ཚན་རྩལ་བྱ་འཕུར་བ་ལྟར་འཕེལ་རྒྱས་ཕྱིན་པ་དང་བསྟུན་ནས་མི་རྣམས་ཀྱི་འཚོ་བ་སྔར་ལྷག་གིས་ཆ་འཕྲིན་ཅན་དུ་གྱུར་དང་འགྱུར་བཞིན་པའི་དེང་གི་སྤྱི་ཚོགས་འདིར་ཁ་པར་ནི་མེད་དུ་མི་རུང་བའི་དངོས་པོ་ཉག་གཅིག་ཏུ་གྱུར་ཡོད་དེ། ཁ་པར་གྱིས་ཁྱེད་ལ་སྟབས་བདེ་མོ་དང་། མི་ཤེས་པའི་གནད་དོན་མང་པོ་ཞིག་ཤེས་ཐུབ་པ། མཐོང་མ་མྱོང་བའི་དངོས་པོ་མང་པོ་ཞིག་མཐོང་དུ་བཅུག་པ། སྤྱིར་འཛམ་གླིང་གི་གནས་ཚུལ་དང་སྒོས་རང་གཞན་གྱི་དོན་དག་མང་པོ་ཞིག་གོ་ཐུབ་པ། རྒྱང་རིང་ས་ལ་ཡོད་པའི་ནང་མི་གཉེན་ཉེ་སོགས་དུས་རྟག་པར་གཟུགས་ལམ་བརྒྱུད་ནས་ཁ་བརྡ་བྱེད་ཆོག་པ་སོགས་ཁ་པར་གྱི་ནུས་པ་དང་དགོས་མཁོ་ནི་མ་བཤད་ཀྱང་གོ་ཐུབ་པ་ཞིག་ཏུ་ལགས་སོ།།
རེད་དེ། ཁ་སང་དེ་རིང་ངའི་ཕ་ཡུལ་དང་བོད་འབྲེལ་ས་ཁུལ་གྱི་ས་ཆ་མང་པོ་ཞིག་ཏུ་ཕ་མ་ཚོས་ལོ་གཉིས་ཙམ་ཡན་གྱི་བྱིས་པ་ནས་ལོ་བཅོ་ལྔ་མན་གྱི་གཅེས་ཕྲུག་ཚོ་ལ་དགའ་སྐྱོང་གཅེས་ལངས་ལ་བཏང་ནས་ཁ་པར་ཉིན་མཚན་དབྱེར་མེད་དུ་རྩེ་རུ་བཅུག་འདུག། མ་གཞི་ཕ་མ་སུ་ཡིན་རུང་བྱེད་ཐབས་གང་དྲག་གིས་རང་གི་བྱིས་པའི་དགའ་ཕྱོགས་དང་ཁོའི་སྣང་བ་སྐྱིད་ཐབས། ཅི་ཡག་གང་ཡག་གི་ཐད་ལ་རང་དོན་ལས་ཀྱང་གཙོ་བོར་བཟུང་ནས་བྱིས་པའི་རེ་བ་སྐོང་གིན་ཡོད་ལ། སྔོན་ལ་ཆ་རྒྱུས་མེད་པའི་ཁ་པར་གྱིས་བྱིས་པར་ཤུགས་རྐྱེན་ངན་པ་ཐེབས་སྲིད་པ་དེ་ཕ་མ་ཚོས་མི་ཤེས་པར་ཁག་མི་འདུག།
ང་ཚོ་སུ་ཡིན་རུང་ཆུང་དུས་སུ་ཁ་པར་ལ་རྩེ་བའི་གོ་སྐབས་མེད་པ་དང་དེ་ལས་ཤུགས་རྐྱེན་ངན་པ་ཐེབས་སྲིད་པ་གོ་ག་ལ་མྱོང་། དེ་འདྲའི་ཉམས་མྱོང་མེད་པའི་རྐྱེན་གྱིས་བོད་རིགས་ཀྱི་ཕ་མ་ཁ་ཤས་ཀྱིས་རང་གི་བྱིས་པ་ལ་དུས་རྟག་ཏུ་ཁ་པར་རྩེ་རུ་བཅུག་པར་མ་ཟད། ད་ལྟ་ཁ་པར་ནང་དུ་འཕྲུལ་རྩེད་ཀྱི་རིགས་ཧ་ཅང་མང་ཞིང་ཕ་མ་ཚོས་བྱིས་པ་དག་ལ་མེ་མདའ་རྒྱག་རེས་ཀྱི་རྩེད་མོ་དེ་སྦྱོང་དུ་བཅུག་པ་དང་། རྩེད་མོ་ལས་རྒྱལ་ཁ་བླངས་དུས་བྱིས་པར་མཁས་པ་དང་འཇོན་མོ་རེད་ཅེས་བསྟོད་བསྔགས་བྱས། དེ་འདྲ་བྱས་ཏེ་བྱིས་པས་རང་ལ་འཇོན་སྣང་ལྡན་མདོག་གིས་ང་རྒྱལ་སྐྱེས་ནས་དུས་ཡུན་རིང་པོ་རྩེ་རྒྱུ་ལ་འབད་པ་བྱས། ཕ་མ་ཚོས་ཀྱང་འདི་འདྲ་གཅིག་ཡིན་སྣང་ཤར་བཞིན་འདུག། ཕ་མ་ཁ་ཤས་ཀྱིས་རྩེ་མི་ཆོག་པའི་བླང་བྱ་བཏོན་ཀྱང་བྱིས་པས་ཕ་མའི་ཁར་མི་ཉན་ཞིང་། རྩེ་དགོས་ཟེར་ནས་ཨུ་ཚུགས་བཏོན་པ་ན་ཕ་མས་བྱིས་པར་སེམས་ཀྱིས་མི་བཟོད་པར་ཁ་པར་རྩེ་རུ་མི་འཇུག་ཐབས་མེད་དུ་གྱུར། དེའི་རིགས་ཀྱི་བྱིས་པ་ནི་རྒྱུན་དུས་གཅེས་ལངས་ཤོར་ཅིང་གཤིས་ཀ་ཡང་ངན་པ་གྱུར་ནས་སྐད་ཆ་བཤད་རྒྱུར་མི་དགའ་བ་དང་། ཕྱི་རོལ་དུ་འཆམ་འཆམ་ལ་འགྲོ་མི་འདོད་པ། ལུས་པོའི་རྩལ་སྦྱོང་སོགས་ལ་ཡང་མི་སྤྲོ་བ། ཁྱིམ་ནང་གི་ཐབ་ལྷ་འདྲ་བོ་ཉིན་ལྟར་ཁྱིམ་དུ་ཁ་པར་བརྩེས་ནས་བསྡད་པ་རེད། འདི་ཕ་མ་དག་གིས་བུ་ཕྲུག་གཅེས་མ་ཤེས་གཅེས་ཕྲུག་གཅེར་བུ་ཕུད་ཅེས་པ་ལས་མ་འདས་སོ།།
ལོ་ཅུང་ཆུང་བའི་ཕ་མ་ཁ་ཤས་ཀྱིས་ཉིན་ལྟར་བྱིས་པ་ལ་ཁ་པར་རྩེ་རུ་བཅུག་ཅིང་། ཞོགས་པར་བྱིས་པ་གཉིད་ལས་སད་དུས་ཁོ་རང་ལེ་ལོ་ཆེ་བའི་དབང་གིས་བྱིས་པ་ལྟ་སྐྱོང་བྱ་མི་དགོས་པའི་ཆེད་ཁ་པར་བྱིས་པར་སྤྲད་ནས་རང་འཇམ་ཐིང་ངེར་ཞོགས་ཉལ་ལ་རོལ། ཉིན་དཀར་ལ་མི་གཞན་དང་ཁ་བརྡ་བྱ་ཆེད་བྱིས་པ་ལ་ཁ་པར་སྟེར་ནས་རྩེ་རུ་བཅུག། ཁྱིམ་ལ་མགྲོན་པོ་འབྱོར་ཡང་བྱིས་པས་ཁ་བརྡ་བྱེད་མི་སྲིད་པར་མ་ཟད། མགོ་བཀྱག་ཙམ་ཡང་མི་བྱ་ལ། ཐ་ན་རང་ཁྱིམ་དུ་འོང་བའི་མགྲོན་པོ་དེ་སུ་ཡིན་ཡང་མི་ཤེས་པའི་ཚད་ལ་སླེབས། ཕ་མ་དེ་དག་གི་སེམས་སུ་བོད་རིགས་ཀྱི་སྲོལ་རྒྱུན་གུས་བཀུར་ལུགས་སྲོལ་བཟང་པོ་བྱིས་པར་སློབ་འདོད་ཀྱི་འདུ་ཤེས་དང་སློབ་གསོ་བྱ་དགོས་པའི་གནས་ལུགས་སེམས་ནས་དྲན་མི་སྲིད། དགོང་མོར་ཕ་མས་རང་གི་ནམ་རྒྱུན་ལྟ་བའི་བརྙན་འཕྲིན་ཟློས་གར་ལ་ལྟ་འདོད་པས་བྱིས་པར་སླར་ཡང་ཁ་པར་རྩེ་རུ་བཅུག། འདི་འདྲ་གནས་ཚུལ་ངན་པ་དེ་ང་ཚོའི་བོད་རིགས་ས་ཁུལ་དུ་མིག་མཐོང་ལག་ཟིན་རེད། མ་གཞི་བྱིས་པ་ནི་རྒྱལ་ཁབ་དང་མི་རིགས། ཁྱིམ་ཚང་བཅས་ཀྱི་མ་འོངས་པའི་རེ་བའི་མེ་ཏོག་ཡིན་ཞིང་། བྱིས་པའི་མི་ཚེའི་ཁྲོད་དགེ་རྒན་དང་པོའམ་ལམ་ཁྲིད་མཆོག་ནི་ཕ་མ་རང་ལགས་པས། དེའི་ཐད་ལ་དགེ་རྒན་བཟང་པོའི་བྱ་བ་དང་ལམ་ཁྲིད་ལེགས་པོའི་འགན་འཁྲི་སོ་སོས་ཇི་ལྟར་ཁུར་ཡོད་བསམ་བློ་རེ་གཏོང་བའི་དུས་ལ་སླེབས་པ་མིན་ནམ།
བྱིས་པ་ལ་གཅེས་ཤིང་སྙིང་རྗེ་ན་ཕ་མ་ཚོས་རང་སྐྱིད་ཐབས་ཀྱི་འཚོ་བ་དོར་ནས་བྱིས་པ་ཚོ་ལ་ཁ་པར་རྩེ་རུ་འཇུག་མི་ཉན། དེ་ལས་ཀྱང་དུས་ཡུན་རིང་པོར་བྱིས་པར་ཁ་པར་གཏན་ནས་རྩེ་རུ་བཅུག་མི་རུང་། རྒྱུ་མཚན་ནི་ཆེད་མཁས་སྨན་པས་འདི་ལྟར་བཤད་ཡོད་དེ། དང་པོ། ཁ་པར་གྱིས་བྱིས་པའི་མིག་ཤེད་ལ་ཤུགས་རྐྱེན་ངན་པ་ཐེབས་ངེས་པ་སྟེ། བྱིས་པ་ཚོ་ད་ལྟ་སྐྱེ་འཚར་གྱི་དུས་རིམ་ཡིན་ཞིང་དུས་ཡུན་རིང་པོར་ཁ་པར་ལ་བལྟས་ན་མིག་ཚ་བ་དང་མིག་དམར་པོར་གྱུར་ནས་མཐོང་འཛིན་ངལ་དུབ་པ། མཐོང་ཤུགས་ཀྱང་ཉམས་ངེས་སོ།། མིག་ལ་དོ་སྣང་མ་བྱས་ཚེ་ནད་གཞི་རབ་དང་རིམ་པ་ཐོན་སྲིད། གཉིས་པ། ཁ་པར་གྱིས་བྱིས་པའི་དབང་རྩའི་མ་ལག་ལ་ཤུགས་རྐྱེན་ངན་པ་ཐེབས་པ་སྟེ། ཁ་པར་ལ་འགྱེད་འཕྲོའི་ནུས་པ་ལྡན་པས་བྱིས་པའི་ཀླད་པ་འཚར་སྐྱེ་དུས་རིམ་ལ་གནོད་པ་ཆེ་བས། དུས་ཡུན་རིང་པོར་ཁ་པར་བརྩེས་ན་ཀླད་པའི་འཚར་སྐྱེ་ལ་གནོད་དེ་རིག་སྟོབས་ཇེ་ཞན་དུ་འགྲོ་བའི་གནོད་པ་འབྱུང་སྲིད། གསུམ་པ། ཁ་པར་གྱིས་བྱིས་པའི་ཉན་ཤུགས་ལ་ཤུགས་རྐྱེན་ངན་པ་ཐེབས་ངེས་ཏེ། བྱིས་པས་སྤྱིར་བཏང་ཁ་པར་ནང་རོལ་རྩེད་ལ་རྩེ་རྒྱུར་དགའ་བ་དང་། དུས་ཡུན་རིང་པོར་སྒྲ་ཆེ་བའི་རོལ་རྩེད་ལ་རྩེ་ན་ཁོའི་རྣ་ཤེད་ལ་ཤུགས་རྐྱེན་ངེས་ཅན་ཞིག་ཐེབས་སྲིད།
