སྤྱི་ཟླ12པའི་ཚེས2ཉིན། དཀར་མཛེས་ཁུལ་གྱིས་ཕྱི་རྣམ་རིང་ལུགས་བཅོས་སྒྲིག་བྱས་ཏེ་གཞི་རིམ་གྱི་ཁུར་པོ་ཡང་དུ་གཏང་བའི་ཆེད་གཉེར་ལས་དོན་ལམ་སྲོལ2025ལོའི་ཚོགས་འདུ་ཐེངས་བཞི་པ་དར་མདོར་འཚོགས། ཚོགས་འདུར་ཀྲུང་དབྱང་དང་ཞིང་ཆེན་གྱི་ཕྱི་རྣམ་རིང་ལུགས་བཅོས་སྒྲིག་བྱས་ནས་གཞི་རིམ་གྱི་ཁུར་པོ་ཡང་དུ་གཏང་བའི་ཆེད་གཉེར་ལས་དོན་ལམ་སྲོལ་ཚོགས་འདུའི་སྙིང་དོན་དང་། ཞིང་ཆེན་ཏང་ཨུ་དང་ཁུལ་རྒྱུན་ལས་ཨུ་ཡོན་ལྷན་ཁང་གི་ཚོགས་འདུའི་སྙིང་དོན་བརྒྱུད་བསྒྲགས་དང་སློབ་སྦྱོང་ལག་བསྟར་བྱས་ནས་གོམ་རིམ་རྗེས་མའི་ལས་དོན་ལ་བཀོད་སྒྲིག་བྱས། ཁུལ་ཨུའི་རྒྱུན་ཨུ་དང་དྲུང་ཆེན། ཁུལ་ཆེད་དོན་ལས་ཀའི་ལམ་སྲོལ་ཚོགས་འདུ་སྡུད་མཁན་ཁྲེན་པོ་ཐའོ་ཚོགས་འདུར་ཞུགས་ཤིང་གཏམ་བཤད་བྱས།

ཚོགས་འདུར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཕྱི་རྣམ་རིང་ལུགས་ཡོ་བཅོས་རྒྱུན་མཐུད་དང་གཞི་རིམ་ཁུར་པོ་ཡང་དུ་གཏང་བའི་ལས་ཀར་མཆན་བཀོད་མཛུབ་སྟོན་ཐེངས་མང་བྱས་ཏེ་བཅོས་སྒྲིག་ལས་དོན་གཏིང་ཟབ་ཏུ་གཏང་བར་གཞི་འཛིན་ས་གལ་ཆེན་འདོན་སྤྲོད་བྱས། ཞིང་ཆེན་ཏང་ཨུས“ཡོ་བཅོས་དྲུག”གི་གཙོ་གནད་ལས་འགན་བཀོད་སྒྲིག་བྱས་ཏེ། གནད་དོན་གྱི་དོ་གནད་ལ་རྒྱུན་འཁྱོངས་དང་ལྷོད་གཡེང་མེད་པའི་བླང་བྱ་བཏོན་ནས་ཁུར་པོ་ཡང་དུ་གཏང་བའི་ལས་དོན་དམ་འཛིན་བྱས། ཁུལ་ཨུས་ཆབ་སྲིད་ཚུགས་གནས་མཐོར་འདེགས་བྱས་ཏེ་གཟེར་རྒྱག་པའི་སྙིང་སྟོབས་ལ་བརྟེན་ནས་ཀྲུང་དབྱང་དང་ཞིང་ཆེན་ཏང་ཨུའི་ཐབས་ཇུས་བཀོད་སྒྲིག་ཕྱོགས་ཡོངས་ནས་ལག་བསྟར་དོན་འཁྱོལ་བྱ་རྒྱུ་དང་། རྒྱུན་མཐུད་ངང་ཕྱི་རྣམ་རིང་ལུགས་བཅོས་སྐྱོང་གཏིང་ཟབ་ཏུ་བཏང་ནས་གཞི་རིམ་གྱི་ཁུར་པོ་ཡང་དུ་བཏང་སྟེ་ལས་སྒྲུབ་ལས་གཏོད་ཀྱི་རྣམ་པ་བཟང་པོ་གཏོད་དགོས་པའི་ནན་བཤད་བྱས་པ་རེད།

