ཉེ་ཆར།འབའ་ཐང་རྫོང་རིག་རྩལ་ལས་རིགས་མཉམ་འབྲེལ་ལྷན་ཚོགས་དང་སྤྱི་ཚོགས་ཚན་རིག་མཉམ་འབྲེལ་ལྷན་ཚོགས། རྫོང་རིག་གནས་རྒྱང་སྒྲོག་ཅུས། རྫོང་གཟུགས་མེད་རིག་གནས་ཤུལ་བཞག་མཐུན་ཚོགས་བཅས་ཀྱིས་མཉམ་དུ་ཞིང་ཆེན་རིམ་པའི་གཟུགས་མེད་རིག་གནས་ཤུལ་བཞག་གི་མཚོན་བྱེད་རང་བཞིན་གྱི་བརྒྱུད་འཛིན་པ་བཀྲ་ཤིས་དོན་འགྲུབ་གསར་རྩོམ་རོགས་སྐྱོར་བྱ་ཡུལ་གཙོ་བོར་གཏན་འཁེལ་བྱས་ཏེ། 《བཀྲ་ཤིས་དོན་འགྲུབ་ཀྱིས་པི་ཝང་དཀྲོལ》ཞེས་པའི་ཆེད་བསྒྲིགས་གསར་རྩོམ་དང་ཁྱབ་གདལ་གཏོང་བར་བསྐུལ་བ་དང་། གཟུགས་མེད་རིག་གནས་ཤུལ་བཞག་ཁྱབ་སྤེལ་གྱི་ཐབས་ལམ་གསར་པ་འཚོལ་ཞིབ་བྱས་ཏེ་འབའ་གཞས་རིག་གནས་དུས་རབས་གསར་པའི་གསར་གཏོད་རང་བཞིན་གྱི་འཕོ་འགྱུར་དང་གསར་གཏོད་རང་བཞིན་གྱི་འཕེལ་རྒྱས་ཡོང་བར་བསྐུལ་བ་རེད།

ཆེད་བསྒྲིགས་དེར་ཚབ་བྱེད་རང་བཞིན་གྱི་རོལ་དབྱངས་ཁྱོན14བསྡུས་ཡོད་པས《སེམས་པ་ལྷོད་པོས་པི་ཝང་སྒྲ་ལ་ཉན》དང《གཞས་དང་ཞབས་བྲོ》ཞེས་པའི་ལེའུ་ཆེན་པོ་གཉིས་སུ་དབྱེ་ཡོད། དེའི་ནང་ཉམས་འགྱུར་སྟོང་དང་ལྡན་པའི་འབའ་གཞས་འདུས་ཡོད་པས། རང་སྦྱོང་དང་གཟུགས་མེད་རིག་གནས་ཤུལ་བཞག་སློབ་གྲྭར་སྤེལ་བའི་སློབ་ཁྲིད་ལ་འཚམ་པར་མ་ཟད། རིག་གནས་ཡུལ་སྐོར་དྲིལ་བསྒྲགས་ཁྱབ་གདལ་ལ་ཡང་འཚམ་པ་རེད། ཆེད་བསྒྲིགས་ནང་སྲོལ་རྒྱུན་གྱི་གདོད་མའི་སྐྱེ་ཁམས་ཉམས་འགྱུར་བརྒྱ་ཆ50སོར་འཇོག་བྱས་པའི་རྨང་གཞིའི་ཐོག་གསར་གཏོད་དང་བཅོས་སྒྲིག་གིས་བརྒྱ་ཆ30བཟུང་བ་དང་འབྲེལ་གསར་རྩོམ་བརྩམས་ཆོས་གསར་རྐྱང་བརྒྱ་ཆ20ཚུད་ཡོད། ཆེད་ལས་ཚོགས་པས་ཕབ་ལེན་བྱས་པ་བརྒྱུད་གཟུགས་མེད་རིག་གནས་ཤུལ་བཞག་སྒྱུ་རྩལ་གྱི་གྲུབ་འབྲས་ནུས་ལྡན་ངང་སྲ་འགྱུར་བྱུང་བ་དང་རྗེས་མཐུད་ཁྱབ་སྤེལ་ལ་སྤུས་ཚད་མཐོ་བའི་ཨང་ཀིའི་ཐོན་ཁུངས་ཉར་འཇོག་བྱས་ཡོད།

