།རིག་གནས་ཉམས་ལེན་སོགས་ནས་མཉམ་འདྲེས་བྱ་རྒྱུར་བསྐུལ་ཏེ་སྤུས་རྟགས་ཀྱི་ཤུགས་རྐྱེན་མུ་མཐུད་ཆེ་རུ་བཏང་ནས་ཞིང་དུད་དེ་བས་མང་བ་ཐོན་ལས་སུ་ཞུགས་ཏེ་འཕེལ་རྒྱས་ཀྱི་ཁེ་སྤོགས་མཉམ་སྤྱོད་བྱེད་དུ་འཇུག་རྒྱུ་རེད།།

（ལྷ་འཛོམས་ཀྱིས་བསྒྱུར།）