གོང་དུ་བཤད་པ་དེས་མ་ཚད་ད་རུང་ང་ཚོ་རང་ཉིད་ཀྱང་ཁ་པར་དུས་ཡུན་རིང་པོར་བརྩེས་ན་མིག་ཚ་བ་དང་མཐོང་འཛིན་ངལ་དུབ་པ། དེ་ནས་རྟག་ཏུ་མིག་སྨན་དང་མིག་ཤེལ་འདྲ་མིན་སྣ་ཚོགས་ཉོས་ནས་མ་སྤྱོད་ཐབས་མེད་བྱུང་དང་འབྱུང་བཞིན་པ་མྱོང་བ་ལས་ཤེས་ཐུབ། དེའང་ང་ཚོ་བོད་རིགས་ས་ཆ་ལ་ཆ་མཚོན་ན་དབྱར་རྩྭ་དགུན་འབུ་བརྐོ་རྒྱུ་ནི་ང་ཚོའི་ཡོང་སྒོ་གཙོ་བོ་ཡིན་ལ། རྒྱུན་དུས་ཁ་པར་ལ་བརྩེས་ཏེ་མིག་ལ་གནོད་འཚེ་བཟོས་ན་དབྱར་རྩྭ་དགུན་འབུ་མང་པོ་མི་རག་པས་ཡོང་སྒོ་ཇེ་ཉུང་ནས་ཇེ་ཉུང་དུ་འགྲོ་བ་དེ་ཚོ་ནི་དངོས་ཡོད་ཀྱི་གནས་ཚུལ་རེད། དེ་ལས་མིག་ཤེད་ཉམས་མཁན་ཚོར་ཆ་མཚོན་ན། ཅ་དངོས་རབ་རིབ་ལས་མ་མཐོང་ཚེ་སེམས་ཁམས་དོག་ཏུ་འགྲོ་བ་དང་། རྟག་ཏུ་མིག་ཤེལ་བརྒྱབ་ནས་ལས་ཀ་དང་ལུས་སྦྱོང་སོགས་བྱེད་ཚེ་སྟབས་བདེ་པོ་མེད་པ། དེས་ན་མིག་ཟུང་ལ་གཅེས་སྤྲས་དང་མིག་ཤེད་ཉམས་རྒྱུར་སྔོན་འགོག་བྱེད་པ་སོགས་འབྲེལ་ཡོད་ཀྱི་ཤེས་བྱར་དོ་སྣང་བྱ་དགོས་པ་ནི་ཧ་ཅང་གལ་ཆེན་པོ་རེད་སྙམ། ཁ་པར་དང་བྲལ་ནས་ཡུན་རིང་འགོར་རྗེས་ཁ་པར་མ་བརྩེས་ན་ལུས་ལ་ཟ་འཕྲུག་ལངས་ནས་སྡོད་མི་ཚུགས་པ་དང་། ཁ་པར་མེད་ཚེ་སྐྲག་སྣང་དང་འཇིགས་སྣང་ཡོང་བ། ཁ་པར་བློས་མི་ཐོངས་པ། ཁ་པར་མ་བརྩེས་ན་གཉིད་མི་ཡོང་བ། ཁ་པར་རྩེ་བཞིན་རྩེ་བཞིན་རྣམ་རིག་ཇེ་གསལ་དང་ཞག་གང་པོར་མི་གཉིད་པ་སོགས་ཀྱི་གནས་ཚུལ་ཡོད། དེ་འདྲ་ཁ་པར་རྩེ་ཡུན་རིང་ན་གཉིད་མི་ཡོང་བ་དང་ཐང་ཆད་སླ། ཞིབ་འཇུག་བྱས་པ་ལྟར་ན་མཚན་མོའི་དུས་སུ་གློག་འོད་དམར་པོས་མགྱོགས་མྱུར་ངང་གཉིད་ཁུག་པའི་རམ་འདེགས་བྱེད་ཐུབ་ལ། ཁ་པར་དང་གློག་རྡུལ་ཐོན་རྫས་རིགས་ཀྱིས་གློག་འོད་སྔོན་པོ་ཞིག་གཏོང་བཞིན་ཡོད་པ་དེས་མིའི་ལུས་ཕུང་གི་སྐྱེ་དངོས་དུས་ཟིན་ལ་བར་ཆད་བྱས་ཏེ་གཉིད་མི་ཁུག་པ་ཆགས་སྲིད་དོ། ། བསམ་བློ་ཞིབ་མོ་ཞིག་ཐོངས་དང་ང་ཚོ་མི་དར་མ་ལ་ཡང་གནོད་པ་འདི་འདྲ་ཐེབས་སྲིད་པས་བྱིས་པ་ཆུང་ཆུང་ཞིག་ལ་དེ་བས་ལྟ་ཅི་སྨོས།
