རེ་བའི་ཕུགས་འདུན་གའུ་སྙིང་ཁར་ཉར་ཏེ། །
ལས་ཀྱི་རྐང་ལམ་རིང་མོ་ཞབས་རྗེས་བཏབ་དུས། །
མྱི་ཁའི་ན་བུན་བཅིངས་པའི་རི་བོའི་སྐེད་ནས། །
སེམས་ཀྱི་ཚོར་འདུ་རེ་རེ་དབྱངས་སུ་གྱེར་འདོད། །
མ་བཅོས་ཡིད་ཀྱི་མཚོ་མོའི་རྦ་རླབས་སྟོང་གིས། །
འཁྲེང་སེམས་བརྩེ་བས་བརྟས་པའི་མཚོ་མཐའི་ཨུཏྤལ། །
ངལ་མེད་རིང་བའི་ཡུལ་ནས་ཁྱེར་ཚུལ་བསམ་ན། །
མི་སྨྲའི་བརྟུལ་ཞུགས་བཟུང་ཡང་བརྩེ་བའི་གཞི་མ། །
མ་སྐྱེས་ཨ་མའི་བཞིན་རས་ཡིད་དཀྱིལ་བསྣམས་ཏེ། །
ཕྱིར་མིག་ཞེ་ཆགས་སྤེལ་མ་ཁོག་ཏུ་བརྐོས་ཞོར། །
རྒྱང་རིང་ས་མཐའི་གྲོང་དུ་ཁེར་བུར་ཆས་དུས། །
བས་མཐའི་སྦྲང་ཆུང་ངེད་གཉིས་ཟླ་བོ་ཡིན་པ། །
རྣམ་གཡེང་ལེ་ལོའི་མཆེ་གཙིགས་རྣོ་སོའི་བར་ནས། །
གཞོན་པའི་ལང་ཚོ་སོ་མ་བག་མེད་བརླགས་དུས། །
སེམས་ཀྱི་སྐྱོ་བའི་གདུང་སངས་ཡུལ་གྲུ་རེ་ལ། །
འཛིན་མེད་བྱང་ཁོག་སྟོད་ཀྱི་རྟ་ཕོ་ཤོར་སོང་། །
སྨག་སྟུག་སྒེའུ་ཁུང་ལྷ་ཡི་ཕྱག་གིས་ཕྱེས་ཤིང་། །
མདུན་འགོག་སྐར་ཡོལ་སྐྱི་སེར་རླུང་བུས་འཁྱར་ན། །
རྣམ་རྟོག་ཚོན་གྱིས་བསླད་པའི་ཕྱེ་མ་ལེབ་ཁྱུས། །
དུང་ཞེན་སྐྱེད་ཚལ་དབུས་ན་དལ་གྱིས་འཕུར་འགྲོ །
ཐོབ་འདོད་རེ་བའི་སྟོང་གི་མཚན་སྐར་རྒྱས་དུས། །
བདག་ནི་སྤྲང་པོའི་གྲལ་གྱི་སྤྲང་དབུལ་ཡིན་པ། །
ཆོག་ཤེས་ནོར་བུ་མེ་འབར་བྲང་ཐོག་གླན་ན། །
ཡིན་རློམ་ཕྱུག་པའི་ཕལ་གྱིས་དོ་ཟླ་མི་ཡོང་། །
སྟོང་བསམ་སྒྱུ་མའི་མཁའ་རུ་ལག་པ་བསྲིངས་ཀྱང་། །
སྤྲང་འཁྱམས་ཨམ་ཕྲག་ཙམ་ཡང་རེག་པ་མེད་ན། །
རང་འདུན་ཕུགས་བསམ་ནོར་བུ་འཐོབ་བྱའི་ཆེད་དུ། །
ཐོབ་ཤོར་འཕྲང་ལམ་ཕྲ་མོ་བརྒལ་ནས་ཆས་དགོས། །
༼ དབྱངས་ལྡེའུ། ༽