སྔོ་ཐིང་ངེར་གྱི་ནམ་མཁའི་དཀྱིལ་དུ་སྤྲིན་པ་དཀར་པོ་ཞིག་ཁེར་སྡོད་བྱས་འདུག། ཅི་ཞིག་ལ་རེ་ཞིང་སྒུག་པའི་བཟོ་ལྟ་དེ་ནི་ཡུན་རིང་ཐུག་འཕྲད་མ་བྱུང་བའི་སྙིང་ཉེ་ལ་སྒུག་པ་ཇི་བཞིན་ཧ་ཅང་ཡིད་དུ་འོང་བ་ཞིག་རེད། སྤྲིན་པ་ནི་སྤྲིན་པ་རང་སྟེ། བྱང་རླུང་ལྡང་བའི་ཚེ་ན་སྡོད་ཚུགས་མི་ཐུབ་པར་འགྲོ་དགོས་པ་ནི་བཟློག་ཐབས་བྲལ་བའི་གཤིས་སུ་ལགས་ན་ཡང་། མཁའ་དབྱིངས་སུ་གཅིག་པུར་རྒྱུ་བའི་སྤྲིན་པ་དེ་ནི། བྱང་རླུང་གིས་ཇི་ཙམ་རྗེས་སུ་དེད་ཅིང་མདུན་ནས་དྲུད་ན་ཡང་། འཁྱུག་ཙམ་འཁྱུག་ཙམ་གྱིས་འགྲོས་དལ་མོ་བྱེད་པ་ལས་འགྲོས་མགྱོགས་པོ་བྱས་ནས་འགྲོ་མི་འདུག། དེ་ནི་སློབ་གྲྭར་འགྲོ་འདོད་མེད་པའི་བྱིས་པ་ཞིག་གོམ་པ་གཅིག་རེ་གཉིས་རེ་བྱས་ནས་དལ་གྱིས་སློབ་གྲྭར་འགྲོ་བཞིན་པའི་རྣམ་པ་དང་མཚུངས། གཅིག་པུར་རྒྱུ་བའི་སྤྲིན་པ་དེ། དེ་ལྟར་འགྲོས་མགྱོགས་པོ་བྱས་ནས་མི་འགྲོ་བའི་གནད་ཀྱང་། ཁོའི་ཤུལ་དུ་བླ་ན་མེད་པའི་མཛེས་སྡུག་གི་རྨི་ལམ་ཞིག་དང་། རྨི་ལམ་དེ་སྐྲུན་མཁན་གྱི་སྤྲིན་པ་དམར་པོ་ཞིག་ཤུལ་དུ་ལྷག་ཡོད་པས་ཡིན་སྐད་འདུག། ཁོས་སྙིང་ཉེ་བའི་སྤྲིན་པ་དེ་རེ་ཞིང་སྒུག་པའི་རྒྱུ་མཚན་གྱིས་དབང་ཤུགས་ཆེ་བའི་བྱང་རླུང་གིས་བཙན་གྱིས་དེད་ན་ཡང་། འགྲོས་དལ་མོ་བྱས་ནས་འགྲོ་བ་ལ་གནོད་པ་གང་ཡང་བཟོ་ཐུབ་ཀྱིན་མི་འདུག སེམས་མེད་ཀྱི་སྤྲིན་པ་ལ་ཡང་སེམས་ལྡན་གྱི་འུ་ཚོ་དང་འདྲ་བར་གཏམ་རྒྱུད་ཡིད་དུ་འོང་བ་རེ་འདུག་ཨང་། གཏམ་རྒྱུད་རེ་རེས་ཀྱང་འུ་ཅག་གི་ནང་སེམས་ལ་བརྗེད་ཐབས་བྲལ་བའི་མཛའ་བརྩེ་དང་། གསོན་ཤུགས་རྒྱས་པའི་ཚན་ཁ་དང་རེ་བ་གནང་ཡོང་གིན་འདུག་གོ། །