ཕ་མས་རང་གི་བྱིས་པ་སྲོག་ལྟར་གཅེས་ངེས་ཡིན་ལ། སྔོན་མར་ཁྱེད་ཚོས་ཁ་པར་གྱིས་བྱིས་པ་ལ་ཐེབས་པའི་ཤུགས་རྐྱེན་ཤེས་མེད་པ་ཡིན་ན་འདྲ། ཤེས་ཀྱང་བསྒྲུབ་དཀའ་བ་ཡིན་ནའང་འདྲ། ད་ནས་བཟུང་བྱིས་པ་བདེ་ཐང་ངང་འཚར་ལོངས་ཡོང་ཆེད། ཁོ་ཚོ་ལ་ངེས་པར་ལྟ་སྐུལ་བྱ་དགོས་ཤིང་རང་ཉིད་ཀྱང་བྱིས་པའི་མདུན་དུ་རྒྱུན་དུ་ཁ་པར་རྩེ་མི་རུང་། ཁ་པར་སྤྱད་དགོས་ཀྱང་དུས་ཚོད་ཚོད་འཛིན་བྱ་དགོས། བྱིས་པའི་སྔུན་ལ་ཕ་མའི་བག་ཆགས་བཟང་པོ་ཞིག་བཞག་ཅིང་། བྱིས་པའི་མ་འོངས་པར་འབྱུང་སྲིད་པའི་བཟང་ངན་གྱི་ལས་དབང་དེ་ཚོ་ནི་ད་ལྟ་དྲིན་ཆེན་ཕ་མ་ཁྱེད་ཚོའི་བཀའ་བཀོད་ལ་རག་ལས་པས། ཕ་མས་སློབ་གསོ་གནང་ན་བུ་ཕྲུག་བཟང་པོས་ཕ་མའི་ངག་ལ་ཉོན་ཞེས་པ་འཇིག་རྟེན་གཏམ་དཔེ་ལྟར་ལགས་སོ།།
ཁོར་ཡུག་གིས་བྱིས་པ་ལ་འགྱུར་ལྡོག་གཏོང་བ་དང་ཡར་ཐོན་ཡོང་དུ་འཇུག་སྲིད། བྱིས་པ་ལ་དབང་བའི་ཁོར་ཡུག་བཟང་པོ་ཞིག་འཚོལ་དགོས། ཁོར་ཡུག་གི་ཤུགས་རྐྱེན་ནི་མི་ཞིག་གི་མི་ཚེའི་སྔོན་འགྲོ་རེད། བྱིས་པའི་མི་ཚེ་གཞི་ནས་འགོ་བརྩམ་པ་དང་། མ་འོངས་པར་བདེ་ཐང་དང་ཤེས་ཡོན་མེད་པ་ཞིག་ཏུ་གྱུར་ན་དེ་ལས་གྱོང་ཆེ་བ་དང་འགྱོད་པ་ཆེ་བ་ཞིག་གང་ན་ཡོད་ཨང་། དེས་ན་དྲིན་ཕ་མས་བྱིས་པའི་མདུན་ལམ་ལ་དགོངས་ནས་ཁ་ཏ་སློབ་གསོ་གནང་སྟེ་ལེགས་ལམ་ལ་དཀྲི་རྒྱུ་ནི་གལ་ཆེན་ནང་གི་དོན་ཆེན་ཡིན་པ་ཐུགས་ནས་བརྗེད་མི་རུང་ངོ་།།
མ་འོངས་པར་མེས་རྒྱལ་དང་མི་རིགས་ཀྱི་ཆེད་དང་བུ་ཚ་རྗེས་རབས་རྣམས་ཀྱི་ཆེད་དུ་ད་ནས་བཟུང་བྱིས་པའི་ལག་ཏུ་ཁ་པར་བཞག་པ་ནི་ལུས་སེམས་བསྣད་པའི་དུག་གི་སྤུ་གྲི་དང་མཚུངས་པའི་འདུ་ཤེས་བཅངས་ཏེ་སློབ་གསོ་དོན་ལ་གནས་ཤིང་གནད་ལ་སྨིན་བ་རེ་གནང་བར་མཁྱེན་ཞེས་ནན་དུ་ཞུས་སོ།། ༼ ཡེ་ཤེས།༽