བཟོ་བཀོད་རྣམ་པ་མཛེས་པའི་ཕོ་བྲང་དུ།།
དྲི་ཞིམ་ངད་པ་འཐུལ་པའི་པད་མའི་མཚོར།།
ངང་ངུར་སེམས་པ་ཡན་པའི་དཔྱིད་དཔལ་དུས།།
ཞུས་ཀྲོའུ་ཡུལ་གྱི་མཚར་སྡུག་ལྷ་ཡུལ་བསྒྲུན།།
མཉེན་ལྡེམ་རྒྱུད་དྲུག་དབྱངས་ཀྱི་སྐུད་པ་ཕྲར།།
བཀྲག་མདངས་འོད་རིས་འཁྱུག་པའི་སོར་གར་ལྷན།།
དབྱངས་བདུན་སྙན་པའི་དཔལ་འཇོ་དྲི་ཟའི་གླུ།།
ཐོས་འཛིན་ཨུཏྤལ་ཚལ་དུ་སྙན་བཅུད་སྟོབ།།
དཔའ་མཛངས་མཚན་གྱི་སྙན་པ་ས་གཞི་ཁྱོན།།
ལྡེམ་འགྲོས་སྤྲིན་དཀར་ཟོལ་གྱིས་གཤེགས་པ་ཡི།།
གནམ་འོག་མི་ཡི་གྲལ་ནས་ཁྱད་འཕགས་མིའི།།
ཡིད་བརྟན་གར་གྱི་སྟངས་སྟབས་སྒུལ་སོ་ཉིད།།
ཕྲ་ལྡན་ལུས་ཀྱི་འཁྲི་ཤིང་ཡལ་འདབ་རྩེར།།
བཞིན་བཟང་ཆུ་སྟོད་ཟླ་བའི་ལང་ཚོ་ཅན།།
སྐྱེ་རྒུའི་འཁྲེང་ཞེན་རྒྱ་མཚོ་རྒྱས་བསྐྱེད་དུ།།
ཚངས་དབང་ལྷ་ཡིས་བཏང་བའི་ཕོ་ཉ་བ།།
འཇམ་པའི་གཤིས་ལ་ཟླ་བའི་འོད་མདངས་རྒྱས།།
དུང་བའི་མཚོ་ཁར་དམ་ཚིག་རླབས་ཕྲེང་རྩེན།།
མཛེས་མཛངས་ལྷ་ཡི་སྲས་མོའི་མགྲིན་ཟོམ་ལས།།
སྙན་འཇེབས་ཚིག་གི་འོ་མའི་སྟིམ་སྒྲ་འཁྱིལ།།
མཛའ་མཐུན་སྨན་ཆབ་བཞུར་པའི་ལོ་ཟླ་རུ། །
ཡིད་གཅུགས་ཁང་བཟང་བཞེངས་པའི་མཛའ་བའི་གྲོགས།།
མི་བརྟན་ཚེ་ཡི་རྫོགས་ཚིག་འབྲི་བའི་ཤུལ།།
གཉུག་སེམས་རི་བོའི་ཟོམ་དུ་སྨུག་སྤྲིན་གཏིབས།།
༼ དབྱངས་ལྡེའུ། ༽