ངག་རིག་སྒྲ་བརྒྱའི་དབང་ཕྱུག་གི། །
ཞལ་གསུང་སྙིང་གི་ཐིག་ལེ་ཆེ། །
སྒྱུ་འཕྲུལ་དབྱངས་ཀྱི་མངའ་བདག་ཉིད། །
དཎྜིའི་གསུང་ལ་གུས་བསྟོད་དོ། །
བསིལ་ཟེར་ཟླ་བའི་གཟི་མདངས་ལ། །
རྒྱས་པའི་ལྷ་དཀར་མེ་ཏོག་གི། །
གསུང་གི་དངོས་གྲུབ་ཐོབ་པ་ཡི། །
སྙན་ངག་མཁན་ལ་ཅི་ཡང་གཏམ། །
ཚོགས་དྲུག་སྣང་བའི་ཡུལ་མཐའ་ན། །
འཇའ་ཚོན་གུར་ཁང་ཕིབས་པའི་ཀློང་། །
ངག་དབང་དབྱངས་ཅན་ལྷ་མོ་ཡིས། །
བསྲུངས་བའི་མི་ལ་ཡིད་སྨོན་འཆོར། །
བས་མཐའི་རི་སུལ་གང་ཞིག་ཏུ། །
ངེས་འབྱུང་ལོ་མས་མ་སྒུལ་བར། །
ཏིང་འཛིན་ངང་དུ་གཞོལ་བྱས་པས། །
ངག་གི་མེ་ཏོག་འཐོར་རམ་ཅི། །
མཐིང་སྨུག་ནམ་མཁའི་ཡིད་གཞུང་ན། །
གཡས་གཡོན་ཉི་ཟླ་འཚེར་བ་ཡི། །
རྔམ་བརྗིད་རི་བོའི་དབུ་རྩེ་ནས། །
རེ་བའི་རླུང་རྟ་རྒྱང་ལ་བསྐུར། །
གོས་དཀར་བཟང་པོའི་ཆ་སྤྲས་ཏེ། །
ཕྱག་ལ་དབྱུག་པ་ཐོགས་བཅས་ཏེ། །
མཚོ་བྱུང་ཚངས་པའི་ཞབས་དྲུང་དུ། །
དགྱེས་པའི་གླུ་ཡི་མཆོད་པ་བཤམས། །
འདི་ན་ཡིད་ཀྱི་རྩེ་དགའ་བཅས། །
རིན་ཆེན་རྒྱུད་མངས་འཚོལ་མཁན་གྱི། །
གཞོན་སྐྱེས་གང་དང་གང་དག་གིས། །
ཁྱེད་ཀྱི་འཇིག་རྟེན་བཞིན་དུ་འཚོལ། །
ན་ཆུང་དྲི་ཟའི་འགྱུར་ཁུགས་དབུས། །
ཚངས་དབྱངས་མེ་ཏོག་གྲོལ་དང་ལྷན་། །
ཡིད་ཀྱི་དང་བ་ཆེར་དྲགས་པའི། །
རབ་མཛེས་གོས་དཀར་ཅན་ལ་འདུད། །
༼ ཁམས་ཟླ་སྲས།༽