ཆུ་བོར་དབྱངས་རྟ་ཐོར་ཞིང་རྒྱང་དུ་གྱེས།།
རྦ་རླབས་འདབ་ཀྱི་ངོས་སུ་རྨི་ལམ་འཁྱིལ།།
གཞོན་པའི་སྣང་བའི་རླུང་བུ་ལྡང་ཙམ་གྱིས།།
སེམས་ཀྱི་ཕུགས་བསམ་མེ་ཏོག་དེ་ཙམ་གཡོ།།
ཞི་འཇམ་ངང་ལས་ཐོར་བའི་གཞས་ཆུང་ལ།།
ཚོར་བའི་འཇའ་རིས་བྲིས་པའི་གད་ཁ་ཡོད།།
སྤྱན་གྱི་མཚོ་ཆུང་གཙང་བོར་ཅེར་ཙམ་གྱིས།།
སེམས་ཀྱི་གངས་རི་དེ་ཡང་གཡོ་འགུལ་བྱེད།།
སྔོན་པོ་མདོག་གིས་བཟུང་བའི་གཙང་བོ་ལ།།
ང་ཡི་གཟུགས་བརྙན་ནག་པོ་ཤར་ཙམ་བྱེད།།
ཕར་ཚུར་བརྡར་བའི་ཚུལ་ནི་ཞེན་ཆགས་ཏེ།།
བརྩེ་བའི་ཕྱི་མིག་འཁོར་བའི་སྣང་བ་ལགས།།
མདུན་གྱི་ལམ་དུ་སྨུག་པའི་རས་ཀྱིས་འཁྲེང་།།
སྔུན་དུ་བསྐྱོད་པའི་ལམ་ལ་མུན་པས་མནན།།
སྙིང་གི་གཤོག་ཟུང་རྡེབ་ཙམ་འཕུར་བ་དེར།།
ཁེར་རྐྱང་རླུང་གི་རང་དབང་གཡོ་བའི་ཟོལ།།
（ མི་ཉག་སྨྱུ་གུ་ཕྲ་མོ།）