འཛུམ་པའི་མིག་ཟུང་དྲན་པའི་པང་དུ་འཁོར།།
སྤྲིན་ནག་སྟུག་པོས་སེམས་ཀྱི་འོད་ཟེར་གཡོགས།།
ཅི་འདི་མེད་པའི་རྟོག་བཏགས་ཕོ་བྲང་ནས།།
ཚོར་བ་བཏང་སྙོམས་ཐ་ཆུང་ཐ་ཆུང་ཉིད།།
སྙིང་ལ་ཉར་བའི་སྙིང་གི་ཚི་ལུ་དེ།།
དྲན་པའི་མཁར་རྫོང་ནང་དུ་ཡུན་གྱིས་གནས།།
རླུང་བུ་ཤག་ཤག་སྐྱོད་པའི་ཚུགས་ཀ་ལས།།
ནང་གི་དམར་ཆུང་ཆུ་རྡུལ་བྱེ་བས་བརླན།།
ཕུགས་བསམ་བརྒྱ་ལ་འཇའ་ཚོན་བརྒྱ་ཤར་ཚེ།།
བདག་ནི་སྙིང་ནད་ལྕི་མོས་སྟོང་འགྲོ་ངེས།།
ལས་ཀྱི་རྨི་ལམ་ནང་ནས་སད་མཐའ་ན།།
བསམ་པ་མུ་ཏིག་འདྲ་བོ་བོར་འགྲོ་ངེས།།
ཟླ་འོད་འཛུམ་པའི་མཚན་ལྗོངས་རིང་མ་ཐུང་།།
ཡིད་འོང་ཀུ་མུད་སྐྱེངས་པའི་འཁྲུལ་སྣང་ལས།།
ལས་ཀྱིས་ཕྱེས་པའི་དྲན་འཛིན་སྒེའུ་ཁུང་དུ།།
སྒྱུ་མའི་དྲི་བསུང་དལ་གྱིས་དལ་གྱིས་ཐུལ།།
གསེར་དངུལ་སྟོང་གིས་སྤྲས་པའི་འཕྲིན་ཡིག་ཏུ།།
ནང་གི་རྣམ་ཤེས་གསོན་པོ་འཁུམས་ནས་ཐལ།།
འཁུམས་པར་མ་ཟད་ལུས་ཀྱི་བ་སྤུ་ཡང་།།
གཟུགས་མེད་བསིལ་བུ་འཇམ་པོས་ཧད་ཀྱིས་འཐེན།།
ཁྲེལ་མེད་གྲང་ངར་ཁོང་དུ་བཙན་གྱིས་འཇབ།།
ཕྲན་གྱི་རྣམ་རྟོག་ཁྲི་ཤིང་རུས་པར་བྱས།།
སླར་ཡང་གསོན་པའི་སྨོན་ལམ་བྱེ་བ་ལས།།
ཅུང་ཙམ་རྒྱུས་མེད་ཐད་དུ་མངོན་པར་བྱུང་།།
འགྲམ་གྱི་པར་སྒམ་སྙིང་ལ་རྗེ་མོ་ཡིས།།
དབུགས་ཀྱི་ནམ་མཁའ་ཡང་དུ་བྱི་དོར་བྱེད།།
ཅུང་ཙམ་མིན་ན་མཆི་མ་ལྷུང་ཉེ་བའི།།
སྙིང་དུ་སྡུག་པའི་ཆུ་འཛིན་ཕར་ལ་བཞུད།།
ཐམས་ཅད་ཚོར་བས་ཐོར་གྱིས་སྦྲིད་པ་ན།།
ནང་གི་མགུར་གླུ་པད་དཀར་རང་གྲོལ་དེ།།
རྒྱུས་མེད་སེམས་ཀྱི་ལྷ་ལམ་ཡངས་མོ་ནས།།
ཁོ་བོའི་སྒྲ་འཛིན་དབང་དུ་ཡལ་བར་གྱུར།།
བཞུགས་གྲལ་པདྨའི་ཚལ་ལས་ཕྲན་ཆུང་གིས།།
རྟོག་བཏགས་སྒྱུ་མའི་ལག་ཟུང་ཕར་བསྐྱངས་ཏེ།།
རབ་མཛེས་ཨུཏྤལ་དཀར་པོ་འགའ་བཏུས་ནས།།
སྙན་ངག་བརྩེ་བའི་རྫང་དུ་བཞད་སྨོན་བྱས།།
ལོ་ཟླའི་འགྱུར་བག་ཚིག་དང་དབྱངས་ཀྱིས་བཙིམས།།
སྙན་དང་མི་སྙན་བར་ནས་ནང་དུ་བཙིམས།།
ཁྲེལ་པའི་ཟི་ར་ཡང་ཡང་འཚུབ་པ་ན།།
གློ་བུར་ཁྲོམ་པའི་ནང་ནས་སྐམ་པར་གྱུར།།
༼ འཕུར་སྐྱོད། ༽