མི་སྣ་ངོ་སྤྲོད།

གཡང་མཚོ་ནི་སི་ཁྲོན་དར་མདོའི་མི་ཡིན་ཞིང་། པ་ཅིང་རྩོམ་རིག་སློབ་གླིང་གི་ཆིངས་འགོད་རྩོམ་པ་པོ་ཡིན། རྒྱལ་ཡོངས་ཀྱི་ཡོངས་བསྒྲགས་དུས་དེབ་ཐོག་སྒྲུང་ཐུང་དང་ལྷུག་རྩོམ་ཡིག་འབྲུ་བྱེ་བ་ལས་བརྒལ་བ་བྲིས་ཤིང་། 《ཟླ་བ་བཅུ་པ》དང《མེ་ཏོག་གྲོང་ཁྱེར》《ཀྲུང་གོ་རྩོམ་པ་པོ》《མི་རིགས་རྩོམ་རིག》སོགས་དུས་དེབ་ཏུ་བརྩམས་ཆོས་དུ་མ་བཀོད་ཡོད། ལྷུག་རྩོམ་ཕྱོགས་བསྒྲིགས《ཨོ་གྲོང》དང《ཨོ་གྲོང་དུ་རླུང་བུ་ལྡང》《ཡལ་ཟིན་པའི་གཏམ་རྒྱུད》པར་དུ་བསྐྲུན་ཅིང་། མོའི་བརྩམས་ཆོས་ལ་རྒྱལ་ཡོངས་གྲངས་ཉུང་མི་རིགས་རྩོམ་རིག་གསར་རྩོམ་སྐབས་བཅུ་གཅིག་པའི་གྱི་ལིང་བྱ་དགའ་དང་སི་ཁྲོན་རྩོམ་རིག་དམིགས་བསལ་བྱ་དགའ། སི་ཁྲོན་རྩོམ་རིག་བྱ་དགའ།གྲངས་ཉུང་མི་རིགས་རྩོམ་རིག་བྱ་དགའ། ཧྲན་མའོ་ལྷུག་རྩོམ་བྱ་དགའ། སུན་ལིའི་ལྷུག་རྩོམ་བྱ་དགའ། 《མེ་ཏོག་གྲོང་ཁྱེར》རྩོམ་རིག་ལྷུག་རྩོམ་བྱ་དགའ། 《གྲུབ་འབྲས》མུ་མེད་ཡུལ་སྐོར་འཆར་གཞིའི་རི་མོར་ཞུགས་པའི་ལྷུག་རྩོམ་བྱ་དགའ་སོགས་ཐོབ་པ་རེད། བརྩམས་ཆོས་དབྱིན་ཡིག་དང་བྱང་ཁོ་རེ་ཡ་ཡི་གེ། སོག་ཡིག། བོད་ཡིག། ཧ་སག་ཡི་གེ་སོགས་སུ་བསྒྱུར་ཡོད། རྒྱལ་ཡོངས་དྲིལ་བསྒྲགས་མ་ལག་སྔོན་ཐོན་མི་སྒེར་གྱི་མཚན་སྙན་ཐོབ་མྱོང་།

གསར་འགོད་པ། རྒྱལ་ཡོངས་ཀྱི་རིག་གནས་དྲིལ་བསྒྲགས་སྔོན་ཐོན་མི་སྒེར་དང་སི་ཁྲོན་ཞིང་ཆེན་གྲངས་ཉུང་མི་རིགས་རྩོམ་རིག་བྱ་དགའ་དུས་མཉམ་དུ་ཐོབ་པ་ཤེས་སྐབས། མིག་སྔར་ཁྱེད་ཀྱི་སེམས་ཁམས་གང་འདྲ་ཞིག་རེད། པེ་ཅིང་དུ་རྒྱལ་ཡོངས་ཀྱི་རིག་གནས་ཤེས་ལྡན་མི་སྣའི་ལས་དོན་བཞུགས་མོལ་ཚོགས་འདུར་ཞུགས་པའི་རིང་ཚོགས་ཞུགས་ཆེད་མཁས་པ་དང་ལས་རིགས་གཅིག་པའི་གཏམ་བཤད་དང་སྤེལ་རེས་ཀྱིས་བཞག་པའི་བག་ཆགས་ཟབ་ཤོས་དེ་གང་རེད། བྱ་དགའ་གཉིས་རག་པ་འདིས་ཁྱེད་ཀྱི་སླད་ཕྱིན་རྩོམ་རིག་གསར་རྩོམ་དང་རྩོམ་སྒྲིག་ལས་དོན་ལ་བློ་སྒོ་ཕྱེ་བ་དང་སྐུལ་མ་ག་འདྲ་བཏང་སོང་།

གཡང་མཚོ། སེམས་ཁམས་ལ་འགྱུར་བ་ཆེན་པོ་མི་འདུག། ང་ནི་བྱ་བ་གང་ལ་ཡང་སྔོན་བསུ་མེད་པའི་མི་ཞིག་ཡིན་ལ་འགྲོ་ཕྱོགས་དང་བསྟུན་མཁས་པོ་ཞིག་ཡིན། པེ་ཅིང་དུ་ཚོགས་འདུ་འཚོགས་སྐབས། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན། ཀྲུང་དབྱང་དྲིལ་བསྒྲགས་པུའུ་ཡི་པུའུ་ཀྲང་ལི་ཧྲུའུ་ལེ་དང་། ཀྲུང་གོ་རྩོམ་པ་པོ་མཐུན་ཚོགས་ཏང་ཚན་ཁག་གི་ཧྲུའུ་ཅི། ཀྲུའུ་ཞི་ཀྲང་ཧུང་སེན། རྩོམ་པ་པོ་ཆའོ་ཡེ། ཁོ་ཁོ་ཏུའུ་འགུལ་རིས་གློག་བརྙན་བརྙན་འཕྲིན་ཚད་ཡོད་སྤྱི་གཉེར་ཁང་གི་གཙོ་འཛིན་ལིའུ་ཝུན་ཀྲང་བཅས་ཀྱི་བགྲོ་གླེང་དང་གཏམ་བཤད་ཚང་མས་ང་ལ་བག་ཆགས་ཟབ་མོ་སྟེར་བྱུང་། ད་ཐེངས་བྱ་དགའ་གཉིས་ཐོབ་པ་ནི་ཁུལ་ཨུ་དང་ཁུལ་སྲིད་གཞུང་། ཁུལ་ཨུ་དྲིལ་བསྒྲགས་པུའུ་དང་དེ་བཞིན་ཁུལ་རྩོམ་རིག་སྒྱུ་རྩལ་མཉམ་འབྲེལ་ལྷན་ཚོགས། 《གངས་དཀར་རི་བོ》དུས་དེབ་ཁང་བཅས་ཀྱིས་ང་ལ་ཡུན་རིང་པོར་གསོ་སྐྱོང་དང་སེམས་ཁུར་གནང་བ་དང་འབྲལ་མེད་ཡིན་ཞིང་། ཉིན་རེ་རེ་ནི་འགོ་རྩོམ་ས་གསར་པ་རེ་ཡིན་པས་སླད་ཕྱིན་གྱི་ལས་ཀའི་ཁྲོད་ངས་ཡང་ནས་བསྐྱར་དུ་འབད་བརྩོན་བྱ་རྒྱུ་ཡིན།

