སྤྱི་ཟླ་དང་པོའི་ཚེས18ཉིན། ཀྲུང་གོ་ལྕགས་ལམ་གྲོང་ཁྱེར་མ་འཇོག་ཚོགས་པས་མ་འཇོག་བྱས་པ་དང་ཀྲུང་གོ་ལྕགས་ལམ་ཅུས་དྲུག་པས་བསྐྲུན་འགན་འཁུར་བའི་དར་མདོ་ནས་ར་རྔ་ཁ་བར་གྱི་མྱུར་བགྲོད་གཞུང་ལམ་གྱི་ར་རྔ་ཁའི་འབྲེལ་མཐུད་ཟམ་ཆེན་དུམ་མཚམསAཡི་ཟམ་གདན་བཅུ་ཐམ་པ་ལེགས་གྲུབ་བྱུང་བ་དང་།ལས་གཞི་དེས་མཚོ་འཕགས་མཐོ་བའི་ཟམ་པའི་གྲུབ་ཆའི་ལག་རྩལ་གྱི་དཀའ་གནད་བསལ་ནས་རྗེས་ཕྱོགས་ཨར་ལས་ལ་རྨང་གཞི་བརྟན་པོ་བཏིང་བ་རེད།
ར་རྔ་ཁ་འབྲེལ་མཐུད་ཟམ་ཆེན་གྱི་དུམ་མཚམསAནི་མཚོ་འཕགས་སྨི3500ཡན་གྱི་སི་ཁྲོན་ནུབ་རྒྱུད་ཀྱི་མཐོ་སྒང་དུ་ཡོད་པ་དང་། སྤྱིའི་རིང་ཚད་ལ་སྨི1425དང་ཞེང་ཚད་ལ་སྨི25.5ཡོད་པ་རེད། ཕྱོགས་གཉིས་ལ་རླངས་འཁོར་བཞི་གཤིབ་ཀྱི་ཇུས་འགོད་བྱས། ཟམ་པ་དེར་ཨར་ལས་བྱེད་པའི་བརྒྱུད་རིམ་ཁྲོད་དྲོད་ཚད་དམའ་བ་དང་། ཉིན་མཚན་གྱི་དྲོད་ཚད་ཁྱད་པར་ཆེ་བ། འཁྱགས་ཞུ་འཁོར་རྒྱུག་མང་བ་སོགས་རང་བྱུང་ཆ་རྐྱེན་ཞན་པས། ཨར་ལས་ཐད་དཀའ་ངལ་ཆེན་པོར་འཕྲད་ཡོད། སྤྱིར་བཏང་རང་བྱུང་གི་གསོ་བསྲུང་དུས་ཡུན་ནི་ཉིན7ཡིན་པས། དྲོད་ཚད་དམའ་བའི་ཁོར་ཡུག་འོག་སྲ་ཚད་མི་འདང་བ་དང་ཕྱི་ངོས་གས་སྲུབས་སོགས་མངོན་མེད་ཉེན་ཁ་འབྱུང་སླ་བས། ལས་གཞིའི་འཕེལ་ཚད་དང་སྤུས་ཚད་ལ་ཤུགས་ངེས་ཅན་ཐེབས་ཀྱི་ཡོད།
དཀའ་གནད་དེ་དག་ཐག་གཅོད་བྱ་ཆེད། ལས་གཞི་པུའུ་ཡིས་རླངས་འགྱུར་གསོ་བསྲུང་ལག་རྩལ་སྤྱད་དེ་གུར་རས་ཀྱིས་དབུགས་འགྲོ་ས་མེད་པའི་བར་སྟོང་བཟོས་ནས་རླངས་པ་སྦུབས་ལམ་བརྒྱུད་ནས་དྲོད་ཚད་བརྟན་པོའི་རླངས་པ་འདྲེན་ཏེ་གསོ་བསྲུང་ཁོར་ཡུག་དྲོད་ཚད་སེ་དྲོད25℃ནས30℃བར་དང་བརླན་ཚད་བརྒྱ་ཆ100ལ་བརྟན་པོའི་ངང་ཚོད་འཛིན་བྱས་ཏེ་ཕྱི་རོལ་གྱི་དྲོད་ཚད་དམའ་མོས་ཤུགས་རྐྱེན་མི་ཐེབས་པར་བྱས། ལག་རྩལ་དེས་ཟམ་གདན་གྱི་སྲ་ཚད་ཚད་ལོན་པར་སྔར་དང་བསྡུར་ན་དུས་ཚོད་ཉིན1ནས2བར་ཇེ་ཐུང་བཏང་ནས་ལས་ཡུན་ཇེ་ཐུང་བཏང་བ་དང་། ཆབས་ཅིག་ཏུ་ཨར་འདམ་སྲ་འགྱུར་ལེགས་པོ་བྱུང་སྟེ་ཨར་འདམ་གྱི་སྒྲིག་གཞིའི་ཆ་སྙོམས་རང་བཞིན་དང་རྒྱུན་སྲིང་རང་བཞིན་མཐོ་རུ་བཏང་བ་དང་། འཁྱགས་གས་དང་སྐམ་འཁུམ་གས་སྲུབས་སོགས་ཀྱི་གནད་དོན་ཐག་གཅོད་བྱས་པ་རེད།
མཐོ་སྒང་གི་ཁོར་ཡུག་ཁྲོད་འབད་བརྩོན་ལྷོད་མེད་ཀྱིས་འགག་སྒྲོལ་བྱས་རྗེས། ལས་གཞི་པུའུ་ཡིས་ལག་རྩལ་གསར་གཏོད་ལ་བརྟེན་ནས་ཨར་ལས་ཀྱི་དཀའ་གནད་ཐག་གཅོད་དེ་ཟམ་གདན་ཨར་ལས་ཀྱི་ལས་འགན་བདེ་བླག་ངང་ལེགས་གྲུབ་བྱུང་བ་རེད། ཕྱིན་ཆད། སྟོབས་ཤུགས་གཅིག་བསྡུས་ཀྱིསTདབྱིབས་ཟམ་རྐང་འདེགས་སྒྲིག་སྔོན་ནས་བཟོས་པ་དང་ཟམ་པའི་མཐོ་སའི་གྲུབ་ཆ་ཨར་ལས་ལ་བསྐུལ་རྒྱུ་ཡིན་པ་རེད།དར་མདོ་ནས་ར་རྔ་ཁའི་མྱུར་ལམ་ལེགས་གྲུབ་བྱུང་རྗེས་སི་ཁྲོན་དང་བོད་ཁུལ་ས་གནས་ཁག་བར་གྱི་འགྲིམ་འགྲུལ་འབྲེལ་གཏུག་སྔར་བས་ལེགས་སུ་ཕྱིན་པ་དང་། ས་གནས་དེ་གར་འགྲིམ་འགྲུལ་འགན་ལེན་ནུས་ལྡན་བྱས་ཤིང་། ལམ་རྒྱུད་ཀྱི་དཔལ་འབྱོར་འཕེལ་རྒྱས་དང་། རིག་གནས་ཡུལ་སྐོར་ཐོན་ཁུངས་གསར་སྤེལ། ཡུལ་སྡེ་དར་རྒྱས་སོགས་ལ་སྐུལ་ཁྲིད་བྱེད་པར་མ་ཟད། མི་རིགས་མཐུན་སྒྲིལ་ཟབ་ཏུ་གཏོང་བར་དེ་བས་དོན་སྙིང་གལ་ཆེན་ལྡན་པ་རེད།། （ སྐལ་བཟང་རྒྱ་མཚོས་བསྒྱུར།）