ཉེ་ཆར་སྨྱུག་འཛིན་པས་ཤེས་རྟོགས་བྱུང་བར་གཞིགས་ན། སྡེ་དགེ་པར་ཁང་གི་མཛོད་ཉར་པར་ཤིང་ཡིག་ཚགས《འཛམ་གླིང་གི་དྲན་ཤེས་རྒྱལ་སྤྱིའི་མིང་ཐོ》ནང་རེ་ཞུ་བྱས་པའི་ལྟེ་བའི་ལས་དོན་མང་པོ་ཞིག་ལ་ཚད་བརྒལ་རང་བཞིན་གྱི་གོང་འཕེལ་བྱུང་ནས་མཐའ་མའི་ལས་ཀ་མྱུར་སྒྲུབ་བྱེད་བཞིན་ཡོད།

མིག་སྔར་སྡེ་དགེ་པར་ཁང་གི་མཛོད་ཉར་པར་ཤིང་ཁྲི33.55ལ་ཞིབ་ཚད་མཐོ་བའི་བཤེར་འབེབས་ཡིག་ཚགས་འཛུགས་པའི་ལས་གྲྭ་སྤེལ་འགོ་ཚུགས་པར་མ་ཟད། ད་དུང་མཛོད་ཉར་པར་ཤིང་ཚང་མར“ཨང་ཀིའི་ཐོབ་ཐང་ལག་ཁྱེར”བཟོས་ནས་དྲྭ་ཐོག་མཉམ་སྤྱོད་གཞི་གྲངས་མཛོད་བསྐྲུན་པ་རེད། གསར་སྤེལ་བྱས་པའི“ ཨང་ཀིའི་པར་ཁང”VRསྟེགས་བུ་སྒོ་ཕྱེ་ཟིན་པས་འབྱུང་འགྱུར་གོ་ལ་ཧྲིལ་པོའི་སྤྱོད་མཁན་གྱིས་སྡེ་དགེ་པར་ཁང་གི་གནས་ཚུལ་ཆ་རྒྱུས་ལེན་ཆོག་པ་རེད། དེ་སྔོན་ལེགས་འགྲུབ་བྱུང་བའི་གནའ་བོའི་པར་ཤིང་གལ་ཆེན་མང་པོ་ཞིག་གི་བསྐྱར་བརྐོས་ལས་དོན་ཡང་རྟིང་མའི་དག་བཅོས་གོ་རིམ་དུ་སླེབས་ཡོད།

དེ་དང་ཆབས་ཅིག“སྡེ་དགེ་པར་ཁང་གི་མཛོད་ཉར་ཡིག་ཚགས་ཆེད་དོན་འགྲེམས་པ་སྟེ། པར་བརྐོས་རྗེས་ཤུལ་དྲན་ཤེས”འགྲེམས་སྟོན་ལེགས་གྲུབ་བྱུང་བ་དང་ཕྱི་ཕྱོགས་སུ་སྒོ་འབྱེད་བྱས་པ་རེད། འགྲེམས་སྟོན་མ་ལག་ཐོག་དུས་རབས18པ་ནས་དུས་རབས20པའི་དུས་དཀྱིལ་བར་གྱི་བརྐོས་པར་ཡིག་ཚགས་ཀྱི་རྩོམ་རིག་སྒྱུ་རྩལ་དང་། གནམ་རིག་ལོ་རྩིས། སྨན་རྫས་རིགས་པའི་གཞུང་ལུགས་སོགས་ཁྱབ་ཁོངས་ཀྱི་ཤེས་རིག་གི་གྲུབ་འབྲས་ཡིན་པ་རེད།

གཞན་ཡང་རྒྱ་ཡིག་དང་དབྱིན་ཡིག་གི་མིང་འདོན་རེའུ་མིག་དང་དྲིལ་བསྒྲགས་བརྙན་ལམ་ལ་ཞིབ་ཕྲ་བཟོ་བཅོས་རེས་སྐོར་བཞི་བྱས་ནས་རྒྱལ་ཁབ་ཡིག་ཚགས་ཅུས་ལ་རེ་ཞུ་དཔྱད་ཡིག་ཆ་ཚང་ཕུལ་བ་རེད། དྲིལ་བསྒྲགས་ཐད“སྡེ་དགེ་པར་ཁང་གི་མཛོད་ཉར་པར་ཤིང་ཡིག་ཚགས་འཛམ་གླིང་གི་དྲན་ཤེས་ཨེ་ཤེ་ཡ་དང་ཞི་བདེ་རྒྱ་མཚོ་ཆེན་མོ་ཁུལ་གྱི་མིང་ཐོའི”ཚགས་དཔེ་ནང་བདམས་པར་མ་ཚད། ད་དུང་རྒྱལ་ཡོངས་ཀྱི་དུས་རབས་གསར་པའི་ཡིག་ཚགས་རིག་གནས་འཛུགས་སྐྱོང་ལོ་འཁོར་གྱི་ཚགས་དཔེ་ནང་བདམས་པ་རེད།།

（ ལྷ་འཛོམས་ཀྱིས་བསྒྱུར།）