ལས་སྐྱིད་སྡུག་གཉིས་ཀྱི་མཐའ་ཁ་རུ་འགྲེངས་ནས།།
ཡིད་མེ་ལོང་ནང་གི་སྤྲོལ་བྲལ་གྱི་རང་བཞིན།།
སེམས་ཕར་ཤོར་བདུད་ཀྱི་ཆོ་འཕྲུལ་དང་འདྲིས་པ།།
གནས་སྔོན་པོ་འདི་ལ་གསང་རྒྱ་ཡང་མི་ནུས།།
ཚིག་ཤིང་ཤུན་བར་ནས་མཐོང་བ་ཡི་ཁྱོད་ཉིད།།
གདངས་སྙན་མོ་ཀུན་གྱི་ལྷས་ར་ན་ཆགས་ཤིང་།།
ལུས་འཇོ་སྒེག་སྟོང་གི་ཏེ་བོ་རུ་འགྱིང་བའི།།
མ་དབྱངས་ཅན་ཟེར་ན་ཁྱོད་ཉིད་རང་ཡིན་འདྲ།།
ནང་ཉོན་མོངས་ཁྲག་འབུས་མ་ལུས་པ་བཟས་པའི།།
ཕྱི་ཚུལ་འཆོལ་ཅན་གྱི་མགོ་རེག་གི་ཁོ་བོ།།
མིག་འཁྲུལ་བས་བལྟས་ཀྱང་ཚིམ་བྲལ་གྱི་ཁྱོད་ལ།།
ཞེ་བསམ་པའི་ཐོག་ནས་ཡིད་སྨོན་ཞིག་ཤོར་རོ།།
ཆོས་འཇིག་རྟེན་གཉིས་ཀྱི་སྣང་མང་གི་ལས་ཅོག།
ཚེ་ཐུང་ཐུང་འདི་ལ་འགྲུབ་ཐབས་ཤིག་མེད་པས།།
རང་འདོད་མོས་འཚམས་པའི་སོས་བཞད་ཀྱི་ལྗོན་པ།།
དུས་ཟང་ཟིང་བར་ནས་རྙིད་པ་རང་མ་འཇོག།
རྒྱུ་འབྱོར་བས་བསླུས་པའི་སྣ་ཚོགས་ཀྱི་གྲུ་ཁར།།
རྫས་གང་གིས་བསླུ་མེད་དངོས་པོ་ཞིག་མཆིས་ན།།
དྲིན་ཕ་མའི་བརྩེ་འདང་དྭངས་མོ་དེ་ཡིན་པས།།
ལས་ཅི་ལ་ཐུག་ཀྱང་མི་དྲན་ཁར་མ་བྱེད།།
ཕ་ཡང་མེས་རུས་པ་གསེར་ཡན་གྱི་རིང་ལ།།
སེམས་འཇིགས་སྣང་བུན་པོ་ཞུ་ཡུལ་གྱི་བླ་སྤྲུལ།།
གཞན་ཆ་མེད་ལོག་བཤད་ཅུང་ཙམ་གྱི་དབང་གིས།།
གཏམ་སྣ་མང་ཁ་ནས་བསྙད་པ་ལ་མ་འབད།།
དོན་དམ་པར་ཁྱོད་ཅེས་ཡོད་པ་རང་མིན་ལ།།
ཀུན་རྫོབ་པར་ཁྱོད་རང་གང་དུ་ཡང་མེད་པས།།
རང་ཡོད་སྣང་ཕྲན་བུའི་བདག་འཛིན་གྱི་རྟ་ཕོ།།
དུས་སྐད་ཅིག་མ་བཞོན་ཡིད་འོང་གི་འཕགས་མ།།
མ་དྲིན་མོ་ཆེ་ཡི་དམར་མདངས་ཀྱི་མངལ་ལས།།
དུས་གཅིག་ཏུ་སྐྱེས་པའི་ཟག་བཅས་ཀྱི་ཕུང་འདི།།
ཁྱེར་འགྲོ་དབང་ཏོག་ཙམ་ཡེ་ནས་ཀྱང་དབེན་པས།།
