ཅི་ཡང་མེད་ལ་ཅི་ཡང་འཆར་སྲིད་པས།།
ཟློས་གར་སྣ་ཚོགས་སྤུང་བའི་མེ་ལོང་ངོར།།
ཚོར་བའི་མེ་ཏོག་མགོ་ལྕོག་ལྡེམ་པ་ན།།
ཐ་སྙད་འཇམ་རྩུབ་བར་ནས་བྲོ་གར་རྩེ།།
སྣང་བའི་འཇའ་གུར་ཕུབ་དང་མ་ཕུབ་བར།།
བརྩེ་བའི་མཚོ་མོ་མཆིས་དང་མ་མཆིས་ཁྲོད།།
རིང་མ་ཐུང་གི་སྐར་མ་སྨིན་དྲུག་རེར།།
ཞག་དང་རྨི་ལམ་གྲོང་ནས་མཆོད་ཚུལ་གླེང་།།
སད་དང་མ་སད་བར་གྱི་རྟོག་པའི་ངོར།།
གྲུ་གསུམ་གྲུ་བཞི་བཟོས་པས་སྣང་བརྙན་ལ།།
རྩོད་གླེང་ཐལ་རྡུལ་འཚུབ་པའི་གཞིས་ཁྱིམ་ནས།།
གླེན་པ་མཁས་བརྗིད་ཉམས་ཀྱི་བར་ན་གདའ།།
ཙག་ལྷགས་གྲི་རྩེས་རྨས་པའི་སོ་ཁ་རུ།།
དགུན་ཟླ་མུ་ནག་སྟུག་པོའི་འཁྱག་རལ་ནང་།།
སྐྱོ་ལ་འཚུབ་པའི་ཆུ་འཛིན་སྨུག་ནག་གན།།
ང་དང་ལས་དབང་གཅིག་པས་མཉམ་དུ་གནས།།
༼ དབྱངས་ཞི་བ། ༽