གསར་འགོད་པ། ཐེངས་འདིའི་བཞུགས་མོལ་ཚོགས་འདུར་རིག་གནས་ཤེས་ལྡན་མི་སྣའི་ལས་དོན་གྱི་གལ་ཆེའི་རང་བཞིན་ནན་བཤད་བྱས་འདུག། གྲངས་ཉུང་མི་རིགས་ཀྱི་རྩོམ་རིག་ཁྱབ་ཁོངས་ཟབ་སྤེལ་བྱ་དགའ་ཐོབ་པའི་རྩོམ་པ་པོ་ཞིག་ཡིན་པའི་ངོས་ནས་ཇི་ལྟར་བྱས་ནས་ཚོགས་འདུའི་སྙིང་དོན་དོན་ཐོག་ཏུ་འཁྱོལ་ནས་གྲངས་ཉུང་མི་རིགས་ཀྱི་རྩོམ་རིག་གསར་རྩོམ་འཕེལ་རྒྱས་ཡོང་བ་དང་ཤེས་ལྡན་མི་སྣ་གསོ་སྐྱོང་བྱེད་པར་སྐུལ་འདེད་གཏོང་བའི་བྱ་སྤྱོད་ངོ་མར་བསྒྱུར་རྒྱུ་ཡིན། གྲངས་ཉུང་མི་རིགས་ཀྱི་རྩོམ་རིག་ནི་ཀྲུང་ཧྭ་མི་རིགས་ཀྱི་གཅིག་མཐུན་འདུས་གྲུབ་འདུ་ཤེས་བརྟན་པོར་བཅངས་པའི་འབྲེལ་ཐག་གལ་ཆེན་ཞིག་ཡིན་ཞེས་པར་གོ་བ་ཇི་ལྟར་ལེན་བཞིན་ཡོད།

གཡང་མཚོ། ཁུལ་ཨུ་དང་ཁུལ་སྲིད་གཞུང་། ཁུལ་ཨུ་དྲིལ་བསྒྲགས་པུའུ། ཁུལ་རྩོམ་རིག་སྒྱུ་རྩལ་མཉམ་འབྲེལ་ལྷན་ཚོགས་བཅས་ཀྱིས་རང་ཁུལ་གྱི་རིག་རྩལ་ལས་དོན་ལ་མཐོང་ཆེན་གནང་བར་མ་ཟད་རོགས་སྐྱོར་བྱ་དགའ་སྤྲོད་པའི་བྱ་ཐབས་གཏན་འབེབས་བྱས་ཡོད་པ་རེད། 《གངས་དཀར་རི་བོ》དུས་དེབ་ཁང་གི་རྩོམ་སྒྲིག་པ་ཞིག་ཡིན་པའི་ངོས་ནས་སླད་ཕྱིན་གྱི་ལས་ཀའི་ཁྲོད་ངས་རང་འཁྲིའི་ལས་དོན་ལེགས་པོར་བསྒྲུབས་ནས་དུས་དེབ་སྟེགས་བུ་སྤྱད་དེ་རྩོམ་རིག་གི་སྟོབས་ཤུགས་དེ་བས་མང་བ་གསོ་སྐྱོང་བྱས་ནས་དཀར་མཛེས་ཁུལ་ངོ་སྤྲོད་དང་དྲིལ་བསྒྲགས་བྱེད་པར་རང་ཉིད་ཀྱི་སྟོབས་ཤུགས་འབུལ་ཅི་ཐུབ་བྱ་རྒྱུ་ཡིན། ངས་རང་ཉིད་ཀྱི་གསར་རྩོམ་འདུ་ཤེས་རྒྱུན་ཆད་མེད་པར་གསར་སྒྱུར་བྱས་ནས་འཚོ་བའི་ནང་རྩ་བ་ཚུགས་ཤིང་འཚོ་བའི་ནང་ཞུགས་ཏེ་དུས་རབས་དང་འཚམ་པའི་རྩོམ་རིག་བརྩམས་ཆོས་སྔར་ལས་མང་བ་གསར་རྩོམ་བྱ་རྒྱུ་ཡིན། གྲངས་ཉུང་མི་རིགས་རྩོམ་རིག་ནི་ཁེར་རྐྱང་གི“མི་རིགས་རྩོམ་རིག”ཅིག་མ་ཡིན་པར་ཀྲུང་ཧྭ་རིག་གནས་ཀྱི་གྲུབ་ཆ་གལ་ཆེན་ཞིག་ཡིན། དེས་རྩོམ་རིག་གི་ཡིད་དབང་འཕྲོག་ཤུགས་ལ་བརྟེན་ནས་མི་རིགས་ཁག་གི་རིག་གནས་ཕན་ཚུན་དཔྱད་གཞིར་འཛིན་པའི་ཁྲོད་བསམ་ཤེས་ཟབ་ཏུ་གཏང་བ་དང་བརྩེ་བ་མཉམ་སྐྱེད་བྱེད་པའི་བར་ཐག་ཐུང་དུ་གཏང་བ། རིན་ཐང་ཁས་ལེན་བྱེད་པའི་ཁྲོད་སྟོབས་ཤུགས་གཅིག་ཏུ་འདུས་པ་བཅས་བྱེད་ཐུབ་པས་ཀྲུང་ཧྭ་མི་རིགས་གཅིག་མཐུན་འདུས་གྲུབ་འདུ་ཤེས་བརྟན་པོར་བཅངས་པར་མེད་དུ་མི་རུང་བའི་བསམ་པའི་འབྲེལ་ཐག་ཅིག་ཏུ་གྱུར་ཡོད་པ་རེད།

