དངུལ་གདུབ་དཀར་པོའི་ཕྲ་ལ།།
དམར་པོ་བྱུ་རུ་མེད་ཀྱང་།།
ཞེ་འདང་ཁ་བཏགས་དཀར་པོ།།
རྟགས་བརྒྱད་རི་མོས་བརྒྱན་ཡོད།།
སེམས་ཀྱི་མཛེས་པ་རྟོགས་ན།།
ཡིད་ཆེས་གནང་དང་ཆོག་པ།།
གསེར་གྱི་གའུའི་མཛེས་རྒྱན།།
སྔོན་པོ་གཡུ་ཁྲ་མེད་ཀྱང་།།
བརྩེ་སེམས་དམར་པོའི་མེ་ཏོག།
དུང་བའི་ཟེའུ་འབྲུ་འཁྲུངས་ཡོད།།
ཚེ་ཡི་བློ་ཕུགས་བཅོལ་ན།།
དམར་པོ་སྙིང་གིས་གཅེས་ཆོག།
བ་སོའི་ཕྲེང་བ་དཀར་པོ།།
སྟོང་སྐུད་ཕྲེང་ལུང་མེད་ཀྱང་།།
ཚིག་གི་ལྕགས་རིས་མཐའ་ལ།།
འགྱུར་མེད་གཡུང་དྲུང་བྲིས་ཡོད།།
སེམས་པ་སེམས་ཀྱིས་ཤེས་ན།།
ཞེ་འདང་མཚོ་མོ་འཁྱིལ་ཆོག།
ཕ་ལམ་སྐེ་རྒྱན་སྟེང་ལ།།
གཡང་ཊིའི་ཁྲ་སྐོར་མེད་ཀྱང་།།
རྒྱུ་འབྲས་ཡིད་ཆེས་སྟེང་ནས།།
ལྷག་བསམ་དཀར་པོས་ཞུས་ཡོད།།
ངོ་ལྐོག་གཉིས་མེད་གནང་ན།།
ཕྱི་མར་སྨོན་ལམ་འབུལ་ཆོག།
༼ རྡོ་རྗེ་ཐར་ལམ།༽