ཚོགས་འདུར་བསྟན་དོན།ཡོ་བཅོས་གྲུབ་འབྲས་མྱུར་ཕན་དང་རྨོངས་ཚོད་ཀྱིས་ཇུས་ཐག་གཅོད་པ།བསྡོམས་རྩིས་རྫུན་བཟོ།དཔྱད་བསྡུར་གཟེངས་བསྟོད་དང་གསར་བཟོ་དཔེ་སྟོན་བྱེད་སྒོ་སྤེལ་བ།གཞི་རིམ་གྱི་མངོན་མེད་ཁུར་པོ་དང་།“ཚོགས་འདུ་དང་ཡིག་ཆ་མང་པོ་སྤེལ་བ”དང་སྤུས་ཚད་དང་ཕན་འབྲས་ཆེན་པོ་མེད་པ།ལྟ་སྐུལ་ཞིབ་བཤེར་དང་བརྟག་དཔྱད་ཞིབ་འཇུག།ཕན་ཚུན་སློབ་སྦྱོང་བྱེད་པའི་ཕྱི་རྣམ་རིང་ལུགས་སོགས་ཕྱོགས་དྲུག་གི་གནད་དོན་ལ་དམིགས་ནས་བཅོས་སྐྱོང་མཐའ་འཁྱོངས་ཏེ་ཡུན་རིང་བཅོས་སྐྱོང་བྱས་པའི་གནད་དོན་རྙིང་པ་དང་མངོན་མེད་ཐབས་སྒྱུར་ཀྱི་གནས་ཚུལ་གསར་པ་བཅོས་སྒྲིག་བྱེད་པར་སྐུལ་འདེད་ཏན་ཏིག་བཏང་སྟེ།གཞི་རིམ་ཁུར་པོ་ཡང་དུ་གཏང་བར་ནུས་པ་རྒྱུན་མཐུད་འདོན་སྤྲོད་བྱ་དགོས།

ཚོགས་འདུར་བླང་བྱ་བསྟན་དོན།ཁུལ་དང་རྫོང་རིམ་པའི་ཆེད་དོན་ལས་ཀའི་ལམ་སྲོལ་གྱིས་གཅིག་གྱུར་འཆར་འགོད་ཀྱི་མཐུན་སྦྱོར་ནུས་པ་འདོན་སྤེལ་བྱེད་དགོས་པ་དང་།འགན་ཁུར་སྡེ་ཚན་རིམ་པ་ཁག་གིས་གཙོ་འགན་ཁུར་བ། རྒྱུན་གཏན་རང་བཞིན་གྱི་གནད་དོན་ཤེས་རྟོགས་ལམ་སྲོལ་འཐུས་ཚང་དུ་གཏང་བ།གནད་དོན་གྱི་ཁུངས་སྣེ་འཚོལ་སྡུད་བྱེད་པ།དཔེ་མཚོན་གནད་དོན་དག་ཐེར་བཅོས་སྒྲིག་གི་ལས་དོན་རྗེས་མ་དམ་འཛིན་བྱས་ཏེ་དག་ཐེར་བཅོས་སྒྲིག་ལས་དོན་ལ་གྲུབ་འབྲས་གསར་པ་ཐོབ་པར་འགན་ལེན་བྱ་དགོས།

ཚོགས་འདུ་དེ་བརྙན་འཕྲིན་ཁ་པར་ཚོགས་འདུའི་རྣམ་པས་འཚོགས་ཤིང་།ཁུལ་དང་རྫོང（གྲོང་ཁྱེར）ཆེད་དོན་ལས་ཀའི་ལམ་སྲོལ་སྡེ་ཚན་གྱི་འགན་འཁུར་བློ་མཐུན་དང་འབྲེལ་གཏུག་མི་སྣ། འབྲེལ་ཡོད་སྡེ་ཁག་གི་འགན་འཁུར་བློ་མཐུན་སོགས་ཚོགས་འདུར་ཞུགས།། （ ཡེ་ཤེས་ཀྱིས་བསྒྱུར། ）