འཇའ་སྤྲིན་འཁྱིལ་བའི་རི་ནས།།
དུང་གི་ཟླ་བ་ཚེས་བྱུང་།།
སྐྱབས་གཅིག་འཁོར་ལོའི་མགོན་པོའི།།
དགྱེས་ཞལ་ཡིན་ན་དགའ་བ།།
སྔོན་ཞིག་ངུར་སྨིག་མཚོ་མོ།།
ཡར་ཚེ་ཟླ་བ་རྒྱས་འདྲ།།
དེང་ཡང་རབ་བྱུང་རྡུལ་དམར།།
མཁའ་ལ་འཁྲིགས་ན་ཆོག་པ།།
གྲྭ་ཤག་གས་བསྲུབས་བར་ནས།།
གྲང་རེག་སྐྱི་བསེར་རླུང་བུ།།
དལ་བུ་དལ་བུར་ལྡང་ནས།།
ལུས་ལ་གཟན་པོ་བྱས་བྱུང་།།
དགུན་དཔྱིད་འདྲེས་མའི་དུས་ལ།།
གཤོག་ཟུང་དྲོན་མོའི་འོག་གི།།
ང་ཅག་མིང་སྲིང་བྱེའུ་ཆུང་།།
རི་ལ་འདེད་གྲབས་མ་མཛད།།
ལ་ཁའི་དར་ལྕོག་དམར་པོ།།
རླུང་བུས་ཁས་ཀྱིས་ཟད་བྱུང་།།
ང་དང་མཆེད་ལྕམ་བྱམས་བརྩེ།།
འབྱུང་བཞིས་འཇིག་ཐབས་མི་འདུག།
ཁེར་རྐྱང་འཚོ་བའི་མིག་ཆུ།།
རང་ཉིད་གཅིག་པུས་མྱོང་ཆོག།
ལས་ཀྱིས་སྦྲེལ་བའི་མུ་ཁྱུད།།
གཏོར་ན་སྙིང་ལ་གཟན་པ།།
འཕྲུལ་སྒུལ་རླངས་འཁོར་སྐད་སྒྲ།།
ཐོས་འཛིན་ཡུལ་དུ་གྲག་སོང་།།
ག་ལེར་ག་ལེར་རྒྱང་རིང་།།
རི་བོའི་ཕག་ལ་ཡིབ་འདྲ།།
བལྟས་ན་མིག་ཆུ་ཤམ་ཤམ།།
མ་བལྟས་སྙིང་ཆུང་འདར་འདར།།
ལྟ་དང་མི་ལྟའི་བར་ནས།།
སེམས་པ་སྨྱོ་གྲབས་མཛད་འདུག།
ཡར་བལྟས་རྫ་རིའི་འདབས་ན།།
ཁུ་བྱུག་གསུང་སྙན་ལྷང་ལྷང་།།
འདས་དོན་སེམས་ལ་ཤར་ནས།།
མིག་ཆུའི་སྦྲང་ཆར་ཟིམ་ཟིམ།།
བུ་ངའི་ཡིད་འཛིན་ལྷ་མོ།།
ཐར་བའི་ཆོས་ལ་མ་ཕྱོགས།།
གྱེས་ཕྱག་ཕུལ་བའི་ཕྱོགས་སུ།།
འགྱེལ་མ་ལང་གིས་ཤོར་སོང་།།
ཀུན་གསལ་རྒྱུ་སྐར་ཁྲ་མོས།།
འབྲལ་ཁའི་ལས་འདི་མཐོང་བས།།
སྨྲེང་བ་སེམས་ལ་མ་ཤོང་།།
སྐུ་ལུས་འདར་སིག་བརྒྱབ་བྱུང་།།
དཔྱིད་ཀྱི་དཔལ་མོ་རྒྱས་དུས།།
དུང་སེམས་མུ་ཏིག་འཐོར་བ།།
དབྱུག་འཛིན་སྒེག་མོས་མ་ཐེག།
ས་ཆེན་ཡང་ཡང་འགུལ་འདུག།
ཁྱོད་ལ་རང་དབང་ཡོད་ཅིང་།།
ང་ལ་ལས་དབང་ཡོད་ན།།
འདབ་དྲུག་ལུང་པ་འདི་ནས།།
ཚེ་རྟིང་ཆོས་ལ་གཏོང་འཇོག།
ཤི་ནས་འབྲལ་བ་ཆོས་ཉིད།།
མ་འབྲལ་ལུས་སེམས་གྱེས་པ།།
རྡོ་ལྕགས་ཚེར་མ་ཡིན་ཀྱང་།།
དངན་པ་ཐང་ཅིག་ཤོར་འདྲ།།
ཚེ་གཅིག་ཆོས་ལ་བསླབས་ཀྱང་།།
འབྲལ་ཁ་སྙིང་རླུང་ལྡང་བ།།
སེམས་པ་ཆོས་སུ་མ་སོང་།།
བག་མེད་ལུས་པའི་མཚན་རྟགས།།
ཆོས་དང་དམ་ཚིག་མདུད་པ།།
མཉེན་མོའི་ལྕགས་ལ་མ་བཏབ།།
སོ་སོའི་དམར་ཆུང་སེམས་ལ།།
མི་ཤིགས་དགུ་མདུད་བརྒྱབས་ཡོད།།
ས་དེ་བྲག་ཆུང་ལུང་པ།།
ཆུ་དེ་བྲག་ཆུ་ཕྲ་མོ།།
སྐྱོ་སྐྱོའི་གཞས་ཆུང་ལེན་རོགས།།
སེམས་ཀྱི་མི་དེ་ཡིན་འདྲ།།
ཆུ་ལྷའི་མཚམས་སྤྲིན་ལི་མར།།
མིག་ཟུང་གཏད་པ་མ་གནང་།།
འཛུམ་ཆུང་མིག་ཟུར་འདབས་ནས།།
མིག་ཆུའི་ཐིགས་པ་འཛགས་ཡོང་།།
སེམས་པ་སྨྲེང་བའི་དུས་སུ།།
སྙིང་གཏམ་སྤྲིན་པར་ཤོད་དང་།།
སྤྲིན་པ་འདི་རུ་སླེབས་དུས།།
འཕྲིན་ལན་སླར་ཡང་སྐུར་ཆོག།
སྐྱོ་སྣང་ལ་ཁའི་ན་བུན།།
སྙིང་ཆུང་མཁའ་རུ་འཐིབས་ན།།
རེ་ལྟོས་གཞན་ལ་མ་བཅའ།།
སེམས་པ་འདི་རུ་སྐོར་ཤོག།
ས་མཐའི་མི་ཡི་དགོད་སྒྲ།།
ནང་མིའི་དམོད་ཚིག་ལས་ཀྱང་།།
ལུས་དང་སེམས་ལ་གཟན་པས།།
སྐྱིད་སྡུག་ནང་ལ་ཞུས་ཤོག།
ཇོ་ཇོའི་ནུས་པ་ཡོད་ཚད།།
ཁྱོད་ཀྱི་ཕྱོགས་སུ་ཕུད་འཇོག།
ཁྱེད་ཅག་བདེ་སྐྱིད་འཛོམས་ན།།
རང་ལ་ཅི་བྱས་ཆོག་གོ།།
༼ སྟོང་ཡིག་མདའ།༽