སྙིང་ཉེ་ལགས། ངས་ཁྱེད་རང་སྒུག་པའི་བཟོ་ལྟ་ནི། མཁའ་དབྱིངས་སུ་གཅིག་པུར་རྒྱུ་བའི་སྤྲིན་པ་དེ་དང་ཧ་ཅང་མཚུངས། དེ་ལ་ཡང་ཅུང་ཙམ་མི་མཚུངས་ས་ཞིག་ཡོད་པ་དེ་ནི། ཁྱེད་རང་ངའི་ཉེ་ས་རུ་གནས་ཤིང་ང་རང་བརྩེ་བས་སྐྱོང་གིན་ཡོད་པ་དེའོ། ། གཅིག་པུར་རྒྱུ་བའི་སྤྲིན་པ་ཡིས་བསྒུག་པ་ནི་ད་ལྟའི་སྤྲིན་པ་དམར་པོ་དེ་ཡིན་ངེས་ལ། ངས་དུས་ཚོད་དང་སྐར་ཆ་རེ་རེར་བསྒུག་པའི་ཁྱེད་ནི་མ་འོངས་པའི་ཁྱེད་རང་ཡིན། ཁྱེད་ཀྱི་མ་འོངས་པ་གླེང་ན། ངའི་ནང་སེམས་སུ་འབྲུག་སྒྲ་ལྡི་རི་རི་སྒྲོག་པའི་སྤྲིན་པ་ནག་པོ་ཞིག་དང་། ཆར་བ་སིམ་སིམ་ཞིག་བབས་རྗེས་ཀྱི་འཇའ་ཚོན་མཛེས་པོ་ཞིག་ཀྱང་ཡིད་ལ་འཆར་བྱུང་ལ། ཁྱེད་ཀྱི་མ་འོངས་པར་བསམ་ན། ང་རང་གཅིག་པུར་རྒྱུ་བའི་སྤྲིན་པ་དང་འདྲ་བར། སེམས་གཅོང་གིས་བཟི་ནས་སྨྱོ་གྲབས་བྱེད་པའི་བཟོ་ལྟ་ཞིག་ཀྱང་མངོན་ཡོང་། སྙིང་ཉེ་ལགས། ཁྱོད་དང་ང་ཡི་མ་འོངས་པའི་དུས་དེར། ཁྱོད་རང་ད་ལྟ་ནང་བཞིན། མགོ་བོ་ངའི་བྲང་ཁར་བཞག་སྟེ་ཕན་ཚུན་ལ་སེམས་གཏམ་སྙད་ཀྱིན་ཡོད་ཨང་། ཁོར་ཡུག་གི་མཛེས་སྡུག་ཅི་དགའ་ལ་རོལ་མྱོང་བྱ་ཞིང་། ཁྱེད་རང་ང་ལ་འཐམ་བཞིན་བསྡད་པས་ལྷིང་འཇགས་ཀྱི་འཚོ་བ་འདི་འདྲ་ཞིག་ཡོད་ན་ག་འདྲའི་སྐྱིད་པོ་ཞིག་ཡོད་རྒྱུ་རེད་ཨང་། སྙིང་ཉེ་ལགས། ཁྱེད་ཀྱིས་འུ་གཉིས་ཀྱི་མ་འོངས་པ་ཅི་འདྲ་ཞིག་ཡིན་པ་ཤེས་སམ། ཅི་ཙམ་བསམ་གཞིག་བཏང་ཡང་དཔག་ཐབས་བྲལ་བའི་མ་འོངས་པའི་ནང་དུ། འུ་གཉིས་ཁོ་ནར་དབང་བའི་མཉམ་འཛོམས་ཀྱི་མཛེས་སྡུག་དེ་དག། དུས་ཡུན་རིང་ཐུང་ཅི་ཙམ་ཞིག་ལ་བཀོད་སྒྲིག་བྱས་ཡོད་པ་ཁྱེད་ཀྱིས་ཤེས་སམ།

