ཉེ་ཆར“གོ་སྐབས་གསར་པ་དམ་དུ་འཛིན། ཐོས་རྫས་རྩ་ཆེན་ཁྱབ་གདལ་བཏང”ཞེས་པའི་ལི་ཐང་རྫོང་གི་ཞིང་ལས་ཐོན་རྫས་སྤུས་ལེགས་མཚམས་སྦྱོར་ཚོགས་འདུ་དེ་ཁྲེང་ཏུའུ་གྲོང་ཁྱེར་ཤིན་ཏུའུ་ཆུས་སུ་འཚོགས། ད་ཐེངས་ཀྱི་བྱེད་སྒོ་ནི་ལི་ཐང་རྫོང་མི་དམངས་སྲིད་གཞུང་དང་། ཁྲེང་ཏུའུ་གྲོང་ཁྱེར་ཤིན་ཏུའུ་ཆུས་མི་དམངས་སྲིད་གཞུང་། ཅིན་ཐང་རྫོང་མི་དམངས་སྲིད་གཞུང་བཅས་ཀྱིས་མཉམ་འབྲེལ་ཐོག་གཙོ་གཉེར་བྱས་པ་དང་།དེའི་དམིགས་ཡུལ་ནི་ལི་ཐང་རྫོང་གི་དམིགས་བསལ་ཞིང་ཐོན་སྤུས་ལེགས་འགྲེམས་སྟོན་དང་ས་ཁོངས་ཀྱི་ཐོན་སྐྱེད་དང་ཚོང་གཉེར་མཉམ་ལས་གཏིང་ཟབ་ཏུ་གཏོང་བ། ཡུལ་སྡེ་དར་རྒྱས་ཡོང་བར་རོགས་རམ་བྱ་རྒྱུ་བཅས་རེད།
ལི་ཐང་རྫོང་ནས་ཡོང་བའི་ཕུལ་བྱུང་ཁེ་ལས་ལྔའི་འཐུས་མིས་ཐོན་རྫས་སྣ་ཚོགས་ཀྱི་ཁྱད་ཆོས་དང་འཚོ་བཅུད་རིན་ཐང་ངོ་སྤྲོད་ཞིབ་ཕྲ་བྱས་ཤིང་།ཐོན་ལས་ཀྱི་སྣ་མང་འཕེལ་རྒྱས་དང་གསར་གཏོད་ཀྱི་གསོན་ཤུགས་མངོན་ཡོད། ཐོན་སྐྱེད་ཕྱིར་ཚོང་མཉམ་ལས་ཀྱི་གན་རྒྱ་འཇོག་དུས་ལི་ཐང་རྫོང་དཔལ་འབྱོར་ཆ་འཕྲིན་དང་ཚོང་དོན་མཉམ་ལས་ཅུས་ཀྱིས་ཁྲེང་ཏུའུ་ཁེ་ལས་མང་པོ་དང་འཛད་སྤྱོད་རོགས་རམ་གྲོས་མཐུན་བཞག་པ་དང་ལི་ཐང་ས་གནས་དེ་གའི་ཁེ་ལས་ཀྱིས་ཀྱང་ཤིན་ཏུའུ་དང་ཅིན་ཐང་གི་འབྲེལ་ཡོད་ཁེ་ལས་དང་ཐོན་སྐྱེད་ཕྱིར་ཚོང་མཉམ་ལས་བྱས་ནས་འདོད་མོས་གྲོས་མཐུན་སྒོར་ཁྲི1000ལ་ཉེ་བ་བཞག་ཡོད།མཛད་སྒོ་སྤེལ་བ་དེས་ལི་ཐང་དང་ཁྲེང་ཏུའུ་གཉིས་ཀྱི་མཉམ་ལས་དུས་མཚམས་གསར་པར་སླེབས་པ་མཚོན་པ་དང་ཞིང་ལས་ཐོན་རྫས་མཁོ་སྤྲོད་འབྲེལ་ཐག་དང་རིམ་སྤོར་བྱ་བར་རྨང་གཞི་བརྟན་པོ་བཏིང་ཡོད།
བྱེད་སྒོའི་ཡུལ་དངོས་སུ་ལི་ཐང་གི་ཁྱད་ལྡན་ཞིང་ལས་ཐོན་རྫས་འགྲེམས་སྟོན་ཁུལ་བཙུགས་ནས་ཟོག་ཤ་དང་། ནས་ཀྱི་ཟས་རིགས།མཐོ་སྒང་སྦྲང་རྩི། རི་སྐྱེས་ཤ་མོ་སོགས་ཐོན་རྫས་སྤུས་ལེགས་རབ་དང་རིམ་པ་གཅིག་སྡུད་ཐོག་འགྲེམས་སྟོན་བྱས་ནས་སྐུ་མགྲོན་མང་པོས་མྱོང་རོལ་བྱས་ཡོད།
ད་ཐེངས་ཀྱི་མཚམས་སྦྱོར་ཚོགས་འདུ་ནི་ཐོན་རྫས་འགྲེམས་སྟོན་དང་ཐོན་སྐྱེད་ཕྱིར་ཚོང་སྦྲེལ་མཐུད་ཀྱི་ཚོགས་འདུ་གཟབ་རྒྱས་ཤིག་ཡིན་པར་མ་ཟད། ལི་ཐང་དང་ཤིན་ཏུའུ། ཅིན་ཐང་བཅས་དབར་མཉམ་ལས་གཏིང་ཟབ་དང་འཕེལ་རྒྱས་ཐུན་མོང་དུ་འཚོལ་ཞིབ་བྱེད་པའི་ལག་ལེན་གལ་ཆེན་ཞིག་ཀྱང་ཡིན། འབྱུང་འགྱུར་ལི་ཐང་གིས་མུ་མཐུད་ཁ་གཏད་རོགས་སྐྱོར་ལམ་སྲོལ་ལ་བརྟེན་ནས་མཉམ་ལས་ཁྱབ་ཁོངས་རྒྱ་སྐྱེད་བཏང་ནས་མཐོ་སྒང་ཐོས་རྫས་རྩ་ཆེན་དེ་བས་མང་བ་གྲོང་ཁྱེར་དང་རྒྱལ་ཡོངས་སུ་བསྐྱོད་པར་བསྐུལ་ནས་ཡུལ་སྡེ་དར་རྒྱས་ཡོང་བར་རྒྱུན་མཐུད་སྒུལ་ཤུགས་བསྣན་རྒྱུ་ཡིན་པ་རེད།
ཤེས་རྟོགས་བྱུང་བར་གཞིགས་ན། ཤིན་ཏུའུ་ཆུས་དང་ཅིན་ཐང་རྫོང་གི་རྒྱབ་སྐྱོར་འོག། ཐུན་མོང་ཐོག་ལི་ཐང་གི་ཞིང་འབྲོག་ཐོན་རྫས་གོང་སྐྱོད་དང་ཕྱི་འདྲེན་ཟོག་འགྲེམས་ཀྱི་ཚད་བཀག་གཏོར་ནས་སྐྱེལ་འདྲེན་མ་གནས་བརྒྱ་ཆ60ཙམ་གྲོན་ཆུང་བྱས་ཡོད། ད་སྔའི་བར་ས་གནས་གཉིས་ཀྱི་ཐབས་ལམ་ཁག་གིས་ལི་ཐང་གི་འཛད་སྤྱོད་ལ་བསྡོམས་རྩིས་བྱས་ནས་སྒོར་ཁྲི་སྟོང་ལྷག་རོགས་སྐྱོར་བྱས་ཡོད་པ་རེད།།
（ ཀུན་དགས་བསྒྱུར།）