དཀའ་སྡུག་ལོ་ཟླ་བརྒལ་བརྒལ་ནས།། ད་ཆར་སྐྲ་ལོ་དུང་བཞིན་དཀར།།
འཚོ་བ་ཉིན་བཞིན་སྐྱིད་དུས་ལ།། ཕྱི་མའི་གཡབ་མོས་འབོད་བཞིན་གདའ།།
བུ་སྲིང་མ་གཏོགས་མི་བསམ་པའི།། ཕ་མ་དྲིན་ཅན་སྙིང་རེ་རྗེ།།
ད་ལྟ་འཚོ་ཞིང་བཞུགས་ཡོད་ན།། ཞབས་ཕྱི་ལྷག་པར་བསྒྲུབ་ཆོག་མོད།།
འཇིག་རྟེན་གཞན་དུ་སོང་ཉིན་མོར།། བསྔོ་སྨོན་ཙམ་ལས་མཇལ་དུས་མེད།།
རང་ཉིད་ཕར་ཕར་རྒ་བའི་ཚེ།། ཕ་ཁྱིམ་མ་ཁྱིམ་ལྡབ་འགྱུར་དྲན།།
ཕ་མ་མེད་པའི་ལོ་ཟླའི་ནང་།། བྱམས་བརྩེའི་ཚོར་བ་ཡལ་ནས་ཐལ།།
ཕ་མར་ཞབས་ཕྱི་སྒྲུབ་སྟངས་ཐད།། གནའ་དེང་ཀུན་ལ་མང་མོད་ཀྱང་།།
ཁམས་དང་མོས་པ་མི་འདྲ་བས།། ཞབས་ཕྱི་གང་ལ་གང་འཚམ་དགོས།།
ནོར་གྱིས་དབུལ་བའི་ཕ་མ་ལ།། རྒྱུ་དངུལ་བྱིན་པ་ཞབས་ཕྱི་ཡིན།
གྲོགས་མེད་རྟེན་མེད་ཕ་མ་ལ།། ཉེ་བར་བཅར་བ་ཞབས་ཕྱི་ཡིན།།
ནད་ཀྱིས་མནར་བའི་ཕ་མ་ལ།། གཉོར་སྐྱོང་བཟང་བ་ཞབས་ཕྱི་ཡིན།།
ཁ་མང་ལབ་འདོད་ཕ་མ་ལ།། ཉན་འཇོག་མཁས་པ་ཞབས་ཕྱི་ཡིན།།
སྤྲོ་ཐུང་ཅན་གྱི་ཕ་མ་ལ།། བསམ་ཤེས་བྱེད་པ་ཞབས་ཕྱི་ཡིན།།
ཁོག་རྒྱ་དོག་པའི་ཕ་མ་ལ།། སེམས་གསོ་མཁས་པ་ཞབས་ཕྱི་ཡིན།།
ངོ་སྲུང་དགའ་བའི་ཕ་མ་ལ།། ཁ་བྱམས་ཚིག་བྱམས་ཞབས་ཕྱི་ཡིན།།
བཀའ་དབང་བཙན་པའི་ཕ་མ་ལ།། ཡར་ལན་མི་བསློག་ཞབས་ཕྱི་ཡིན།།
རང་གི་ཁམས་དང་མི་འཕྲོད་མོད།། བཟོད་བསྲན་ཐུབ་པ་ཞབས་ཕྱི་ཡིན།།
དུས་དང་རྣམ་པ་ཀུན་ཏུ་ཡང་།། ཁ་མིག་མི་ལོག་ཞབས་ཕྱི་ཡིན།།
མདོར་ན་གང་དང་ཅི་བྱས་ཀྱང་།། ཕ་མའི་ཐུགས་བསྟུན་ཞབས་ཕྱི་ཡིན།།
དགའ་བ་ཐམས་ཅད་དགེ་བ་ཡིན།། ཕ་མ་དགའ་ན་ཡང་དགེ་ཡིན།།
ཕ་མ་ལ་ཁའི་ཉི་མ་རེད།། ཡུན་རིང་མི་སྡོད་ལ་རན་ཡོད།།
ཕ་མ་སྟོན་མཇུག་མེ་ཏོག་འདྲ།། ཡུན་རིང་མི་སྡོད་རྙིད་རན་ཡོད།།
ཕ་མ་སྣུམ་ཟད་མར་མེ་འདྲ།། ཡུན་རིང་མི་སྡོད་གཟིམ་རན་ཡོད།
ཕ་མ་དཔྱིད་གསུམ་ཁུ་བྱུག་འདྲ།། ཡུན་རིང་མི་སྡོད་འགྲོ་རན་ཡོད།།
ཕ་མ་འཚོ་བཞུགས་བུ་སྲིང་ཚོ།། གཞན་ལ་མེད་པའི་སྐྱིད་ཅིག་ཡིན།།
ད་ལྟ་འཚོ་བཞུགས་ཕ་མ་ལ།། ཞབས་ཕྱི་སྔ་ན་བསོད་ནམས་ཡིན།།
ཕ་མ་འཚོ་བཞུགས་བུ་སྲིང་ཚོ།། གཞན་ལ་མེད་པའི་ནོར་མཆོག་ཡིན།།
ད་ལྟ་འཚོ་བཞུགས་ཕ་མ་ལ།། ཞབས་ཕྱི་སྔ་ན་དྲིན་ལན་ཡིན།།
བསོད་ནམས་ཡོད་དུས་མ་བསག་ན།། བསོད་དོ་རང་དང་རྒྱང་ནས་འགྲོ།།
དྲིན་ལན་འཇལ་སྐལ་ཡོད་དུས་སུ།། ཡལ་བར་འདོར་བ་ཨ་རེ་ཕངས།།
ཨ་ཕ་སྤྱན་རས་གཟིགས་དབང་ཡིན།། ཨ་མ་རྗེ་བཙུན་སྒྲོལ་མ་ཡིན།།
ཡབ་ཡུམ་གསོན་པོ་ཟུར་བཞག་ནས།། ལྷ་སྐུ་བེམ་པོ་མ་མཆོད་ཅིག།
གནམ་འོག་ཕ་མ་ཐམས་ཅད་ལ།། ནད་མེད་འཚོ་ཡུན་རིང་བ་དང་།།
སྡིག་མེད་དགེ་ལ་བརྩོན་པ་དང་།། སྡུག་མེད་ཚེ་མཐར་བརྟན་པ་དང་།།
མནར་གཅོད་མེད་པར་འཆི་ནུས་པའི།། སྨོན་ལམ་རྣམ་དག་སྙིང་ནས་འདེབས།།
༼ ཨ་ཐུབ།༽