གནས་སྟོང་ཁམས་ཉུལ་བའི་ས་མཐའ་ཡི་འགྲམ་ནས།།
སེམས་སྐྱ་མོར་མུན་པ་སྟུག་པོ་ཡིས་བསྒྲིབས་དུས།།
ནང་ངལ་བའི་ཆུ་རིས་གཏུམ་པོ་རེ་གཡོ་བཞིན།།
ལམ་གྱ་གྱུའི་འགྲམ་ནས་དུབ་པ་ཡིས་བཀག་འདུག།
སེམས་གཏིང་མཐའི་ཀློང་ན་ངལ་བ་ཞིག་ལྷུང་ཡོད།།
ཡུལ་འཁོར་བའི་གྲོང་ནས་འཛད་པ་ཞིག་མི་འདུག།
དུས་ཡུན་རིང་འདའ་བས་ཇེ་ལྕི་རུ་གྱུར་ཏེ།།
ཤ་རུས་པའི་སྦུག་ནས་ཚོར་བ་ཞིག་བཙན་སོང་།།
ལས་སྨོན་འདུན་ཀློང་ན་ན་བུན་ཞིག་འཁོར་གྱི།།
ས་ངེས་མེད་འགྲིམས་ཀྱང་ཡལ་ཐབས་ཤིག་བྲལ་ལོ།།
འོད་ཉི་ཟླ་འཁོར་ཕྱོགས་འགྲམ་པ་རུ་ཅེར་བཞིན།།
སྟུག་སྨུག་ལོང་ཡལ་བའི་རེ་སྒུག་ཅིག་བཏེགས་ཡོད།།
ཞེ་འཁོར་མོའི་ཚལ་ལ་ཆར་སྤྲིན་ཞིག་བབས་ཡོད།།
ནང་འདྲིས་པའི་ཀློང་ནས་ཇེ་རྒྱས་སུ་འཁྱིལ་བས།།
མདངས་གཡའ་བྲལ་ཨ་སྔོན་འཆར་བ་ལ་སེམས་ཏེ།།
ལོ་ཟླ་ཞག་མཚམས་ནས་རེ་སྨོན་གྱིས་ཁེངས་ཡོད།།
ལག་དཔུང་པའི་ཕྲག་ལ་རྡོག་ཁྲེས་ཀྱིས་མནན་ལ།།
ཡུལ་རྐང་ཐང་འཇལ་ལ་ངལ་བ་ཞིག་ཡོང་བས།།
གནས་ཆེ་ཆུང་འགྲིམ་པའི་རྐང་གླིང་གི་ཕྲག་པ།།
ཉིན་འགའ་ཙམ་སོང་ན་ཆག་གྲུག་ལ་ཉེ་འདུག།
ཡིད་འཁྲེང་པའི་མཐའ་རུ་དཀའ་བ་ཞིག་ལངས་ཏེ།།
ལར་འཇིག་རྟེན་སྐྱོ་བའི་དཀའ་ཉེན་དུ་ཡོང་ལ།།
སྡོད་མི་འདོད་ཞེན་པའི་སྐྱུག་ཁ་འདི་སྐྱེན་པས།།
ངའི་ཆུ་ཟླའི་གཏིབས་པ་ལང་ལོང་དུ་གཡོ་སོང་།།
ཚེ་མི་རྟག་ལ་ཁའི་རླུང་བུ་ཡི་སྐད་སྒྲ།།
དུས་ཡུན་ཙམ་འཇགས་པའི་ལས་སྐལ་དེ་ཕྲ་བས།།
ངའི་ཁོག་ནས་ཤོར་བའི་འཁུན་བུ་ལ་བསམས་ན།།
ཡུལ་མཐའ་འཁོར་དཀྲོགས་པའི་ཉེན་བརྡ་ཞིག་ཚོར་སོང་།།
ལོ་ཉེར་བཞིའི་རྟ་ཕོ་ལ་འགོ་ནས་བསྐྱལ་ཏེ།།
སེམས་དཀའ་སྡུག་ཁུར་པོ་སྒ་སྟན་དུ་བྱས་ནས།།
ལས་སྨྲེང་སེམས་སྐྱོ་མོ་རྟ་རྫི་རུ་མངག་བཞིན།།
རི་གྲུ་ཁའི་འདབས་ནས་བདེ་མོ་རུ་འཇོག་ཡོད།།
སྐྱིད་ཉིན་ཞག་རྟ་ལྗང་འཆར་བ་ལ་སྨོན་ཏེ།།
སེམས་གུ་ཡངས་ཐང་མོ་ཡོང་བ་ལ་བསམས་ནས།།
ངའི་འཚོ་བའི་ཁ་ཕྱོགས་སྤྲོ་སྣང་ལ་རེ་བཞིན།།
ལོ་ཉི་གཞོན་གསར་པའི་འཛུམ་ཁ་དེ་བསྒུག་འགྲོ།།
༼ སྙན་རྐང་གླིང་།༽