ཝ་ཡེ། ཁྱོད་ཀྱིས་ང་ལ་གནང་བའི་
མེ་ཏོག་དེའི་འདབ་མའི་ནང་དུ
མུ་གེའི་ཟེའུ་འབྲུ་མེད་པར་སྨོན།
ཁྱོད་རང་།
ང་ཡི་སྐྱེ་བ་འདིའི་འབབ་ཚུགས་ཐ་མ་ཡིན་པས།
ང་ལ་མཚོན་ན།
ཁྱོད་རང་ཁྱོད་རང་ལྟར་འཚོ་བར་རབ་ཏུ་དགའ།
འགྱུར་ལྡོག་གི་རླུང་བུས།
ཁྱོད་རང་གཡོ་མི་ཐུབ་པ་མིན་ནའང་།
ང་ཡི་མིག་ནང་གི་མེ་ལོང་།
ཁྱོད་ཀྱིས་ཡང་ཡང་ཕྱིས་མྱོང་བ་དྲན།
བཏབ་ཟིན་པའི་སྡོང་བོ་དེའི་ཡལ་གར།
ལག་པ་གཉིས་ཀ་དམ་པོར་འཇུ་རོགས་གནང་།
ཝ་ཡེ། ཁྱོད་ཀྱིས་དལ་མོར་ཉོན་དང་།
ངས་ཁྱོད་ལ་ཡང་ཡང་གཞས་གཏོང་ཆོག།
ཁྱོད་རང་ཁྱོད་རང་ལྟར་འཚོ་ཆེད།
ངས་མདུན་ལྗོངས་ཀྱི་རྩྭ་ཐང་ཡངས་པོ་
གཞས་སུ་འགུགས་ཆོག།
༼ བཙན་མི།༽