གསར་འགོད་པ། ཁྱེད་ཀྱི་བྱ་དགའ་ཐོབ་པའི་བརྩམས་ཆོས《ཨོ་གྲོང་དུ་རླུང་བུ་ལྡང》ཞེས་པའི་གསར་རྩོམ་གྱི་འབྱུང་ཁུངས་གང་རེད། སྔོན་གྱི་བརྩམས་ཆོས《ཨོ་གྲོང》དང་རྩོམ་སྟངས་མི་འདྲ་ས་གང་ཡོད། ཀློག་པ་པོ་ཚོར་ཆེས་བརྒྱུད་སྤྲོད་བྱེད་འདོད་པའི་བརྩེ་བ་གཙོ་བོ་དང་བསམ་བློའི་ནང་སྙིང་ཅི་ཞིག་ཡིན།

གཡང་མཚོ། 《ཨོ་གྲོང་དུ་རླུང་བུ་ལྡང》ཞེས་པའི་གསར་རྩོམ་གྱི་འབྱུང་ཁུངས་ནི་ལོ་ངོ་དྲུག་བདུན་སྔོན་གྱི་བརྩམས་ཆོས་ཕྱོགས་བསྡུས་ཤིག་ཡིན། ལྷུག་རྩོམ་ཕྱོགས་བསྒྲིགས་དེ་གཉིས་ནི་ངའི་ཕ་ཡུལ་དར་མདོ་གྲོང་ཁྱེར་རི་སྐེད་གྲོང་སྡེ་རྒྱབ་ལྗོངས་སུ་བྱས་ནས་གསར་རྩོམ་བྱས་པའི་བརྩམས་ཆོས་ཡིན། རྩོམ་སྟངས་ཀྱི་འགྱུར་བ་ཐད་ནས་བཤད་ན། ཐོག་མའི་གསར་རྩོམ་བྱེད་ཐབས་ལས་སྔར་ལས་འཐུས་ཚང་དང་སྔར་ལས་རྒྱ་ཆེ་བ། སྔར་ལས་དཔའ་ངར་ལྡན་པ་ཡིན། རྩོམ་འབྲི་ནི་ལས་ཀ་དལ་མོ་ཞིག་ཡིན་ཞིང་། ཉམས་མྱོང་ཕུན་སུམ་ཚོགས་སུ་ཕྱིན་པ་བསྟུན་ནས་གསར་རྩོམ་ལའང་འགྱུར་ལྡོག་འབྱུང་སྲིད། ང་རང་གིས་འགྱུར་བ་མེད་པའི་གསར་རྩོམ་བྱེད་སྟངས་ནི་དོགས་པ་བྱེད་དགོས་པ་ཞིག་ཡིན་པར་ངོས་འཛིན་བྱེད་བཞིན་ཡོད། ངས་གསར་རྩོམ་བྱས་ནས་ད་ལྟའི་བར་དུ་ཨོ་གྲོང་འབྲི་བཞིན་ཡོད། ཨོ་གྲོང་འབྲི་བ་ནི་ངའི་རུས་པའི་ནང་དུ་ནམ་ཡང་ཨོ་གྲོང་གི་ཁྲག་རྒྱུན་བཞུར་བཞིན་ཡོད་ལ་དབུགས་ཀྱི་རྒྱུ་བའི་ཁྲོད་དུ་ས་ཆ་དེ་གའི་དྲི་མ་ནམ་ཡང་འཐུལ་འདུག། ང་རང་ཨོ་གྲོང་དང་ཁ་བྲལ་ནས་ས་ཆ་གཞན་དུ་ལས་ཀ་བྱས་ནས་ལོ་མང་འགོར་ཡང་ངའི་སྐད་གདངས་ནང་དུ་ནམ་ཡང་ཨོ་གྲོང་གི་སྐད་གདངས་འདྲེས་ཡོད་པས། ངས་ང་དང་ཨོ་གྲོང་བར་གྱི་བརྩེ་དུང་ནི་ཚེ་འདིར་འབྲལ་ཐབས་མེད་པ་ཞིག་ཡིན་པར་འདོད། ད་དུང་ངས་ས་རྟགས་རང་བཞིན་གྱི་ཨོ་གྲོང་རྩོམ་འབྲི་བྱས་པ་བརྒྱུད་དུས་རབས་ཆེན་པོ་འདིའི་རྒྱབ་ལྗོངས་འོག་ང་ཚོའི་ཁམས་པའི་ས་གཞིའི་འགྱུར་ལྡོག་འགྲེམས་སྟོན་བྱས་ནས་མི་དེ་བས་མང་པོར་ཁམས་པའི་ཤེས་རིག་དང་དཀར་མཛེས་ཁུལ་ཤེས་སུ་འཇུག་འདོད། མཇུག་ཏུ་ངས་བཤད་འདོད་པ་ནི། མི་མང་པོ་ཞིག་གིས་ཕ་ཡུལ་ཞེས་པའི་ཐ་སྙད་ནི་ཐ་སྙད་རྙིང་པ་ཞིག་ཡིན་པར་འདོད། དུས་ཀྱི་འཁོར་ཕྱོགས་ཁྲོད་ནས་རྒྱང་ཐག་ཇེ་རིང་ནས་ཇེ་རིང་དུ་སོང་བ་འདྲ་ཡང་། དོན་དངོས་སུ་ཕ་ཡུལ་ནི་ནམ་ཡང་དེ་གར་ཡོད་པ་རེད། འགྱུར་བ་གང་འདྲ་བྱུང་ཡང་ཡུལ་དེ་གའི་རྩི་ཤིང་དང་རི་ཆུ། མི་ཐམས་ཅད་ནི་ཕ་ཡུལ་གྱི་མཚོན་རྟགས་ཡིན་པས། ང་ཚོ་ཚང་མའི་ཕ་ཡུལ་ལ་བརྩེ་བ་ཡོད་དགོས་སོ།།

གསར་འགོད་པ། གལ་ཏེ་ཚིག་གཅིག་གིས་ཁྱེད་ཀྱི་རྩོམ་རིག་དོན་དུ་གཉེར་བར་ཕྱོགས་བསྡོམས་ཤིག་བྱས་ན་ཚིག་དེ་གང་སྤྱོད་རྒྱུ་ཡིན། རྒྱུ་མཚན་ཅི།

གཡང་མཚོ། ཐོག་མའི་བསམ་འདུན་རེད། བྱ་བ་ཡོད་ཚད་ལ་ཐོག་མའི་བསམ་འདུན་ཞིག་ཡོད་དགོས། ང་ནི་སྔར་སོང་རྗེས་དྲན་བྱེད་མཁན་ཞིག་ཡིན། འགྲོ་བཞིན་འགྲོ་བཞིན་ཡོད་ཚད་བརྗེད་འགྲོ་མཁན་ཞིག་བྱེད་འདོད་མི་འདུག།

（ རྟ་མགྲིན་རྡོ་རྗེས་བྲིས།）