སྣུམ་གནག་སྐྲ་ལོ་ཕྲག་པར་དཔྱངས།།
གོམ་སྟབས་བདེ་མོ་ལྷོད་ཀྱིས་སྤོས།།
ཤ་རྩ་དཀར་བའི་གླུ་མ་ཁྱོད།།
སེང་ལྕམ་འབྲུག་མོའི་ཡན་ཞིག་རེད།།
གང་ན་གླུ་དང་གར་ཡོད་ཚེ།།
ཁྱོད་ནི་དེའི་ཡི་ཕྲ་རྒྱན་ཡིན།།
སྐད་སྦུག་ལག་ཏུ་ཐོགས་པ་ཡིས།།
མི་ཀུན་དགའ་སྐྱིད་དཔལ་ལ་བཀོད།།
སྐྲ་ལོ་རླུང་གིས་ལྷབ་ལྷུབ་བསྐྱོད།།
གླུ་སྐད་སྙན་མོ་སིང་སིང་གྲགས།།
ཉམས་ཀྱིས་གར་སྟེགས་ཡོམ་ཡོམ་སྒུལ།།
དབྱངས་ཀྱི་བདག་མོ་གཡང་ཕྱུག་མཚོ།།
གནའ་གླུ་བླངས་ན་གནའ་སྲོལ་ལྡན།།
དེང་གླུ་བླངས་ན་གསོན་ཤུགས་མངའ།།
གནའ་དེང་གླུ་ཡི་མཛོད་ཆེན་ཁྱོད།།
ངག་གི་ཚངས་སྲས་ཁྱོད་མིན་སུ།།
ཧི་མ་ལ་ཡི་སྲས་མོ་ཡིས།།
བོད་ཀྱི་གར་སྟེགས་ཤིག་ཤིག་གཡོ།།
ཚ་བ་རོང་གི་བརྩེ་འདུན་གྱིས།།
ལོ་རྒྱུས་དར་སྐུད་སེམས་སུ་འཐེན།།
སེམས་དང་སེམས་པ་འདྲེས་སོང་ནས།།
སྙིང་གཏམ་ཚིག་གསུམ་ཤོར་སོང་བས།།
གནས་འགྲོ་བུ་མོའི་སྨྲེང་གླུ་དེས།།
ཉན་མཁན་ཁྲི་སྟོང་སྐྱོ་བར་བྱས།།
བྲལ་གདུང་སེམས་ཀྱི་ན་ཟུག་གིས།།
སེམས་པ་སྐྱ་མོ་ཆུ་ལ་འཕེན།།
མགོན་དང་བྲལ་བའི་འཁོར་འབངས་ལ།
སྐྱོ་བའི་སེམས་གསོ་ཐེངས་ཤིག་བྱས།།
སྐྱིད་པོ་རི་ཡི་ལྷན་འཛོམས་སྟེང་།།
གངས་ལྷ་མེ་ཏོག་བཞད་སོང་བས།།
འཇིག་རྟེན་འདི་ཡི་གླུ་དབྱངས་དེ།།
དེ་ཡི་ཡན་ལ་མེད་ཚོད་རེད།།
རི་དྭགས་སྐྱོ་གླུ་བསྐྱར་ལེན་གྱིས།།
སེམས་ལ་ཚོར་བ་གཞན་ཞིག་སྟེར།།
མ་བུ་བྲལ་བའི་གདུང་བ་དེས།།
སྙིང་རྗེའི་ས་བོན་སེམས་སུ་བཏབ།།
གར་སྟེགས་སྟོང་གི་བང་ཁ་ནས།།
ཁྱོད་ཀྱི་གར་སྟབས་འཁྱུགས་སེ་འཁྱུག།།
སྒྲ་སྒམ་སྟོང་གི་འཕུར་རིམ་ཁྲོད།།
ཁྱོད་ཀྱི་གླུ་སྐད་ལྷང་ལྷང་གྲགས།།
སྐེད་མེད་ལུས་ཕྲ་ཁྱོད་ཉིད་ཡིན།།
དྲུག་འགྱུར་ཚངས་དབྱངས་ཁྱོད་ཉིད་ཡིན།།
ཁྱོད་ནི་གླུ་གར་སྒྱུ་རྩལ་ཁྲོད།།
དཔལ་ཀུན་འཛོམས་པའི་བདག་མོ་ཡིན།།
ཧི་མ་ལ་ཡི་སྲས་མོ་ཁྱོད།།
གངས་རིའི་འདབས་ནས་ལམ་ལ་ཆས།།
རྒྱལ་ཡོངས་གར་སྟེགས་གང་མང་སྟེང་།།
བོད་མོ་ཁྱོད་ཉིད་ལྷིང་ལ་བུད།།
གངས་ཅན་བོད་ཀྱི་སྒྱུ་རྩལ་མ།།
གླུ་གར་གཤོག་ཟུང་ཐོགས་པ་པོ།།
ཁྱོད་ནི་དབྱངས་ཀྱི་མཁའ་ལམ་ནས།།
ཐོགས་མེད་རྩེན་པའི་རྒོད་པོ་ཡིན།།
བོད་ཀྱི་བུ་མོ་བཞིན་བཟང་མ།།
གཏམ་སྙན་སྨྲ་ཞིང་གཤིས་ཀ་འཇམ།།
མཐོ་དམན་ཀུན་ལ་འཛུམ་མདངས་ཅན།།
ཁྱོད་ཀྱི་ཀུན་སྤྱོད་བཟང་ཞེས་གྲགས།།
རང་སྐད་གཙང་མའི་སྨྲ་བརྗོད་དག།།
རྒྱ་བོད་སྐད་ལ་བྱང་ཆ་ཆེ།།
ཁྱོད་ནི་དུས་ཀྱི་མཛངས་མ་སྟེ།།
གླུ་གར་ཤེས་བྱའི་བང་མཛོད་ཡིན།།
སྐྱེ་གཟུགས་ཁྱད་འཕགས་ཉམས་ཤིག་ཡོད།།
ནང་གི་ཡོན་ཏན་རྒྱན་དུ་ཆེ།།
ཕྱི་ནང་གཉིས་ཀ་ཆ་འཛོམས་པའི།།
གཡང་ཕྱུག་མཚོ་ཁྱོད་བོད་ཀྱི་རྒྱན།།
གླུ་དང་གར་གྱི་སྒྱུ་རྩལ་གྱི།།
དཔལ་ཀུན་མ་ལུས་ཁྱོད་ལ་འཛོམས།།
དབྱངས་ཅན་ཕྱག་གི་རྒྱུད་དྲུག་དེ།།
ཁྱོད་ལ་སྟེར་རམ་འཕྱང་མོ་ཉུག།།
གངས་ཀྱི་སྲས་མོ་གཡང་ཕྱུག་མཚོ།།
གངས་ལ་བཞད་པའི་མེ་ཏོག་ཡིན།།
གངས་དཀར་ཨ་མའི་ཞལ་རས་ལ།།
གངས་ཀྱི་རིན་ཐང་འཛོམས་པར་ཤོག།
༼ ཨོ་རྒྱན་དོན་གྲུབ།༽