（ པར་ངོས་དང་པོར་མཐུད།）

བགྲོད་ལམ་གྱི་ཤོང་ཚད་ཆེ་རུ་བཏང་ནས་ཁྲེང་ཏུའུ་གྲོང་ཁྱེར་ནང་ཁུལ་གྱི་རླངས་འཁོར་འགྲོ་འོང་ཕན་ནུས་ཆེ་རུ་ཕྱིན་ཡོད།ད་ལོའི་ལོ་མཇུག་ཏུ། རིང་ཚད་སྤྱི་ལེ240ལས་བརྒལ་བའི་ཁྲེང་ནན་མྱུར་བགྲོད་གཞུང་ལམ་ཤོང་ཚད་ཆེར་གཏོང་ལས་གཞི（ཁྲེང་ཏུའུ་ནས་ནན་ཁྲུང་བར）ཡི་ལམ་ཐིག་ཧྲིལ་པོར་རླངས་འཁོར་ཤར་གཏོང་ཐུབ་རྒྱུ་དང་། དེ་ནི་སི་ཁྲོན་གྱི་མྱུར་བགྲོད་གཞུང་ལམ་སྔར་གནས་ཐོག་རྒྱ་བསྐྱེད་གཏོང་བའི་གཞི་ཁྱོན་ཆེ་ཤོས་དང་ལམ་ཚད་རིང་ཤོས་ཀྱི་ཤོང་ཚད་ཆེ་རུ་གཏོང་བའི་ལས་གྲྭ་ཞིག་ཡིན་ལ། ཞིང་ཆེན་ཡོངས་ཀྱི་ཆེས་རིང་བའི་མཉམ་གཤིབ་འཁོར་ལམ8ཀྱི་མྱུར་བགྲོད་གཞུང་ལམ་ཞིག་ཀྱང་ཡིན་པ་རེད།

གཞུང་ལམ་དྲྭ་རྒྱའི་ཞན་ཆ་ཁ་གསབ་བྱས་ཏེ། ལིའང་ཧྲན་ཁུལ་ལེ་པོ་རྫོང་དང་རྔ་བ་ཁུལ་ཧུང་ཡོན་རྫོང་། ལིའང་ཧྲན་ཁུལ་ཅིན་དབྱང་རྫོང་བཅས་རྫོང་གསུམ་གྱི་མྱུར་བགྲོད་གཞུང་ལམ་མེད་པའི་ལོ་རྒྱུས་མཇུག་འགྲིལ་བ་རེད། སྔོན་དཔག་བྱས་ན་ལོ་མཇུག་བར་སི་ཁྲོན་དུ་མྱུར་བགྲོད་གཞུང་ལམ་ཤར་གཏོང་ཐུབ་པའི་རྫོང（གྲོང་ཁྱེར་དང་ཁུལ）152ལ་ཟིན་རྒྱུ་ཡིན་པ་རེད།

འགྲིམ་འགྲུལ་དང་ཡུལ་སྐོར་མཉམ་འདྲེས་ལ་སྐུལ་འདེད་བཏང་སྟེ། ད་ལོའི་ཟླ་བ9པར་རླངས་འཁོར་ཤར་གཏོང་ཐུབ་པའི་གཟི་རྩ་སྡེ་དགུ་ནས་མེན་དབྱང་བར་གྱི་མྱུར་བགྲོད་གཞུང་ལམ་གྱིས་གཟི་རྩ་སྡེ་དགུ་དང་གསེར་མཚོ་སོགས་རིག་གནས་ཡུལ་སྐོར་ཐོན་ཁུངས30ལྷག་སྦྲེལ་མཐུད་བྱས་ནས་འགྲིམ་འགྲུལ་དང་ཡུལ་སྐོར་མཉམ་འདྲེས་ཀྱི་རྣམ་ཚུལ་ཆགས་པ་རེད། ལོ་མཇུག་ཏུ་ལྕགས་ཟམ་ཁ་ནས་སྲིབ་སྨད་བར་གྱི་མྱུར་བགྲོད་གཞུང་ལམ་ཁག་ཅིག་ལ་རླངས་འཁོར་ཤར་གཏོང་ཐུབ་པས་ཁྲེང་ཏུའུ་ནས་དུང་དཀར་ལུང་པའི་བར་གྱི་རླངས་འཁོར་ལམ་ཚད་ཆུ་ཚོད3.5ཐུང་དུ་འགྲོ་རྒྱུ་རེད།

སྐྱེ་ཁམས་སྔོན་སྤེལ་བྱ་རྒྱུ་རྒྱུན་འཁྱོངས་ཏེ་ལས་གྲྭའི་འཛུགས་སྐྲུན་དང་ཁོར་ཡུག་སྲུང་སྐྱོང་མཐུན་སྦྱོར་ངང་མཉམ་སྤེལ་བྱ་དགོས།

ད་ལོར་སི་ཁྲོན་གྱིས་གཞུང་ལམ་དང་ཆུ་ལམ་ཐད་མ་དངུལ་འཇོག་ཚད་སྒོར་དུང་ཕྱུར2680ལས་བརྒལ་ནས་ལོ་རྒྱུས་ཀྱི་ཟིན་ཐོ་གསར་པ་བཏོད་ཡོད། “ལོ་ལྔའི་འཆར་འགོད་བཅུ་བཞི་པའི”རིང་སི་ཁྲོན་གྱི་གཞུང་ལམ་དང་ཆུ་ལམ་འཛུགས་སྐྲུན་ཐད་རིམ་རྩིས་བྱས་ན་མ་དངུལ་སྒོར་དུང་ཕྱུར་ཁྲི1ལྷག་བཏང་ནས“ལོ་ལྔའི་འཆར་འགོད་བཅུ་གསུམ་པའི”རྗེས་སུ་སླར་ཡང་རྒྱལ་ཡོངས་ཀྱི་མདུན་གྲལ་དུ་སླེབས་པ་རེད།ལོ་བཞི་བསྟུད་མར་སྒོར་དུང་ཕྱུར2000ལས་བརྒལ་བ་དང་། ལོ14བསྟུད་མར་སྒོར་དུང་ཕྱུར1000ལས་བརྒལ་བའི་ཟིན་ཐོ་བཏོད་པ་རེད།།

（ ལྷ་འཛོམས་ཀྱིས་བསྒྱུར།）