ནང་ཞེ་འཛིན་ཆུང་ན་སྐྱེས་མཆོག་གི་བསྟོད་ཡུལ།།
ཉིན་མཚན་མོ་ཀུན་ཏུ་སྙིང་གཏམ་གྱི་འོ་ཇ།།
སྐོལ་གྱིན་པའི་སྟོབས་རྒྱས་གསར་བུ་ཡི་གཞོན་པ།།
ཁྱོད་དོན་དུ་ལྔ་ལམ་འགྲོ་འདོད་ཀྱི་སྟག་ཤ།
ནམ་ཞིག་ཏུ་གྱུར་ནས་ཁྱོད་རང་ལ་སྡང་འོང་།།
རང་དགའ་བས་བཟང་འཛོམས་ཨུ་དུམ་གྱི་ཝ་ར།།
ཡིད་ཁྲོས་པས་ངན་པ་དགུ་འདུས་ཀྱི་དུག་ཤིང་།།
དོན་དངོས་ལ་གང་ཞིག་བདག་པ་ནི་མེད་པའི།།
གཞུང་གནས་ལུགས་ནམ་ཡང་སེམས་ཐོག་ལ་ཞོག་ཅིག།
ཕྱི་ཚོར་བ་བཟང་ཚེ་སེམས་འདྲིས་ཀྱི་གྲོགས་པོ།།
རྒྱུ་འབྱོར་བས་དབེན་སྐབས་ངོ་འདྲིས་ཀྱི་མི་བུ།།
སྟོན་འབྲས་ལྡན་དུས་ཀྱི་རྩྭ་རྐང་གི་ཐོ་ཡོར།།
ནང་གསང་གཏམ་འབུལ་སའི་མཆོད་རྟེན་དུ་མ་བསྒོམ།།
ཚུར་གནོད་སེམས་འདུག་མིན་དཔྱད་རྒྱུ་རང་གལ་ཡང་།།
ཕར་ངན་སེམས་ཕྲན་བུས་རྒྱུ་རྐྱེན་དུ་བྱས་ནས།།
ཆོས་འཇིག་རྟེན་གཉིས་ཀ་མི་མཐུན་གྱི་ལས་ལ།།
ལར་ཅུང་ཚོམས་མ་འཇུག་འཁྲིལ་ལྡེམ་གྱི་ལྷ་མོ།།
བདག་འདོད་རྔམ་ལྕི་མོས་ཡང་ཡང་དུ་ལྷད་ཅིང་།།
མཚན་སྙན་གྲགས་མི་དགའ་ཚུལ་ཙམ་གྱི་ཁོ་བོས།།
ཁྱོད་ཐོས་འཛིན་སྙན་པའི་ལྷུག་བརྗོད་ཀྱི་གཏམ་ཞིག།
ཡེ་བདག་ལ་མེད་ཀྱང་བརྗོད་ཁ་རང་བྱས་ཡོད།།
ནང་གསེར་ཅན་གྱི་ཤེས་ཡོན་གྱི་བཟའ་ཆས།།
ལར་ཕྱུག་པ་མེད་ཅིང་ཡིད་འོང་གི་མཛེས་འཆོས།།
ཕར་བལྟས་པས་བློ་ལ་འབབ་ངེས་ཀྱི་བཞིན་རས།།
ས་ཐག་རིང་ལུས་པའི་འཁྱམ་པོ་ངར་མེད་དོ།།
ཚིག་ཐ་སྙད་སྙན་དང་མི་སྙན་གྱི་མཁར་རྫོང་།།
མགུར་ཀུན་རྟོག་འཁྲུལ་གཞས་ལེན་བཞིན་གྱི་བར་ནས།།
ངའི་དར་རྒུད་མི་ཚེ་རྫོགས་པ་རང་བྱུང་ན།།
ང་ཤི་ཡང་དེས་ཆོག་སྐྱབས་གནས་ཀྱི་དཀོན་མཆོག།
༼ འཕུར་སྐྱོད། ༽