དགའ་སྐྱོ་ཚོར་བའི་གསེབ་ཀྱི་ཉེ་གམ་ནས།།
མི་ཚེའི་གཏམ་རྒྱུད་ཁྱོད་དང་མཉམ་དུ་གླེང་།།
ད་དུང་ང་ཡི་དུང་སེམས་འཕྱུར་རླབས་སུ།།
ཁྱོད་ནི་གསེར་ཉ་བཞིན་དུ་འཁོར་ནས་ཡོད།།
ཟླ་བྲལ་ཉ་གང་འཛུམ་པའི་མཁའ་དབྱིངས་སུ།།
སྐར་ཚོགས་གྲལ་མཐའ་བརྒྱན་པའི་ཡིད་གཞུང་ན།།
ལང་ཚོའི་གཟི་འོད་ངོམས་པའི་འཇའ་ཚོན་འོག།
འུ་གཉིས་འཚོ་བའི་ལམ་ཁ་མཛེས་པར་སྙམ།།
འདི་ནས་ལེ་དབང་སྟོང་གི་ཕ་མཐའ་ན།།
ལམ་ཆུང་ཧ་ཅང་དོག་པའི་རི་ལམ་དུ།།
ངག་གི་མགྲིན་དབྱངས་སྙན་པའི་མི་མོ་ཆེར།།
དབྱངས་ཅན་ལྷ་མོའི་འུ་གཉིས་བསྲུངས་ནས་ཡོད།།
ངག་ལ་ངག་གི་འགྱུར་ཁུག་རན་པོ་ཞིག།
ཚིག་ལ་ཚིག་གི་སྡེབ་སྦྱོར་མཛའ་ནི་ཞིག།
སྒྱུ་མའི་སྤང་གི་སྣང་བ་རྒྱ་ཡན་མཁན།།
ང་ཡི་གཤིས་སུ་ཁྱོད་རང་སུན་ནམ་ལགས།།
འདི་ནི་ང་ཡི་གཤིས་ལུགས་མ་བཅོས་པ།།
རེ་བའི་དབྱངས་ལ་འཐམས་པའི་བྱས་རྗེས་ཤིག།
མ་འོངས་གསར་སྐྱེས་གཞོན་ནུ་ཕོ་མོའི་ཚོགས།།
དགྱེས་པའི་གསོས་སུ་སྨིན་པའི་སྦྲང་ཆར་ཞིག།
དྭངས་གསལ་ཡན་ལག་བརྒྱད་ལྡན་གཙང་པོའི་འགྲམ།།
འཛུམ་ཆུང་ཉི་མའི་དྲོད་ལ་ལྡེ་པ་ཡི།།
ན་ཆུང་ཟུར་མིག་དགོད་པའི་སྨན་ཤར་དེ།།
ང་ཡི་ནང་སེམས་མཐུན་པའི་ཚེ་གྲོགས་ཡིན།།
དགའ་བདེའི་འཇིག་རྟེན་འཁོར་བའི་ཕུན་ཚོགས་ལ།།
འུ་གཉིས་ལོངས་སུ་སྤྱོད་སྐབས་མ་བྱུང་ཡང་།།
རེ་སྐྱིད་སྙིང་གཏམ་གླེང་བ་དེ་ཙམ་གྱིས།།
མི་ཚེའི་རིན་ཐང་ཆེ་ཞིག་རྙེད་པ་ཡིན།།
ངག་རིག་དབྱངས་ཀྱི་གཤོག་ཟུང་ཐོགས་དང་ལྷན།།
ཁྱོད་དང་མཉམ་དུ་རྒྱང་རིང་འཕུར་ན་བསམ།།
ཡིན་ཡང་གཉེན་ཉེ་སྒྱུ་སྐར་ཕྲ་ཚོམས་ཀྱིས།།
བུ་ལ་གནང་བ་སྦྱིན་མིན་མི་ཤེས་ཁུ །
གང་ལྟར་ལས་ཀྱི་བག་ཆགས་དབང་བཙན་པས།།
ཁྱོད་དང་སོ་སོར་གྱེས་ཐབས་ཧ་ཅང་བྲལ།།
དེ་བས་ང་ཡི་མཛའ་གཅུགས་ཁྱོད་རང་ལ།།
ཉེ་བའི་འཕྲིན་པ་འདི་ཡང་སྤྲིངས་པ་ལེགས།།
འདིར་བྲིས་སྙན་པའི་བ་དན་མཐོང་ལགས་སམ།།
འདིར་ཡང་འགུགས་པའི་གླུ་ལ་ཨེ་གསན་ནམ།།
ང་ཡི་སྙིང་ལ་སྡུག་པའི་མཛའ་ན་མོ།།
དོ་ཞག་ཁྱོད་རང་དྲན་པ་རིང་ནས་དྲགས།།
༼ ཁམས་ཟླ་སྲས། ༽