གལ་སྲིད་ང་རང་མཐོན་མཐིང་གི་དགུང་སྔོན་ན་རྒྱུ་བའི་སྤྲིན་དཀར་དེ་ཡིན་ན། ངས་མཐོན་བརྗིད་ཀྱི་འགྱིང་རྔམ་དོར་དེ། རང་ལུས་བརླན་གཤེར་གྱི་སྦྲང་ཆར་ཟིལ་མར་བསྒྱུར་ནས། དགེ་བཅུས་གཏམས་པའི་ཞིང་ས་གཤིན་པོ་རུ་འབབ་འདོད། དེ་ཅི་རེད་ཅེ་ན། སྔོ་ལྗང་གི་ལོ་འདབ་རྒྱས་ཤིང་འཛུམ་དྲུག་གི་མེ་ཏོག་ལྷམ་མེར་དགོད་པ་དག་གི་ཆེད་དུའོ། །

གལ་སྲིད་ང་རང་རྩལ་དྲུག་རྫོགས་པའི་ཐང་དཀར་རྒོད་པོ་དེ་ཡིན་ན། ངས་བར་སྣང་གི་དབྱིངས་སུ་རང་དགར་གྱིས་འཕུར་སྐྱོད་མི་བྱེད་པར། མཛེས་སྡུག་གི་ཁ་བ་ཅན་དུ་འཛད་མཐའ་མེད་པའི་བཀྲ་ཤིས་ཀྱི་དངོས་གྲུབ་སྩོལ་འདོད། དེ་ཅིའི་ཕྱིར་ཞེ་ན། ལྷག་བསམ་གྱི་གསོལ་སྨོན་རྩེ་གཅིག་ཏུ་གཞོལ་བའི་གངས་ཅན་པ་རྣམས་ཀྱི་དོན་ལའོ། །

གལ་སྲིད་ང་རང་དར་དཀར་རིང་དུ་འཕྱངས་འདྲའི་གཙང་ཆབ་སྔོན་མོ་དེ་ཡིན་ན། ངས་ཉིན་མཚན་ཁོམ་མེད་ངང་རྒྱ་མཚོ་ཆེན་མོར་བཞུད་རྒྱུན་བསྐྱུར་ཏེ།ཡངས་པའི་ཞིང་ཁ་སྙོམས་པོ་རུ་འབྲུ་དྲུག་ལྗང་ལོའི་གྲོགས་སུ་ཆས་འདོད།དེ་ཅིའི་སླད་ཅེ་ན།ལོ་ལེགས་འབྲུ་སྣས་བང་མཛོད་བཀང་བ་དང་ནས་ཆང་བསིལ་མར་ཚིམ་མེད་རོལ་ཕྱིར་དུའོ།།

གལ་སྲིད་ང་རང་གངས་འཁྱགས་ཀྱི་ཀློང་ན་གསོན་པའི་གངས་ལྷ་མེ་ཏོག་དེ་ཡིན་ན།ངས་གངས་ནས་གངས་བར་དུ་ཚེ་རིང་ལོ་བརྒྱའི་འཚོ་བ་དོར་ནས།རང་ལུས་དུམ་བུར་གཅོད་ཅིང་ནད་བརྒྱ་ཡུན་གྱིས་སེལ་བའི་བདུད་རྩི་སྨན་རིལ་ཞིག་ཏུ་འགྱུར་འདོད།དེ་གང་ལགས་ཞེ་ན།སྣ་མང་ནད་ཀྱིས་གཟིར་བའི་སྐྱེ་འགྲོ་དག་གི་སླད་དུའོ།།

གལ་སྲིད་ང་རང་བང་རྩལ་མྱུར་བའི་འདོ་བ་ཅང་ཤེས་དེ་ཡིན་ན།ངས་རྩྭ་ཐང་ཡངས་པོར་རྣམ་གཡེང་གི་ཁོམ་ལོང་དུ་མི་འཚོ་བར།མཚར་སྡུག་ལྡན་པའི་གངས་ཅན་འཛིན་མའི་རི་ལུང་ཀུན་ཏུ་ལྟད་མོར་ཆས་འདོད།དེ་གང་རེད་ཟེར་ན།ལེགས་ཚོགས་འབུམ་གྱིས་ཕྱུག་པའི་རིག་གནས་དང་ངོ་མཚར་རྣམ་པར་བརྒྱན་པའི་ཁྱད་ཆོས་སོགས་ཀྱིས་གཏམས་པས་ནའོ།།

གལ་སྲིད་ང་རང་།

༼ ནོར་བུ།༽