བརྒྱད་གཉིས་ལོ་ཟླའི་ཕྲེང་བར་ཕྱིར་མིག་འཕངས་ཚེ། །
གུ་དོག་འདམ་གྱིས་མ་གོས་ཡིད་ཀྱི་པད་མར། །
མཛའ་བརྩེའི་དུང་ཕྲེང་འཛུམ་པའི་ཆུང་པོའི་གྲོགས་དག །
དྲན་པའི་མེ་ལོང་ངོས་སུ་འཛུམ་དཀར་མངོན་བྱུང་། །
ཕར་ཕར་སོང་བའི་ལོ་ཟླར་ཕྱིར་དྲན་བྱེད་དུས། །
ངུ་དགོད་སྤེལ་མའི་ཚོར་བའི་འདྲེས་མཐུན་གྲོགས་ལོ། །
ཕུགས་ཀྱི་འདུན་མའི་གཏད་སོ་ཁ་ཁ་ཡིན་པས། །
ལང་ཚོ་བརྟས་པའི་དུས་ནས་རིང་དུ་གྱེས་ཟིན། །
ཐོབ་ཤོར་རིས་སུ་འཁོར་བའི་འཇིག་རྟེན་གྲུ་གར། །
གོམ་པའི་སྟངས་སྟབས་རེ་རེ་དལ་གྱིས་སྤོས་ཤུལ། །
རྙོག་འཛིང་ཁྲེས་པོ་ལྕི་མོ་ཕྲག་ཏུ་ལྷུང་དུས། །
ཤུགས་འབྱུང་ཚོར་གླུ་འགྱུར་ཁུག་རྒྱང་དུ་འཐེན་ཡོད། །
ལུ་གུ་རྒྱུད་མིག་ལྟར་གྱི་འཚོ་བའི་ལམ་འཕྲང་། །
ལོ་ཟླའི་རྟ་མཆོག་བཞོན་ནས་ལམ་ལ་ཆས་སྐབས། །
ཞེན་ཆགས་ཕྱིར་མིག་ཀློང་གི་འདང་བརྩེ་ཆུང་གྲོགས། །
ཕྱིར་དྲན་བྱ་ཁྱུ་འཕུར་སའི་ཚང་མལ་ཡིན་འདུག །
ལང་ཚོ་རིམ་གྱིས་སྨིན་ཞིང་རིམ་བཞིན་རྙིང་བར། །
དར་རྒུད་མི་ཚེའི་ཐ་སྙད་ཁ་ཡིག་བྲིས་ཏེ། །
ས་མཐའི་སྡེ་གྲོང་དཀྱིལ་དུ་མི་ལྡོམ་འགྱུར་དུས། །
སྐྱོ་གདུང་ཚོར་བའི་སྨུག་སྤྲིན་སེམས་མགོར་འཐིབས་སོང་། །
མི་སེམས་ཚོན་གྱིས་བསླད་པའི་ཤེལ་དཀར་བུམ་ཆུང་། །
འཚོ་བའི་དགའ་སྤྲོའི་ཆབ་ཀྱིས་གཙང་མར་བཀྲུས་ནས། །
རེ་འབྲས་ཆུ་སྐྱེས་བུ་མོའི་ལང་ཚོ་རྒྱས་པའི། །
སྙན་འཕྲིན་གཏམ་གྱི་འོ་མ་སྤྲིན་དཀར་བསྐུར་ཡོད། །
འདྲིས་ཤིང་འགྲོགས་པ་ཀུན་ནི་དྲན་པའི་གཞི་མ། །
དྲན་གདུང་དབྱངས་རྟ་སྙོམས་པོར་ཚོར་མགུར་དྲངས་ཏེ། །
ཉི་གཞོན་འཆར་ནུབ་རེས་འཁོར་དུས་ཚིགས་རེ་ལ། །
སྤྲིན་གྱི་ཕོ་ཉ་གཞོན་ནུར་འཕྲིན་པ་གཏང་ཡོང་། །
༼ དབྱངས་ལྡེའུ།༽