（ པར་ངོས་དང་པོར་མཐུད།）ཧྥ་ཀྲུང་རྒྱལ་ཁབ་གཉིས་པོར་ལོ་རྒྱུས་རིག་གནས་ཡུན་རིང་ལྡན་པ་དང་། རྒྱལ་ཁབ་གཉིས་པོའི་མི་དམངས་ཀྱིས་མཛེས་སྡུག་ལྡན་པའི་འཚོ་བ་དོན་གཉེར་བྱེད་སྟངས་གཅིག་མཚུངས་ཡིན་པས། ཧྥ་ཀྲུང་མཉམ་ལས་ཀྱིས་འཕེལ་རྒྱས་དང་དར་རྒྱས་མཉམ་དུ་དོན་གཉེར་བྱས་ཏེ། རྒྱལ་ཁབ་གཉིས་པོའི་མི་དམངས་ལ་བདེ་སྐྱིད་སྐྲུན་དགོས།
རྒྱལ་ཁབ་གཉིས་པོའི་གཙོ་བདག་སྟངས་དཔྱལ་གྱིས་གནའ་བོའི་བསིལ་ཁང་འོག་བཞུགས་ཏེ། གསོལ་ཇ་མཆོད་ཞོར་གནམ་འོག་གི་དོན་ཆེན་གླེང་གནང་བ་རེད།
ཞི་ཅིན་ཕིང་གིས་ནན་གསུང་གནང་དོན། རྒྱལ་ཁབ་སྟོབས་འབྱོར་ལྡན་པ་དང་མི་རིགས་བསྐྱར་དར་ཡོང་བར་དངོས་པོའི་དཔལ་ཡོན་གསོག་འཇོག་བྱེད་དགོས་པར་མ་ཟད། བསམ་པའི་དཔལ་ཡོན་ཡང་ཕུན་སུམ་ཚོགས་སུ་གཏོང་དགོས། རིག་གནས་ཀྱི་གདེང་ཚོད་ལྡན་པའི་མི་རིགས་ཤིག་ཡིན་ཕྱིན་ད་གཟོད་ཡར་ལངས་ཐུབ་པ་དང་། བརྟན་པོར་ལངས་ཐུབ་པ། རྒྱང་རིང་པོར་སྐྱོད་ཐུབ། ཀྲུང་ཧྭའི་ཤེས་དཔལ་ནི་འཛམ་གླིང་ཐོག་རྒྱུན་གཏན་ནས་ཆད་མྱོང་མེད་ལ། རྒྱལ་ཁབ་ཀྱི་རྣམ་པའི་ཐོག་ནས་ད་བར་འཕེལ་རྒྱས་བྱུང་བའི་རླབས་ཆེན་གྱི་ཤེས་དཔལ་འབའ་ཞིག་ཡིན་ཞིང་། དེར་རྒྱུན་མཐུད་རང་བཞིན་དང་། གསར་གཏོད་རང་བཞིན། གཅིག་གྱུར་རང་བཞིན། བསྟུན་མཁས་རང་བཞིན། ཞི་བདེའི་རང་བཞིན་བཅས་མངོན་གསལ་དོད་པོ་ཡོད། ཀྲུང་ཧྥ་རྒྱལ་ཁབ་གཉིས་པོ་ནི་ཁག་སོ་སོར་ཤར་ཕྱོགས་དང་ནུབ་ཕྱོགས་ཤེས་དཔལ་གྱི་ཁྱད་དུ་འཕགས་པའི་མཚོན་བྱེད་ཅིག་ཡིན། རྒྱལ་ཁབ་གཉིས་པོར་ལྡན་པའི་རང་བཙན་རང་བདག་གི་སྙིང་སྟོབས་ནི་རང་སོ་སོའི་གཏིང་ཟབ་པའི་རིག་གནས་ཀྱི་རྨང་གཞི་ལས་བྱུང་བ་ཞིག་ཡིན། ཀྲུང་ཧྥའི་དབར་ཕྱི་འབྲེལ་བཙུགས་པ་དེ་ནི་རང་བཙན་རང་བདག་གི་རྒྱལ་ཁབ་གཉིས་པོ་ཕན་ཚུན“ལག་པ་བཏང་བ” ཞིག་ཡིན་པར་མ་ཟད། འོད་སྟོང་འབར་བའི་ཤེས་དཔལ་ཆེན་པོ་གཉིས་མཉམ་འདྲེས་བྱེད་པ་ཞིག་ཀྱང་ཡིན། འགྱུར་ལྡོག་དང་ཟང་ཟིང་མཉམ་གནས་ཀྱི་རྒྱལ་སྤྱིའི་དུས་བབ་ཀྱི་མདུན་དུ། ལོ་རྒྱུས་དང་རིག་གནས་ཀྱི་རྒྱལ་ཁབ་ཆེན་པོ་གཉིས་ཡིན་པའི་ཀྲུང་ཧྥ་རྒྱལ་ཁབ་གཉིས་པོས་གླེང་མོལ་དང་མཉམ་ལས་བརྒྱུད། ཐུན་མོང་ཐོག་འཛམ་གླིང་གི་ཞི་བདེ་བརྟན་ལྷིང་དང་མིའི་རིགས་ཀྱི་འཕེལ་རྒྱས་ཡར་ཐོན་ལ་ལེགས་སྐྱེས་དེ་བས་ཆེ་བ་འབུལ་ཐུབ་ངེས་ཡིན་པའི་ཡིད་ཆེས་ཡོད།
མཱ་ཁེ་ལུང་གིས་མིག་སྔའི་རྒྱལ་སྤྱིའི་དུས་བབ་ལ་མགྱོགས་མྱུར་འགྱུར་ལྡོག་འབྱུང་བཞིན་ཡོད་པ་དང་ངེས་གཏན་མེད་པའི་རང་བཞིན་གྱིས་ཁེངས་ཡོད། ཧྥ་རན་སེ་ཕྱོགས་ཀྱིས་ཀྲུང་གོ་ཕྱོགས་དང་འབྲེལ་གཏུག་མཐུན་སྦྱོར་ལ་ཤུགས་སྣོན་བརྒྱབ་ནས་གླེང་མོལ་གྲོས་མོལ་བརྒྱུད་གདོང་གཏུགས་ཐག་གཅོད་བྱ་རྒྱུ་མཐའ་འཁྱོངས་བྱས་ཏེ། ལག་གདང་སྦྲེལ་ནས་འཛམ་གླིང་གི་ཞི་བདེ་བརྟན་ལྷིང་སྲུང་སྐྱོང་བྱེད་འདོད་ཡོད་ཅེས་གསུངས་པ་རེད།
ཞི་ཅིན་ཕིང་སྟངས་དཔྱལ་གྱིས་མཱ་ཁེ་ལུང་སྟངས་དཔྱལ་དགུང་ཚིགས་ལ་གདན་ཞུ་གནང་ནས་མུ་མཐུད་སྤེལ་རེས་གཏིང་ཟབ་གནང་བ་རེད།
རྒྱལ་ཁབ་གཉིས་པོའི་གཙོ་བདག་གིས་འབྲེལ་གཏུག་དམ་ཟབ་རྒྱུན་འཁྱོངས་ནས་ཀྲུང་ཧྥའི་ཕྱོགས་ཡོངས་ཀྱི་འཐབ་ཇུས་རོགས་ཟླའི་འབྲེལ་བ་རྒྱུན་ཆད་མེད་པར་མདུན་ཕྱོགས་སུ་འཕེལ་རྒྱས་འགྲོ་བར་ལྷན་དུ་སྐུལ་འདེད་གཏོང་རྒྱུའི་མོས་མཐུན་མགྲིན་གཅིག་ཏུ་གནང་བ་རེད།
འཚམས་འདྲིའི་རིང་ཕྱོགས་གཉིས་པོས་གོ་ལ་ཧྲིལ་པོའི་བཅོས་སྐྱོང་ལ་ཤུགས་རྒྱག་པ་དང་། གོ་ལ་ཧྲིལ་པོའི་གནམ་གཤིས་དང་ཁོར་ཡུག་གི་འགྲན་སློང་ལ་ཁ་གཏད་གཅོག་པ། ཞི་བདེའི་ངང་ཉིང་རྡུལ་ནུས་པ་བེད་སྤྱོད་ཁྱབ་ཁོངས་ཀྱི་མཉམ་ལས་ལ་མུ་མཐུད་སྐུལ་འདེད་གཏོང་བ། ཞིང་ལས་དང་བཟའ་བཅའི་སྤེལ་རེས་དང་མཉམ་ལས། ཡུག་རེན་གྱི་དུས་བབ་དང་ཕ་ལེ་སི་ཐན་གྱི་དུས་བབ་བཅས་ཀྱི་ཐད་མཉམ་འབྲེལ་གསལ་བསྒྲགས་སྤེལ་གནང་བ་རེད།
ཝང་དབྱི་གོང་གསལ་གྱི་བྱེད་སྒོར་ཞུགས་པ་རེད།།（ མི་དམངས་ཉིན་རེའི་ཚགས་པར་ནས་དྲངས།）