གནམ་གྱི་མཐའ་ལ་ལྟ་ཚེ་སྤྲིན་པ་དཀར་བོ་ཞིག་རྒྱང་ནས་རྒྱང་དུ་བཞུད། སེམས་ཀྱིས་སེམས་ལ་ཅེར་ཚེ་ལས་ཀྱི་ཞེ་འདང་ཞིག་མ་བཤད་ཐུགས་ལ་འཁྲུངས། ངའི་སྙིང་ཆུང་དམར་པོའི་འཕར་ལྡིང་གི་མཚམས་ལ་དགུན་གྱི་མེ་ཏོག་ཅིག་གི་ཚུལ་དུ། ངའི་མིག་ཟུང་ཁྲ་མོའི་ཞེན་ཆགས་ཀྱི་ཀློང་ན་མཚམས་སྤྲིན་གློ་ཁ་ཞིག་གི་ཚབ་ཏུ། དུས་གསུམ་གྱི་ཁ་ཆད་མ་བོར་བའི་རྟེན་འབྲེལ་གྱི་ཁ་བཏགས་དཀར་པོ་ཁྱོད་སྟེང་ཕྱོགས་ལྷ་ཡིས་ཐུགས་རྗེས་གཟིགས་སམ། བརྩེ་འདང་གི་མདུད་པ་མ་ལྷོད་པའི་ལས་བསྐོས་ཀྱི་ཁ་ཡིག་དཀར་པོ་ཁྱོད་ཀྱང་བྱམས་པའི་ལྷ་ཡིས་སྙིང་རྗེ་དགོངས་སམ།

ལོ་ཟླ་མགྱོགས་དྲགས་པའི་དབང་གིས་ལས་དབང་གིས་མ་ཟིན་པའང་ཁྱོད་ཁོ་ན་མིན་ལ། ལོ་ཟླ་དལ་དྲགས་པའི་དབང་གིས་སེམས་ཀྱིས་མ་མཐོང་བའང་ང་ཁོ་ན་ཡིན་མི་སྲིད། ད་ལྟ་གཙང་ཆུ་རྒྱང་དུ་ཕྱོགས་པའི་བཞུར་རྒྱུན་རིང་མོ་དེའང་འཁྱག་པས་བསྡམས་ཤིང་། མཚན་གཞུང་ཙག་གིས་ཟིན་པའི་གློག་འོད་སེར་པོ་དེ་དག་ཀྱང་སྒེའུ་ཁུང་དུ་གསལ་བའི་དགུན་ཁ་འདིར། སེམས་ཀྱི་གཏིང་ལ་ཟུག་པའི་དྲོད་འཁོལ་ཞིག་བྱུང་བའང་ཁྱེད་ཀྱི་ལག་ཟུང་གིས་ཡིན་ཏེ། རྨི་ལམ་ཡང་ཡང་དཀྲོགས་པའི་ཞེ་འདང་རེ་བྱུང་བའང་ཁྱེད་ཀྱི་མིག་ཟུང་གིས་ཡིན་པས། ཁྱོད་ཀྱི་ཕྱོགས་སུ་ཤོར་བའི་དྲན་གདུང་ཚིག་འབྲུ་རིང་མོ་ཞིག་ཀྱང་དོ་ནུབ་ཀྱི་རླུང་ལ་བསྐུར་དགོས་བྱུང་།

ངས་གློ་བུར་བའི་དུས་སྐབས་འདི་ལ་བརྩེ་བ་ཡིད་དུ་སྒོམ་ཞིང་། གྱེས་པའང་དྲན་པའི་གཏིང་ལ་འཁོར་དུས། དྲན་པས་མི་ཟིན་པའི་རི་ཚོགས་ཁྲི་སྟོང་གི་ཕ་མཐའ་ཡང་ཁྱོད་ཀྱིས་བརྒལ་ཅིང་། སེམས་ཀྱིས་མ་ཆོད་པའི་གཙང་ཆུ་བརྒྱ་ཕྲག་གི་རབ་ཁ་ཡང་ཁྱོད་ཀྱིས་བཅད་པས། ངས་སེར་ཤ་འཁོར་བའི་ཟི་ལིང་གི་མཚམས་སྤྲིན་དང་ནུབ་ཀྱི་ཐོག་ཁང་གི་གྲིབ་མར་ཅེར་ནས་ཡུན་རིང་ལུས། དབུགས་རིང་ཡུན་གཅིག་གི་ཙམ་དུ་ཁྱོད་ཀྱིས་མག་མོག་གི་རྒྱབ་གཟུགས་ཤིག་ང་ལ་བཞག་ནས། རབ་རིབ་ཀྱི་ལས་འཕྲོ་ཐུང་ཐུང་ཞིག་ཀྱང་ང་ལ་བསྐྱུར་ནས། སྐྱོ་བསྔལ་གྱི་ཁྲོད་དུ་མི་ཚོགས་ཀྱི་དཀྱིལ་བར་གཤགས་ནས་འགྲོ་དགོས་བྱུང་བའང་ངའི་སེམས་ངོས་སུ་ད་དུང་གསལ།

དོ་ནུབ། རྒྱ་མི་ཞིག་གིས“གལ་ཏེ་ཡོད་ཚད་བསྐྱར་དུ་འབྱུང་བའི་དུས་སྐབས་ཤིག་བྱུང་ཚེ། ངས་དོ་ནུབ་ནས་ཡིན་ན་བསམ”ཞེས་པའི་སྐད་ཆ་འདི་ཡིད་དུ་ཡང་ཡང་འཆར་གྱིན་འདུག། ངས་ཆེས་སྐད་ཅིག་མའི་འཆར་ཡན་དང་མཛེས་སྡུག་གི་དུས་ཚོད་དེ་བརྗེད་ཐབས་མེད་པས་ལན་སོང་ངམ། ཡང་ན་ངས་ཆེས་སྐད་ཅིག་མར་དབང་བའི་ནང་སེམས་ཀྱི་བརྩེ་བ་དང་ལས་འཕྲོ་དེ་ཡང་བསྐྱར་རྙེད་ཐབས་མེད་པས་ལན། རྨི་ལམ་དང་འདྲ་བའི་སེམས་པ་ཆུང་ཆུང་ཞིག་གི་སྣེ་མོ་ནས་གདུང་བས་དབྱངས་སུ་བཀུག་པའི་ཤུགས་རིང་གི་ཡིག་འབྲུ་འདི་ཚོ། ཁྱོད་ཀྱིས་བཀླག་ཤེས་སམ། རྨི་ལམ་གྱི་མགྲོན་པོ།།

༼ མདའ་ཅང་ཤེས།༽