ཞིན་ཧྭ་གསར་འགྱུར་ཁང་པེ་ཅིང་ནས་སྤྱི་ཟླ12པའི་ཚེས5ཉིན་གློག་འཕྲིན་འབྱོར་གསལ།གསར་འགོད་པས་ཚེས5ཉིན་རྒྱལ་ཡོངས་སྤྱི་ཁྱབ་བཟོ་ཚོགས་ནས་ཤེས་རྟོགས་བྱུང་བར་གཞིགས་ན། 2026ལོའི་ལོ་སར་དང་དཔྱིད་གསར་དུས་ཆེན་རིང་བཟོ་ཚོགས་ཀྱིས་དྲོ་སྐྱིད་སྐྱེལ་བའི་བྱ་སྤྱོད་དངོས་སུ་སྤེལ་འགོ་འཛུགས་ཏེ།དེ་རིང་ནས2026ལོའི་ཟླ3པའི་ཚེས3ཉིན་བར་རྒྱལ་ཡོངས་བཟོ་ཚོགས་མ་ལག་གིས་གཅིག་གྱུར་ཐོག་དྲོ་སྐྱིད་སྐྱེལ་བའི་བྱ་སྤྱོད་སྤེལ་ནས་ཏང་ཀྲུང་དབྱང་གི་ཐུགས་ཁུར་ཟབ་མོ་ལས་བཟོ་པའི་སེམས་སུ་བསྐྱལ་ནས་ཚང་མས་དྲོད་སྐྱིད་ལྡན་པའི་དགུན་ཁ་བསྐྱལ་བར་འགན་ལེན་བྱས་པ་རེད།

བཟོ་ཚོགས་ཀྱིས་དྲོ་སྐྱིད་སྐྱེལ་བའི་བྱ་སྤྱོད་དེ་དཀའ་ངལ་ཡོད་པའི་ལས་བཟོ་པ་དང་གཙོ་གནད་ཁྱུ་ཚོགས་ཀྱི་ལས་བཟོ་པ་བཅས་ཡིན།དེའི་ནང་དཀའ་ངལ་ཡོད་པའི་ལས་བཟོ་པའི་ཁྱུ་ཚོགས་ནི་མི་སྒེར་གྱི་འདོད་བློ་མིན་པར་ལས་བྲལ་ལས་ཤོར་དང་ཁྱིམ་ཚང་གི་ཡོང་འབབ་ཆུ་ཚད་དམའ་བ། བུ་རྒྱུད་ཀྱི་སློབ་གསོ་འགྲོ་གྲོན་ཆེ་བ་སོགས་རྐྱེན་གྱིས་ཁྱིམ་ཚང་གི་འཚོ་བར་དཀའ་ངལ་ཡོད་པའི་ལས་བཟོ་པ་དང་།རང་ཉིད་དམ་ཁྱིམ་མི་ལ་གནོད་འཚེ་ཚབས་ཆེན་ཐེབས་པ་དང་། ནད་ཚབས་ཆེན་ཕོག་པའམ་ཡང་ན་གློ་བུར་གྱི་རྐྱེན་ངན་བྱུང་བ་སོགས་ལས་ཁྱིམ་ཚང་གི་འཚོ་བར་དཀའ་ངལ་ཡོད་པའི་ལས་བཟོ་པ། དཀའ་ངལ་ཡོད་པའི་ཁེ་ལས་ཁྲོད་གླ་ཕོགས་མེད་པ་དང་གླ་ཕོགས་ཉུང་དུ་འགྲོ་བའི་རྐྱེན་གྱིས་འཚོ་བར་དཀལ་ངལ་ཡོད་པའི་ལས་བཟོ་པ། ལས་རྨས་དང་ལས་རིགས་ནད་ཀྱིས་དབང་པོར་སྐྱོན་ཤོར་བའི་ལས་བཟོ་པ་དང་། གཞུང་དོན་དུ་ཚེ་ལས་འདས་པའི་ལས་བཟོ་པའི་ཁྱིམ་མི།ནད་ཚབས་ཆེན་ཕོག་ནས་གཤགས་བཅོས་དང་སྨན་ཁང་དུ་སྡོད་པའི་ལས་བཟོ་པ་སོགས་ཡིན། གཙོ་གནད་ཁྱུ་ཚོགས་ཀྱི་ལས་བཟོ་པ་ནི་ལས་ཞུགས་གསར་པའི་ངལ་རྩོལ་པ་དང་སྟབས་བསྟུན་ལས་ཞུགས་མི་སྣ། རྒྱལ་ཁབ་ཀྱི་གཙོ་གནད་ལས་གྲྭ་དང་ལས་གཞི་འཛུགས་སྐྲུན་གལ་ཆེན་སོགས་གཙོ་གནད་མངའ་ཁོངས་ཀྱི་དུས་ཆེན་རིང་ལས་གནས་བརྟན་སྲུང་བྱེད་པའི་འཐབ་ཕྱོགས་དང་པོའི་ལས་བཟོ་པ་དང་དཀའ་ཚེགས་ཆེ་བའི་ལས་གནས་ཀྱི་ལས་བཟོ་པ། ངལ་རྩོལ་དཔེ་བཟང་དང་སྔོན་ཐོན་ལས་དོན་པ། བྱེད་སྒོ་གལ་ཆེན།ལས་འགན་གལ་ཆེན། གཙོ་གནད་ལས་གྲྭ་སོགས་ཀྱི་སྔོན་ཐོན་དཔེ་བཟང་མི་སྣ་སོགས་ཡིན་པ་རེད།

ཤེས་རྟོགས་བྱུང་བར་གཞིགས་ན། དྲོ་སྐྱིད་སྐྱེལ་རིང་རིམ་པ་ཁག་གི་བཟོ་ཚོགས་ཁེ་ལས་དང་བཟོ་ཁང་།ཐོན་སྐྱེད་འཐབ་ཕྱོགས་དང་པོར་བསྐྱོད་དེ་དཀའ་ངལ་ཡོད་པའི་ལས་བཟོ་པ་ཕྱོགས་ཡོངས་ནས་རྩད་གཅོད་བྱས་ཤིང་། རིགས་དབྱེ་ནས་ཐབས་ཇུས་ལག་བསྟར་དང་གནད་སྨིན་རོགས་སྐྱོར་བྱས་ནས་དཀའ་ངལ་ཡོད་པའི་ལས་བཟོ་པ་མི་གཅིག་ཀྱང་མི་ལུས་པ་དང་།གཙོ་གནད་ལས་གྲྭ་དང་གཙོ་གནད་ལས་གཞི།བཟོ་སྐྲུན། སྤྱི་འཁོར།ཁོར་ཡུག་འཕྲོད་བསྟེན་སོགས་གཙོ་གནད་ལས་རིགས་ལ་དོ་ཁུར་བྱ་རྒྱུ། གནོད་ཐེབས་དང་ཕྱི་ཕྱོགས་ཉོ་ཚོང་གི་ཕོག་ཐུག་ཐེབས་པ་སོགས་ཀྱི་གཙོ་གནད་ཁེ་ལས་ལ་དམིགས་ཏེ།ངལ་རྩོལ་དཔེ་བཟང་དང་དཀའ་ངལ་ཡོད་པའི་ལས་བཟོ་པ། ལས་ཞུགས་གསར་པའི་ངལ་རྩོལ་པ།སྟབས་བསྟུན་གྱི་ལས་ཞུགས་མི་སྣ་སོགས་གཙོ་གནད་ཁྱུ་ཚོགས་ལ་གཞིར་བཟུང་ནས་བཅར་འདྲི་དང་འཚམས་འདྲི་རྒྱ་ཁྱབ་སྤེལ་ཏེ། གཙོ་གནད་ཁྱུ་ཚོགས་དང་ལས་བཟོ་པར་དོ་ཁུར་བྱས་པ་རེད།

1992ལོ་ནས་བཟུང་བཟོ་ཚོགས་ཀྱིས་དྲོ་སྐྱེད་སྐྱེལ་བའི་བྱ་སྤྱོད་ལོ30ལྷག་ལ་མུ་མཐུད་དེ་སྤེལ་བ་དང་།དུས་ཆེན་གལ་ཆེན་ལ་དཔེ་སྟོན་བྱེད་པ་དང་དམིགས་བསལ་གྱི་ཁྱུ་ཚོགས་ལ་རོགས་སྐྱོར་བྱེད་པ།བྱེད་སྒོ་གལ་ཆེན་ལ་འཚམས་འདྲི་བྱེད་པ་སོགས་ཀྱི་ལས་དོན་སྤེལ་ཕྱོགས་ཆགས་ཡོད།བསྡོམས་རྩིས་བྱས་པར་གཞིགས་ན2025ལོའི་ལོ་སར་དང་དཔྱིད་གསར་དུས་ཆེན་རིང་རིམ་པ་ཁག་གི་བཟོ་ཚོགས་ཀྱིས་གྲབས་གསོག་བྱས་ནས་དྲོ་སྐྱིད་མ་དངུལ་སྒོར་དུང་ཕྱུར60བཏང་བ་དང་།ཁེ་ལས་ཁྲི16.7ལ་བཅར་འདྲི་དང་འཚམས་འདྲི་བྱས་པ།ལས་བཟོ་པ་ཁྲི1850ལ་འཚམས་འདྲི་བྱས་པ་རེད།2026ལོའི་ལོ་སར་དང་དཔྱིད་གསར་དུས་ཆེན་རིང་དྲོ་སྐྱིད་སྐྱེལ་བའི་ལས་དོན་གྱི་བྱེད་ཤུགས་དང་ཁྱབ་རྒྱ་སྔར་བས་ཆེ་རུ་བཏང་བ་རེད།། （ བདེ་ཆེན་གྱིས་བསྒྱུར།）