སྤྱི་ཟླ12པའི་ཚེས5ཉིན། ཁུལ་ཨུ་སྐབས་བཅུ་གཉིས་པའི་བསྒྱུར་བཅོས་ཁྱོན་ཡོངས་ཟབ་སྤེལ་ཨུ་ལྷན་གྱི་ཚོགས་འདུ་ཐེངས་དགུ་པ་འཚོགས་ཤིང་། བསྒྱུར་བཅོས་ཁྱོན་ཡོངས་ཟབ་སྤེལ་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དགོངས་པ་གསར་པ་དང་། ལྟ་བ་གསར་པ། ཆོད་གཏམ་གསར་པ་རབ་དང་རིམ་པ་སློབ་སྦྱོང་དང་ལག་ལེན་མཐར་ཕྱིན་བསྟར་བ་དང་། ཞིང་ཆེན་ཏང་ཨུའི་བསྒྱུར་བཅོས་ཁྱོན་ཡོངས་ཟབ་སྤེལ་ཨུ་ལྷན་གྱི་ཚོགས་འདུ་ཐེངས་བཅུ་པའི་སྙིང་དོན་བརྒྱུད་བསྒྲགས་དང་སློབ་སྦྱོང་བྱས་པ་དང་། འབྲེལ་ཡོད་བསྒྱུར་བཅོས་ཇུས་གཞིར་གྲོས་ཞིབ་བྱས་ཏེ་ཕྱིན་ཆད་གཙོ་གནད་ལས་ཀར་ཞིབ་འཇུག་དང་བཀོད་སྒྲིག་བྱས་པ་རེད། ཁུལ་ཨུའི་ཧྲུའུ་ཅི་གཞོན་པ། ཁུལ་དཔོན། ཁུལ་ཨུའི་བསྒྱུར་བཅོས་ཁྱོན་ཡོངས་ཟབ་སྤེལ་ཨུ་ལྷན་གྱི་ཀྲུའུ་རེན་གཞོན་པ་ཧྥུང་ཧྥ་ཀུའེ་ཡིས་ཚོགས་འདུ་གཙོ་སྐྱོང་དང་གསུང་བཤད་གནང་བ་རེད།