ད་སྔར།ཆེད་བསྒྲིགས་རོལ་དབྱངས་དེ“འབའ་ཐང་རིག་རྩལ”དང་རྫོང་རིག་གནས་ཁང་གི་སྤྱི་ཨང་བརྒྱུད་དེ་ཉིན་ལྟར་འགྲེམས་སྤེལ་བྱས་ནས་མང་ཚོགས་ཀྱིས་སློབ་སྦྱོང་དང་མྱོང་རོལ་བྱེད་བདེ་པོར་བྱས། ཕྱིན་ཆད།“དབྱར་གནས་དུས་ཆེན”དང“འབའ་གཞས་རིག་གནས་སྤེལ་རེས་གཟའ་འཁོར”སོགས་དུས་ཆེན་གལ་ཆེན་དང་ཟུང་འབྲེལ་བྱས་ཏེ་པི་ཝང་ཆེད་དོན་འཁྲབ་སྟོན་རུ་ཁག་འཛུགས་པ་དང་། གཟུགས་མེད་རིག་གནས་ཤུལ་བཞག་ཐང་ཆེན་ཞབས་བྲོའི་རྣམ་པ་སོགས་མཉམ་འདྲེས་བྱས་ནས་པི་ཝང་སྒྱུ་རྩལ་གྱི་མང་ཚོགས་ཀྱི་ཡིད་དབང་འཕྲོག་ཤུགས་མངོན་རྒྱུ་དང་། དེ་དང་ཆབས་ཅིག“རིག་གནས་དང་རོལ་དབྱངས”

མཉམ་འདྲེས་བྱེད་སྟངས་འཚོལ་ཞིབ་བྱས་ཏེ“པི་ཝང་དང་འབའ་ཐང་གི་གཏམ་རྒྱུད”ཀྱི་ཉམས་ལེན་རྣམ་པ་བཏོད་ནས་པི་ཝང་གི་སྙན་སྒྲས་སེམས་ཁམས་གསོ་བའི་ཉམས་ལེན་ལྗོངས་ཁུལ་དུ་སྤེལ་ནས་གཞོན་ནུ་རྣམས་ཀྱིས་སྲོལ་རྒྱུན་སྒྱུ་རྩལ་ལ་དགའ་ཞིང་མོས་པ་དང་རིག་གནས་དང་ཡུལ་སྐོར་མཉམ་འདྲེས་འཕེལ་རྒྱས་གཏིང་ཟབ་ཏུ་འགྲོ་བར་རམ་འདེགས་བྱས་པ་རེད།

མ་ལག་ཅན་གྱི་རོགས་སྐྱོར་དང་ཐབས་ལམ་མང་པོས་ཁྱབ་གདལ་བཏང་བ་བརྒྱུད་འབའ་ཐང་པི་ཝང་དཀྲོལ་བ་དང་གསར་རྩོམ་གྱི་གོ་སྐབས་གསར་པ་རྒྱུན་ཆད་མེད་པར་མཐོ་རུ་འགྲོ་བར་མ་ཟད། འབའ་གཞས་དང་པི་ཝང་ས་གནས་དེ་གའི་རིག་གནས་སློབ་ཁྲིད་དང་ཁྱབ་སྤེལ་བྱ་རྒྱུར་ཨང་ཀི་ཅན་དང་མ་ལག་ཅན་གྱི་གཟུགས་བརྙན་ཡིག་ཚགས་བཙུགས་ནས་དེའི་ཡུན་རིང་བརྒྱུད་འཛིན་དང་འཕེལ་རྒྱས་ལ་རྒྱུན་མཐུད་ཀྱི་གསོན་ཤུགས་བསྣན་རྒྱུ་ཡིན་པ་རེད།།

（ཀུན་དགས་བསྒྱུར།）