ཉེ་ཆར།སི་ཁྲོན་ཞིང་ཆེན་ཚན་རྩལ་མཐུན་ཚོགས་དང་དཀར་མཛེས་ཁུལ་ཚན་རྩལ་མཐུན་ཚོགས་ཀྱིས་གཙོ་གཉེར་བྱས་པའི་གཞོན་ནུ་ལོ་ཆུང་ཚན་རིག་ཁྱབ་གདལ་གྱི་ཞིབ་སློབ་དང་ཡུལ་སྐོར་མྱོང་རོལ་བྱེད་སྒོ་ཁག་དང་པོ་དེ་དཀར་མཛེས་ཁུལ་དར་མདོ་གྲོང་ཁྱེར་དང་ལྕགས་ཟམ་རྫོང་། གཡག་རྔ་གྲོང་ཁྱེར་མིང་ཧྲན་ཆུས། ཡུས་ཁྲེང་ཆུས་བཅས་སུ་བདེ་བླག་ངང་སྤེལ་བ་རེད། དར་མདོ་གྲོང་ཁྱེར་ར་རྔ་ཁ་སློབ་འབྲིང་གི་དམའ་རིམ་དང་མཐོ་རིམ་སློབ་མ150ཡིས་དུས་ཡུན་ཉིན་གསུམ་རིང་ཞིབ་སློབ་དུ་བསྐྱོད་པ་རེད། ཞིབ་སློབ་ཁྲོད་ཕུན་སུམ་ཚོགས་པའི་ལོ་རྒྱུས་རིག་གནས་དང་།ལག་ལེན་དུ་རང་བྱུང་གི་གསང་བ་འཚོལ་ཞིབ་བྱས་ནས་རིག་ཚན་བརྒལ་བའི་ཕྱོགས་བསྡུས་རྣམ་པའི་སློབ་སྦྱོང་གི་མྱོང་རོལ་གསར་པ་བྱེད་དུ་འཇུག་པ་རེད།
ད་ཐེངས་ཞིབ་སློབ་དེ་གསར་བརྗེའི་སྙིང་སྟོབས་བརྒྱུད་འཛིན་དང་།ས་གཤིས་དང་སྐྱེ་ཁམས་ཚན་རིག་ཁྱབ་གདལ།ཇའི་རིག་གནས།ཚན་རྩལ་མྱོང་རོལ་བཅས་ཀྱི་ལྟེ་བའི་གཙོ་དོན་ཟུང་དུ་སྦྲེལ་ནས་སྣ་མང་ཅན་གྱི་ལམ་ཕྱོགས་ཞིབ་སློབ་བྱས་པ་རེད། སློབ་མ་ཚོ་ལྕགས་ཟམ་དུ་སྐྱོད་བཞིན་ལྕགས་ཟམ་མྱུར་འཕྲོག་བྱས་པའི་ལོ་ཟླར་བསྐྱར་དྲན་བྱས་པ་དང་། ཚད་ལྡན་ཡིག་ཆ་དཔྱད་བཀླགས་དང་མཉམ་དུ་དམ་བཅའ་འཇོག་པ་བརྒྱུད་རྒྱལ་གཅེས་ཀྱི་བརྩེ་སེམས་དེ་བས་ཟབ་ཏུ་ཕྱིན།ལྕགས་ཟམ་ཁ་འཕྲེད་བཅད་ས་གཤིས་དངོས་མང་བཤམས་སྟོན་ཁང་དུ་བསྐྱོད་ནས་བྲག་རྡོ་དམར་དཔེ་ལ་ལྟ་ཞིབ་དང་འགྱུར་རྡོ་བརྐོས་པར་རྒྱག་པ།འཕྲེད་རྒྱུག་རི་ཁུལ་གྱི་ས་གཤིས་གསང་བ་བརྟོལ་ནས་མི་རིགས་ཀྱི་གཟུགས་མེད་རིག་གནས་ཤུལ་བཞག་མྱོང་རོལ་དང་ཟུང་དུ་སྦྲེལ་ནས་ཚན་རིག་དང་རིག་གནས་ཤེས་རྟོགས་ཀྱི་འབྲེལ་ལམ་བཙུགས་པ་རེད།
གཡག་རྔ་གྲོང་ཁྱེར་དུ་སློབ་མ་ཚོས་འཛམ་གླིང་ཇའི་རིག་གནས་དངོས་མང་བཤམས་སྟོན་ཁང་དུ་བསྐྱོད་དེ།ཇའི་འབྱུང་ཁུངས་དང་བརྒྱུད་སྤེལ་གཙོ་རྐང་བརྒྱུད་ཇ་ལོའི་སྒྱུ་རྩལ་ལྟ་སྦྱོང་དང་ཇ་བཟོ་བ།ཇ་ལོའི་གུས་སྲོལ་ཉམས་ལེན་བཅས་བྱས་ནས་གནའ་བོའི་ཇ་འདྲེན་བརྡལ་ལམ་གྱི་རིག་གནས་རིན་ཐང་འཚོལ་ཞིབ་བྱས་པ་རེད། པི་ཧྥེང་ཞ་སྐྱེ་ཁམས་ཚན་རིག་ཁྱབ་གདལ་ལག་ལེན་རྟེན་གཞིར་གྲོག་རོང་དུ་རྐང་ཐང་སྐྱོད་པ་དང་རི་སྐྱེས་སྲོག་ཆགས་ལ་ལྟ་ཞིབ་བྱས་པ།སློབ་མ་ཚོས་ཐག་ཉེ་ས་ནས་སྐྱེ་དངོས་སྣ་མང་རང་བཞིན་སྲུང་སྐྱོང་གི་ད་ལྟའི་གནས་ཚུལ་ཤེས་རྟོགས་བྱས་ནས་སྐྱེ་ཁམས་སྲུང་སྐྱོང་གི་འདུ་ཤེས་ཟབ་ཏུ་བཏང་བ་རེད།
སློབ་མ་ཚོས་ད་ཐེངས་ཀྱི་ཞིབ་སློབ་ལ་སློབ་གསོའི་རང་བཞིན་དང་སྤྲོ་སྣང་རང་བཞིན་གཉིས་ཀ་ལྡན་པས་གསར་བརྗེའི་ལོ་རྒྱུས་དང་རང་བྱུང་ཚན་རིག།སྲོལ་རྒྱུན་རིག་གནས་བཅས་ལ་གོ་བ་གཏིང་ཟབ་ལེན་ཐུབ་སོང་ཞེས་བཤད།སླད་ཕྱིན་དཀར་མཛེས་ཁུལ་ཚན་རྩལ་མཐུན་ཚོགས་གྱིས་ཚན་རིག་གིས་བདེ་སྐྱིད་གཉེར་བ་ཞེས་པའི་གྲགས་རྟགས་བྱེད་སྒོ་གཙོ་བོར་འཛིན་ནས་ས་ཁོངས་བརྒལ་བའི་ཚན་རིག་ཁྱབ་གདལ་ཞིབ་སློབ་རྒྱུན་མཐུད་ངང་སྤེལ་ནས་གཞོན་ནུ་ལོ་ཆུང་ཚོས་ལག་ལེན་ཁྲོད་གསར་བརྗེའི་རྒྱུད་འཛིན་དང་ཚན་རིག་སྙིང་སྟོབས་བརྒྱུད་འཛིན་ལ་རམ་འདེགས་བྱ་རྒྱུ་རེད།།
( བདེ་ཆེན་གྱིས་བྲིས།)