ཚོགས་འདུར་ཁྱོན་ཡོངས་ནས་ཚད་གཞི་དང་རེའུ་མིག་བསྡུར་ནས་བསྒྱུར་བཅོས་ལ་བསྐུལ་ཏེ། དུས་ཐོག་དང་སྤུས་ཚད་མཐོ་བའི་སྒོ་ནས་ལེགས་གྲུབ་ཡོང་བར་འགན་ལེན་བྱ་དགོས་པ་དང་། དཀར་མཛེས་ཁུལ་གྱི་དོན་དངོས་ལ་གཞིགས་ནས་བསྒྱུར་བཅོས་ལ་བསྐུལ་དགོས། ནུས་ཁུངས་གཙང་མའི་ཐོན་ལས་ཀྱི་གཙོ་ཁྲིད་ནུས་པ་མུ་མཐུད་དུ་ཇེ་ཆེར་གཏང་དགོས། དམངས་གཉེར་དཔལ་འབྱོར་འཕེལ་རྒྱས་ཀྱི་གསོན་ཤུགས་སྐུལ་སྤེལ་བྱ་བར་དམིགས་ནས་སྲིད་དོན་དང་། ཁྲིམས་སྲིད། རྒྱུ་རྐྱེན་གཙོ་བོ། གསར་གཏོད་ཁོར་ཡུག་བཅས་མུ་མཐུད་ལེགས་སུ་གཏོང་བ་དང་།ཚོང་གཉེར་ཁོར་ཡུག་བཟང་པོ་ལ་བརྟེན་ནས་དམངས་གཉེར་དཔལ་འབྱོར་སྐྱོན་བྲལ་ངང་འཕེལ་རྒྱས་འགྲོ་བར་རམ་འདེགས་བྱ་དགོས། དབུལ་ཐར་འགག་སྒྲོལ་གྱི་གྲུབ་འབྲས་སྲ་བརྟན་དུ་གཏོང་བར་དམིགས་ནས་ཡུལ་སྡེ་དར་རྒྱས་ལ་ཁྱོན་ཡོངས་ནས་བསྐུལ་བ་དང་། རྒྱུན་ལྡན་ཅན་གྱི་རོགས་སྐྱོར་ལམ་སྲོལ་འཐུས་ཚང་དུ་གཏང་དགོས། དབུལ་བྲལ་མང་ཚོགས་ཀྱི་ཡོང་འབབ་ཐབས་ལམ་རྒྱུན་ཆད་མེད་པར་རྒྱ་ཆེར་བཏང་ནས་གྲོང་སྡེའི་ཐུན་མོང་དཔལ་འབྱོར་འཕེལ་རྒྱས་སྟོབས་ཆེར་གཏང་དགོས།སྐྱེ་ཁམས་སྲུང་སྐྱོང་ལ་དམིགས་ནས་རྒྱལ་ཡོངས་ཀྱི་སྐྱེ་ཁམས་དཔལ་ཡོན་འཛུགས་སྐྲུན་དཔེ་སྟོན་ཁུལ་གསར་སྐྲུན་བྱས་པའི་གྲུབ་འབྲས་སྲ་བརྟན་དང་མཐོར་འདེགས་བཏང་སྟེ། འབྲི་ཆུ་དང་རྨ་ཆུའི་སྟོད་རྒྱུད་ཀྱི་སྐྱེ་ཁམས་སྲུང་ཡོལ་མུ་མཐུད་དུ་བརྟན་པོ་ཡོང་བར་ཤུགས་འདོན་དགོས། མང་ཚོགས་ལ་ཞབས་འདེགས་ཞུ་བའི་གོ་རིམ་ལེགས་བསྒྱུར་བྱས་ཏེ་མང་ཚོགས་ཀྱིས་བྱ་བ་སྒྲུབ་པ་དེ་བས་སྟབས་བདེ་ཡོང་བར་བྱ་དགོས། སྤྱི་ཚོགས་བརྟན་རླིང་སྲུང་སྐྱོང་ལ་དམིགས་ནས་སྤྱི་ཚོགས་བཅོས་སྐྱོང་དང་སྤྱི་པའི་བདེ་འཇགས་སོགས་ཁྱབ་ཁོངས་ཀྱི་བསྒྱུར་བཅོས་མུ་མཐུད་གཏིང་ཟབ་ཏུ་བཏང་ནས་བདེ་འཇགས་འགན་སྲུང་ནུས་པ་ཆེ་རུ་གཏང་དགོས། འགན་འཁྲི་དམ་ཟབ་བྱས་ནས་བསྒྱུར་བཅོས་ལ་བསྐུལ་དགོས་ཞེས་ནན་བཤད་བྱས་པ་རེད།

ཚོགས་འདུར《དཀར་མཛེས་ཁུལ་གྱི་འབྱུང་འཕྲོད་རྩིས་ནུས་ཐོན་ལས་འཕེལ་རྒྱས་སྤུས་ཚད་མཐོན་པོར་ཡོང་བའི་འཆར་འགོད（2025ལོ་ནས2028ལོའི་བར）（གྲོས་ཞིབ་མ་ཟིན）》དང་།《དཀར་མཛེས་ཁུལ་གྱི་སྨན་རྫས་འཕྲོད་བསྟེན་སྒྲིག་སྲོལ་བསྒྱུར་བཅོས་སྔར་བས་ཟབ་ཏུ་སྤེལ་བའི་ལག་བསྟར་ཇུས་གཞི（གྲོས་ཞིབ་མ་ཟིན）》《དཀར་མཛེས་ཁུལ་གྱི་མཛེས་སྡུག་ལྡན་པའི་གྲོང་སྡེ་འཛུགས་སྐྲུན་ལས་དོན་ཇུས་གཞི（གྲོས་ཞིབ་མ་ཟིན）》སོགས་ཀྱི་ཡིག་ཆར་གྲོས་ཞིབ་བྱས་པ་རེད།།

（བདེ་སྐྱིད་ཀྱིས་བསྒྱུར།）