འབྱུང་འགྱུར་གྱི་འཚོ་བ་ནི་འདི་འདྲ་ཞིག་ཡིན་ཞེས་འུ་ཅག་སུ་ཡིས་དཔག་མི་ནུས་ཨང་། དེ་ལྟར་དཔོག་པའི་ནུས་པ་ཞིག་སུ་ལ་ཡང་མེད་པ་བདེན་དུ་ཆུག་མོད། ངས་ནམ་རྒྱུན་འབྱུང་འགྱུར་གྱི་འཚོ་བའི་ཕྱོགས་ལ་བསམ་གཞིག་ཡང་ཡང་བཏང་བ་ཡིན་ལ། བསམ་གཞིག་མང་ཤོས་ནི་འུ་གཉིས་སོ་སོར་བྲལ་རྗེས་ཀྱི་ཕྱོགས་ལ་བཏང་བ་ཡིན། མ་འོངས་པར་འུ་གཉིས་སོ་སོར་བྲལ་ངེས། མ་རེད། འུ་གཉིས་རྐྱང་པ་ཟེར་ན་ག་ལ་འགྲིག། འཇིག་རྟེན་གྱི་བྱ་དངོས་ཡོད་ཚད་ཀྱང་། ཆར་རྗེས་ཀྱི་འཇའ་ཚོན་ཇི་བཞིན་ཡོངས་སུ་འབྲལ་ངེས། སྙིང་ཉེ་བའི་ཁྱོད་ཀྱི་བརྩེ་སེམས་དང་བྱད་གཟུགས་ཀྱང་རྨེག་མེད་དུ་གྱུར་ངེས་ལ། ང་རང་ཁྱོད་ལ་དགའ་བའི་མཛེས་སྡུག་གི་རྨི་ལམ་རིང་མོ་དེ་ཡང་གཏམ་རྒྱུད་ཙམ་ལས་ཡོད་མི་སྲིད། མ་འོངས་པ་ནི་ཧ་ཅང་འཇིགས་ཡེར་བའི་སེམས་ཁུར་ལྷག་མ་ཞིག་རེད་ཨང་། དེས་ང་དང་ཁྱོད་ཀྱི་ནང་སེམས་ཀྱི་འཇིག་རྟེན་ལ་སེམས་གཅོང་གི་ཁ་བ་འབབ་ཏུ་བཅུག་བྱུང་།

བཟློག་ཐབས་བྲལ་བའི་མ་འོངས་པ། ཅིས་ཀྱང་བརྒྱུད་དགོས་པའི་འཁོར་བའི་ཆོས་ཉིད། སང་ཉིན་གྱི་ཉི་མ་ཇི་བཞིན། དོ་ནུབ་མུན་པའི་རྔམས་ཀ་ཇི་ཙམ་ཟབ་ན་ཡང་འཆར་དགོས་པ་ནི་བཟློག་ཏུ་མེད་པ་ཞིག་རེད་དོ། ། སྙིང་ཉེ་ལགས། མ་འོངས་པས་ང་ལ་གནང་བའི་སེམས་ཁྲལ་འདི་ཁྱོད་ཀྱིས་ཚོར་བྱུང་ངམ། ཁྱེད་ལ་ཡང་ངའི་ཚོར་གཤིས་དང་འདྲ་བར་སེམས་ཁྲལ་ལྷག་མ་ཞིག་ཨེ་འདུག། མཁའ་དབྱིངས་སུ་གཅིག་པུར་རྒྱུ་བའི་སྤྲིན་པ་ལ་སེམས་ཁྲལ་ཅི་ཡང་མེད་པ་འདྲ་བྱུང་། ཁོས་མི་རྟག་པ་བློས་བཏང་ཐུབ་པས་ཡིན་ནམ། ཡང་ན་མི་རྟག་པར་བསམ་གཞིག་མ་བཏང་བ་ཡིན་ངེས། མ་འོངས་པས་ང་ལ་གནང་བའི་སེམས་ཁྲལ་དེ་ཁོས་ཅིའི་ཕྱིར་ཚོར་མི་ཐུབ་པ་རེད་ཨང་། སེམས་ཁྲལ་དེ་ནི་སེམས་ཡོད་མེད་ཀྱི་འགལ་ཟླའི་གཤིས་སུ་གྲུབ་པ་ཞིག་ཡིན་པས་རེད་ཨང་།

༼ ཚོར་སྦྲང་། ༽